DEUTERONOMIO 32 - Quichua Imbabura 2016

1Paica cashna nishpami candajurca:

“Jahua pachaca, ñuca rimajujta uyapayari.

Cai pachapash, ñuca shimihuan rimajujta uyapayari.

2Ñuca yachachishca shimica, tamia shutujujshnami canga.

Ñuca yuyaicunaca, jamzi paramu urmajujshnami canga.

Quiru yurapi tamia urmajujshnami canga.

Jihuapi tamia shutujujshnami canga.

3Mandaj Diospaj shutitami villajusha.

Ñucanchi Taita Diostaca jatunmi cangui nipaichiyari.

4Paica ima pandatapash na ruraj, jatun Rumishna Diosmari.

Paica tucui imatapash aligutalla ruraj Diosmari.

Paica, na llullaj, ima na alitapash na ruraj Taita Diosmari.

Paica, alitalla ruraj, ima pandatapash na ruraj Diosmari.

5Paica, ima na alitapash na rurajmi.

Paita catijcunami, na alicunata ruranlla.

Paicunaca, pandatalla ruraj, jatun na alitalla rurajcunami.

6Imatapash na yachaj, juizu illaj gentecunalla,

¿chashnachu Mandaj Diosman tigrachinguichi?

¿Nachu Paica cangunata viñachishca Taitayari?

Paimari, cangunata rurashpa, causaitapash cararca.

7Punda huatacunata yarichiyari.

Ashtaca miraicuna yalishca huatacunata yarichiyari.

Cangunapaj taitacunata tapuichiyari.

Paicunami cangunaman villanga.

Rucu taitacunata tapuichilla.

Paicunapash parlangallami.

8Jahua pacha Diosca,

llactacunata carashpa, huañuna aichayuj runacunaman chaupishpa cujushpaca,

Israelcuna mashnacuna cashcashna, mujungunata churashpami curca.

9Pai agllashca gentecunaca, Mandaj Diospajllami.

Jacobpaj miraicunatami, Paipajlla cachun shicanyachishca.

10Jichushca pambapimi, paicunataca tarirca.

Chaquishca manllanayai, chulunlla pambapimi tarirca.

Paicunataca, ugllashpa apamushpa aliguta yachachishpami,

Paipaj ñavigutashna huacaichijurca.

11Paica, tazinpi tiyajuj huahuacunapaj jahuata muyushpa,

chai huahuacunata jatarinata yachachij jatun angashnami.

Paipaj alasta chutashpa japishpami, Paipaj alas jahuapi apajun.

12Mandaj Diosllami, cangunataca pushamurca.

Na rijsishca shuj diosca na pushamurcachu.

13Jahua llactacunaman pushajpimi, chai pambacunapi fucushcacunata micunajurca.

Jatun rumimanda balun mishquita ufiachunmi cararca,

Shinallata, rumilla shinlli alpamanda aceitetapashmi cararca.

14Huagrapaj leche viratapash, llamapaj lechetapash, maltun llamapaj viratapash,

Basán urcumanda jari llamacunahuanmi cararca.

Shinallata jari chivocunata, ashtahuan ali trigotapashmi cararca.

Uvacunamanda puca vinotapashmi ufiarcanguichi.

15Ashtahuangarin, Jesurún virayashpaca, napacha cazujmi tucurca.

(Racu racu tucushpami ninanda virayarca).

Shina tucushpami, paita ruraj Taita Diostaca jichurca.

Shinallata, paita quishpichij jatun Rumishna Diostami, yangapi churarca.

16Shuj rurashcalla dioscunata catishpami, ninandapacha fiñachinajurca.

Millanayaicunata rurashpami, ninanda fiñachinajurca.

17Taita Diosman animalcunata cushpa huañuchingapa randica,

ayacunaman carashpami huañuchinajurca.

Na rijsishca, shuj llactamanda rurashcalla dioscunamanmi caranajurca.

Cangunapaj ñaupa taitacunapash napacha alicachishca rurashcalla dioscunamanmi caranajurca.

18Canda viñachij jatun Rumishna Diostami cungarcangui.

Canda ruraj Taita Diostami cungarcangui.

19Mandaj Diosca chaita ricushpami, ninandapacha fiñarirca.

