1Profeta Habacuc runaca, Sigionot shuti tonopi candashpami, cashna nishpa Diosta mañarca:
2Mandaj Dioslla,
Cambaj Shimita uyashpaca, ninandami manllarircani.
Mandaj Dioslla,
cunan punllacunapipash, punda huatacunashnallata juyaillacunata, rurapailla.
Chai alicunataca, cunan huatacunapash, cutin rurashpa ricuchipailla.
Can fiñarishca cashpapash, llaquij Dios cashcataca ama cungapanguichu.
3Taita Diosca, Temán shuti llactamandami shamunga.
Jucha illaj Diosca, Parán shuti urcumandami shamunga. Selah
Jahua pachapica, Paipaj ninan ushaimi punchapamba ricurirca.
Cai pachapica, tucuicunami Paitaca ninanda alicachinajurca.
4Paipaj punchapamba ninan ushaica, michashnami ricurirca.
Paipaj maquimandaca, punchapamba rayushnami llujshijurca.
Chashnami Paipaj ninan ushaitaca, pacalla tiyajushcamanda ricuchirca.
5Paipaj ñaupajpica, huañuchij ungüimi ricurirca.
Paipaj chaqui purishcapica, nina rupajunshnami ungüicunaca ricurirca.
6Paica jatarishpami, cai pachataca tupui callarirca.
Paica ricushpallami gentecunataca manllachirca.
Punda huatacunamanda tiyaj urcucunapashmi ñuturirca.
Punda huatacunamanda tiyaj lomacunapash urmarcami.
Paica, causaita causaicamanmi Paipaj ñanda purijun.
7Cusán shuti llactapi causaj gentecunaca, ninan llaquihuan cajtami ricurcani.
Madián shuti llactapi causaj gentecunapash, ninan manllaihuan cajtami ricurcani.
8Mandaj Dioslla, ¿jatun yacucunahuanchu fiñarircangui?
¿Canga, jatun yacucunatachu fiñarcangui?
¿Cambaj caballocunapi, carretacunapi tiyarishpaca, mama cuchata fiñashpachu chashna rurarcangui?
9Cambaj macanajuna arcohuanmi, tucuicunata llaquichircangui.
Ayllucunaman juramentushcatami, pactachijurcangui. Selah
Pambacunatapash, jatun yacucunata cachashpami huaicuyachircangui.
10Canda ricushpaca, urcucunapashmi manllarirca.
Yacupash ninanda jundashpami jicharijurca.
Manllanayai ucu yacucunapash caparishpami jatarirca.
11Indipash, lunapash, chai pushtupimi shayarirca.
Cambaj flechacuna punchayachijpi, ninan punchapamba tucsishpa huañuchina jirru punchayachijpimi chashna tucurca.
12Canga, ninanda fiñarishpami cai pachataca sarurcangui.
Ninandapacha fiñarishpami, shuj llactacunapi causajcunataca tucuchircangui.
13Can agllashca gentecunatapash, Can agllashca jatun mandajtapash, yanapangapami llujshircangui.
Canda na manllaj runataca, llaquichishpami tucuchircangui.
Chai llactacunatapash callari rumicuna ricuringacamanmi urmachishpa tucuchircangui. Selah
14Paicunapaj macanajuj runacunatapash, paicunapaj flechacunahuanllatami huañuchircangui.
Paicunaca, ninan huairahuan tamiashnami, caiman chaiman cachangapa yaicumurca.
Paicunaca, pacalla yaicushpa na imata rurai ushajpi tucuchishun yashpami shamunajurca.
15Canga caballopi tiyarishpami mama cucha yacu jahuataca purijurcangui.
Ninanda jatarijuj yacu jahuatami purijurcangui.
16Chaita uyashpami, ninandapacha manllarircani.
Rimajta uyashpaca, ñuca shimipashmi chujchurca.
Ñuca tullucunapash faquirinshna tucushpami, ñucaca manllaihuan chujchujurcani.
Ñucanchita ninanda llaquichij, chai runacunata Can llaquichina punllatami shuyasha.
17Higo yuracuna na sisashpa fucujpipash,
uva yuracuna na fucujpipash,
olivo quirucuna na fucujpipash,
chagracunapi imapash na fucujpipash,
pambapi llamacuna tucurijpipash,
huagracuna corralpi illajpipash,
18ñucaca, Mandaj Diosta cushijuihuan alicachijushallami.
Ñucaca, ñucata quishpichij Taita Diospimi cushijuita charisha.
19Mandaj Jatun Diosmi, ñucamanga ushaita cushpa shinllichihuan.
Paimi, ñucataca, tarugashna ucha calpana ushaita caran.
Ali pushtucunata purichunmi, ñucataca pushahuan.
Cuerdayuj taquinacunahuan taquishpa, candajcunata mandaj candachinami.
Who We AreWhat We EelieveWhat We Do
2025 by iamachristian.org,Inc All rights reserved.
