JOEL 1 - Quichua Imbabura 2016

Langosta jurucuna, granocunata micushpa tucuchishcamanda

1Mandaj Diosca, Petuel shuti runapaj churi Joel runamanmi, cashna nishpa villarca:

2“Mandaj ancianocunapash, cai llactapi tucui causajcunapash, caita ali uyaichi:

¿Canguna causajui punllacunapi, na cashpaca cangunapaj ñaupa taitacuna causajui punllacunapica,

cashna llaquicuna tiyashcachu?

3Caicunataca, cangunapaj huahuacunamanmi villana canguichi.

Paicunapash, paicunapaj huahuacunamanmi villanajunga.

Chai huahuacunapash, paicunapaj miraicunamanmi villanajunga.

4Oruga jurucuna na micushcataca, saltón jurucunami micurca.

Saltón jurucuna na micushcataca, revoltón jurucunami micurca.

Revoltón jurucuna na micushcataca, langostacunami tucuchirca.

5Machashpalla causajcuna, rijcharishpa huacaichiyari.

Vinota ufiajcuna, llullu vino tucurishcamandaca, ninanda huacaichiyari.

Vinotaca, cangunapaj shimimandami quichushca.

6Maitapash na yupai ushanalla, ninan shinlli runacunami, ñuca llactaman vichai shamurca.

Paicunapaj ñaupaman quirucunapash, juchu quirucunapash, leonbaj quirucunashnami.

7Ñuca uva chagracunata tucuchishpami,

ñuca higo malquicunatapash, faquishpa saquirca.

Tucuilla lluchushpami, malquicunatapash, yurajlla caspicunatalla saquishca.

8Cusa tucuna huañushcamanda chairalla viñai cuitsa huacanshna cañamuta churajushpa, huacayari.

9Mandaj Diospaj huasimandaca, ofrendapash, talina vinopashmi chingarca.

Chaimandami, Mandaj Diospajta ruraj sacerdotecunaca, llaquirishpa huacanajurca.

10Pambacunapash, jichushcami saquirirca.

Trigopash tucurijpi, llullu vinopash chaquijpi, aceitepash chingajpimi, pambacunaca llaquillapacha saquirirca.

11Alpapi tarpujcunapash, ninanda llaquirichiyari.

Uvata tarpujcunapash, llaquirishpa huacaichiyari.

Trigomanda, cebadamandapash huacaichiyari.

Pambapi grano tandachinaca, tucuillami chingashca.

12Uva chagracunapash chaquishcami.

Higo yuracunapash tucurishcami.

Granada yuracuna, palmera yuracuna, manzana yuracunapashmi chaquishca.

Pambapi tucui yuracunapash chaquijpimi, gentecunapaj cushijunaca tucurishca.

13Altarpi rupachishpa, ñuca Taita Diospajta ruraj sacerdotecunapash, cañamuta churajushpa huacaichiyari.

Cangunapaj Taita Diospaj huasimandaca, granota, talina vinota caranapash tucurishcami.

14Na micushpa tandanajuchun villaichiyari.

Ancianocunatapash, cai llactapi causajcunatapash,

cangunata Mandaj Taita Diospaj huasiman tandachishpa,

Mandaj Diosta caparishpa mañaichiyari.

15¡Aij, Mandaj Dios shamuna punllapash ñami pactamujun!

Tucui ushaita charij Dios ninanda llaquichina punllami, ña chayamujun.

16¿Nachu ñucanchi micunatapash, ñucanchi Taita Diospaj huasipi ninanda cushijunatapash, ñucanchi ricujta quichurca?

17Granocunaca, alpa ucupillatami ismushpa tucurirca.

Trigo chaquishpa tucurishcamandami, granota tandachina ucucunapash jichushca saquirirca.

Granota alichina ucucunapash, tucuchi tucurcami.

18¡Animalcunaca llaquinayaitami huacanajurca!

¡Huagracunaca, jihua na tiyajpimi, caita chaita mascashpa purinajurca!

Shinallata ashtaca llamacunapash, yarjaimandami huañunajurca” nijurcami.

19Mandaj Dioslla, Candallami mañasha.

Jichushca pambapi viñashca jihuacunataca, ninami tucuchirca.

Pambapi yuracunatapash, rupajuj ninami tucuchirca.

20Sacha animalcunapash, huacashpami Diosta mañanajun.

Rijuj larca yacucuna chaquishca cajpimi huacanajun.

Pambacunapi jihuacunatapash, ninami tucuilla rupachirca.