Paipaj churicuna, Paipaj ushicuna yangapi churashcamandami, Paica chashna fiñarirca.

20Paica cashnami nirca:

‘Paicunataca, na ricushpa huacaichishachu.

Paicuna imashna tucurijtallami ricusha.

Paicunaca, jatun na alitalla ruraj miraicuna, na cazujcuna cajpimi chashna rurasha.

21Napash Taita Dios cajtara mañashpami, Ñucataca ninandapacha fiñachinajurca.

Paicunapaj rurashcalla dioscunahuanmi, Ñucataca ninandapacha fiñachinajurca.

Ñucapashmi, paicunataca shuj gentecunahuan llaquichishpa, ninandapacha fiñachisha.

Paicunataca, juizu illaj runacunahuan llaquichishpami, ninanda fiñachisha.

22Nina japirinshnami, ninandapacha fiñarishcani.

Chashna fiñarishpami, Seol ucu ucucaman rupachisha.

Cai pachatapash, caipi imalla fucushcatapash langajshnami tucuchisha.

Urcucunatapash, ucu sapimandami rupachisha.

23Ñucami paicunamanga, ninan llaquicunata mirachisha.

Ñuca flechacunahuanmi, paicunataca huañuchishpa tucuchisha.

24Yarjaimandami tucurinajunga,

shinallata, ninanda rupachij calenturahuan, nanachij ungüicunahuanmi tucuchi tucunga.

Millai animalcuna micushpa tucuchinajuchunmi, paicunapajman cachamusha.

Cai pachapi tiyaj culebracunapaj venenohuanmi tucuchisha.

25Canllacunapica, espadahuanmi huañuchishpa tucuchinajunga.

Huasi ucucunapica, ninan manllaihuanmi tiyanajunga.

Chairalla viñai huambratapash, jarihuan nara tacarishca cuitsatapash,

chuchujuj huahuatapash, yuraj ajcha rucutapashmi huañuchi tucunga.

26Ñucaca, caita chaitami calpachisha nircanimi.

Cai pachapi causajcunamandaca, paicunata ama ashtahuan yarinajuchunmi tucuchisha nircanimi.

27Paicunata fiñajcuna, rimashpa pingaichijta uyangapa na munashpami, na llaquichircani.

Paicunata na ricunayachij runacunaca, cashnami ninajunman carca:

Tucui caicunataca, ninan ushaita charij ñucanchi maquihuanmi, chashna rurashcanchi.

Mandaj Diosca, na chashna rurashcachu ninajunmanmi carca’ nircami.

28Israelcunaca, ali yuyaicunata cujpipash, na chasquingapa munaj gentecunami.

Paicunapica, ali yuyaica napacha tiyanllu.

29¡Caita ali yachangapaca, alipacha yachajushcacuna cashpachari ali canman!

Shina cashpaca, ¡paicuna imashna tucurinatapash yachanmanllari!

30Cambaj Jatun Rumishna Mandaj Dios na jatushca cajpi, paicunapaj maquipi na churashca cajpica,

¿Imashnashi shujlla runa, huaranga runacunata huañuchingapa catinman carca?

¿Imashnashi ishcai runalla, chunga huaranga runacunata calpachi ushanman carca?

31Ashtahuangarin, paicunapaj rumi dioscunaca,

ñucanchipaj jatun Rumishna Dioshuanga napacha pactangachu.

Chaitaca, ñucanchita fiñajcunapash ricushpa villangallami.

32Paicunapaj uva chagracunaca, Sodoma pueblomanda uvacunashnami.

Paicunapaj pambacunaca, Gomorra pueblopaj pambacunashnami.

Paicunapaj uvacunaca, tujsishpa nanachij, jayaj uva malquicunami.

33Paicunapaj vinoca, culebrapaj venenoshnami.

Ninanda tujsishpa nanachij millai culebra canishcashnami.

34Taita Diosca: ‘Chaitaca, ¿nachu, aligutapacha alichinapi churashcani?

Ñucapaj ashtahuan ninanda alichishcacunahuan ¿nachu churashcani?

35Ñucami randi llaquichitapash, cushichitapash ushani.

Ima punlla cashpapash urmangami.

Paicunapaj llaquichi tucunaca ñami chayamujun.

Paicunata imata Ñuca imata ruranapash ñami caipi’ nircami.

36Mandaj Diosmi, pai agllashca gentecunataca ninanda llaquichinga.

Shina cashpapash, Paipajta rurajcunata ninanda juyaimandami llaquichinataca saquinga.

Tucuicuna, ushai illaj saquirinajujpi, gañanguna cashpa, na gañanguna cashpapash ña tucurinajujpimi chashna tucunga.

37Paica cashnami nijunga:

‘¿Paicunapaj dioscunaca, maipitayari?

¿Paicunata rumishna shinllichij diosca, maipitayari?

38Chai dioscunaman cushca animalcunapaj viratami micunajun carca.

Chai dioscunaman cushpa talina vinotami ufianajun carca.

Paicuna, cangunata yanapashpa, mitsachun richiyari.

39Ñucallami Mandaj Dios cani.

Shuj dioscunaca na tiyanllu.

Ñucami causaitapash quichuni, Ñucallatami causaitapash carani.

Ñucami chugrichini, Ñucallatami alichini.

Ñuca maquimandaca pipash na cacharichi ushangachu.

40Jahua pachaman maquita vichai churashpami cashna nisha:

Ñucami causaita causajuni.

41Ñuca espadata punchapamba afilashpami, Ñuca ushaihuan llaquichisha.

Ñucata fiñajcunataca randimi llaquichisha.

Ñucata na ricunayachijcunataca chashnallatami llaquichisha.

42Ñuca flechacunaca, yahuarsapami tucunga.

Ñuca espadaca, aichatashnami cuchunga.

Prezu apai tucushcacunata, huañuchijpimi, chai yahuarhuan chashna tucunga.

Ñucata fiñaj ajchasapa runacunapaj umapimi, chashna tucunga’ ningami.

43Tucuicunami, Dios agllashca gentecunahuan cushijuna canguichi.

Paipajta rurajcunapaj yahuarta jichashcamandaca, Paimi chashnallata llaquichinga.

Paita fiñajcunataca, chashnallatami randi llaquichinga.

Pai agllashcacuna causanajuj llactamanda,

juchata anchuchingapami chashna ruranga” nijurcami.

44Moisesca, Nun shuti runapaj churi Josuendi shamushpami, cai candanapi tucuilla shimicunataca, Israelcuna uyajta juyaillaguta rimajurca.

45Chai tucui shimicunatami Moisesca, tucuilla Israelcunaman chashna juyailla rimashpa tucuchirca.

46Chai jipami, paicunataca cashna nirca:

“Cunan ñuca yachachishca tucuilla shimicunataca, cangunapaj shungupi alichishpa pactachinguichi. Shinallata, cangunapaj huahuacunatapash, cai tucui mandashca shimicunataca, aligutapacha pactachishpa causanajuchunmi mandana canguichi.

47Cai mandashca shimicunaca na yangachu. Ashtahuangarin, causaita caraj shimicuna cashcamandami, cai mandashcataca pactachina canguichi. Jordán yacuta chimbashpa, cangunapaj alpata japishpa, tucuita pactachishpa causanajushpami unaicaman causanguichi” nircami.

Canaán llactata carumandalla ricuchunmi Moisestaca saquishca

48Chai punllallatami Mandaj Diosca, Moisestaca cashna nijurca:

49“Abarim shuti urcucunapi tiyaj Nebo shuti urcuman vichai rilla. Chai urcuca Jericó pueblo chimbapura, Moab llactapimi. Chai urcumandami, Israelcunapaj cachun Ñuca carashca Canaán llactataca ricungui.

50Chai urcuman vichai rishpaca, chaipi huañushpami, cambaj ayllucunahuan tandanajugringui. Shinallatami, cambaj huauqui Aaronbash, Hor shuti urcupi huañushpa, paipaj ayllucunahuan tandanajurca.

51Zin shuti jichushca pambapi, Cades shuti pushtupi, Meriba yacupi cashpami juchata rurarcanguichi. Chaipica, Israelcunapaj chaupipi jucha illaj Dios cajtapash na ricuchishpami, fiñachishpa juchata rurarcanguichi.

52Chaimandami, chai llactataca carumandalla ricushpa, Israelcunaman Ñuca carashca llactamanga na yaicui ushangui” nijurcami.