2 CRÓNICAS 34 - Quichua Imbabura 2016

Josías runa mandajushcamanda(2 Rey. 22:1-2)

1Josías runaca, pusaj huatata charishpa, mandai callarishpami, quimsa chunga shuj huatata Jerusalenbi mandajurca.

2Mandaj Diospaj ñaupajpica, alitallami tucuita rurarca. Paipaj ñaupa taita David rurashcashnami, tucuita alitalla rurashpa causarca.

Josías runa, mushuj mandashcacunata churashcamanda(2 Rey. 23:4-20)

3Josías runaca, huambrara cashpapash, pusaj huatata ña mandajushpami, paipaj ñaupa taita Davidpaj Taita Diosta mascai callarirca. Paica, chunga ishcai huatata mandajushpami, Judá llactapi, Jerusalenbi tiyaj altarcunatapash, Asera shuti huarmi diosman rijchajcunatapash, rurashcalla dioscunatapash, yacuyachishpa rurashca dioscunatapash tucuillata anchuchi callarirca.

4Baal shuti dioscunapaj altarcunatapash, Josiaspaj ñaupajpi urmachirca. Shinallata, jahuapi churashca, indiman rijchajcunatapash, Asera shuti huarmi diosman rijchajcunatapash, rurashcalla dioscunatapash, yacuyachishpa rurashca dioscunatapashmi ñuturca. Chai ñutushcacunataca, chai dioscunaman animalcunata cushpa rupachijcunata pambashca jahuapimi shitachirca.

5Shinallata, sacerdotecunapaj tullucunatapash, paicunapaj altarcunapillatami rupachirca. Shinami Judá llactatapash, Jerusalendapash, mapa illajta saquirca.

6Manasés, Efraín, Simeón, Neftalí ayllucunapaj pueblocunapipash, chai muyundicunapi tiyaj jichushca pushtucunapipashmi, chashnallata rurajurca.

7Tucui Israel llactapi altarcunata, Asera shuti huarmi diosman rijchajcunata, rurashcalla dioscunata, tucuillata faquishpa ñutushpa tucuchishca jipami, Jerusalenman tigrarca.

Dios mandashpa quilcachishca librota tarishcamanda(2 Rey. 22:3—23:3)

8Josías shuti runaca, chunga pusaj huatata mandajushpami, chai llactatapash, Diospaj huasitapash mapa illajta saquirca. Chai jipami, Azalía runapaj churi Safán shuti runata, pueblopi mandaj Maasías runata, paipaj randi rimaj Joacaz runapaj churi Joa runatapash, paita Mandaj Taita Diospaj huasita alichinajuchun cacharca.

9Paicunaca, sacerdotecunata mandaj Hilcías shuti runapajman shamushpami, Mandaj Diospaj huasiman apamushca culquita cunajurca. Chai culquitaca, Diospaj huasi pungupi ricuj levitacunami Manasespaj, Efrainbaj ayllucuna, huaquin saquirishca Israelcuna, Judapaj, Benjaminbaj ayllucuna, Jerusalenbi causajcuna cujpi tandachishca carca.

10Chai culquitaca, Mandaj Diospaj huasita alichijcunata ricujcunamanmi cunajurca. Paicunami, Diospaj huasita alichishpa imatalla rurajcunaman cunajurca. Paicunaca, Mandaj Diospaj huasita alichishpa, punda imashna cashcata rurashpa saquingapami, chashna ruranajurca.

11Caspita llagllashpa rurajcunaman, rumita faquijcunamanmi, caspicunata, rumicunata randichun cunajurca. Judá llactata jatun mandajcuna urmachishca huasicunata alichingapa shayachina caspicunata, chai huasicunata quilpashpa churana tablacunata randichunmi, culquita cunajurca.

12Huasita alichij chai runacunaca, tucuita rurashpami pactachinajurca. Imata cashpapash uchalla ruranajuchun ricushpa mandajcunaca, Merari shuti runapaj miraipura Jahat shuti, Abdías shuti levitacunaman, Coat shuti runapaj miraipura, Zacarías shuti, Mesulam shuti levitacunami carca. Paicunaca, taquinata alipacha yachajcunami carca.

13Paicunallatami, aparishpa apajcunatapash, chaipi tucui imatalla ruranacunatapash, ricushpa mandanajurca. Levitacunallatami, quilcajcuna, mandajcuna, Diospaj huasi pungupi ricujcuna carca.

14Mandaj Diospaj huasiman apamushca culquita, sacerdote Hilcías llujchijushpami, Mandaj Dios, Moisesman mandashpa quilcachishcata tarirca.

15Hilcías runaca, Safán shuti quilcaj runataca: “Dios mandashpa quilcachishcatami, Mandaj Diospaj huasipi tarircani” nishpami, chaitaca paimanllata curca.

16Safán shuti runaca, chai quilcashcata jatun mandajpajman apamushpami, cashna nijurca:

“Cambajta rurajcunaca, tucui imatalla rurachun mandashcatami aliguta pactachinajun.

17Mandaj Diospaj huasipi tiyaj culquita tandachishpaca, chaipi ricushpa mandajcunapaj maquipi, chai huasita alichijcunapaj maquipimi cushca” nirca.

18Shina nishca jipaca, Safán shuti quilcaj runaca, jatun mandajtaca:

“Hilcías shuti sacerdotemi, shuj quilcashcata cuhuarca” nishpami, chaitaca jatun mandajpaj ñaupajpi quilca catirca.

19Mandashcapi tiyajuj shimicunata uyashcandimi, jatun mandajca pai churajushcacunata liquirca.

20Chai jipami Hilcías shuti runatapash, Safán shuti runapaj churi Ahicam runatapash, Micaías runapaj churi Abdón shuti runatapash, Safán shuti quilcaj runatapash, jatun mandajpajta ruraj Asaías runatapash cashna nishpa mandarca:

21“Chai quilcashcapi, ima nijujta yachangapaca, ñucamandapash, Israel llactapi, Judá llactapi huaquin saquirishca gentecunamandapash, Mandaj Diosta tapugrichi. Mandaj Dios, ñucanchihuan ninandapacha fiñarishca cajpica jatun manllanayaimari. Ñucanchi ñaupa taitacunami, Mandaj Diospaj Shimita na cazushpa quilcashca cai libropi tiyajushcataca na pactachishca” nirca.

22Shina nijpimi Hilcías shuti runapash, jatun mandajpajta rurajcunapash, Hulda shuti profeta huarmipajman rirca. Paica, sacerdotecunapaj churajunata ricuj, Ticva shuti runapaj churi, Salum shuti runapaj huarmimi carca. Ticva runaca, Harhas shuti runapaj churimi carca. Chai huarmica, Jerusalenbillata uchilla pueblopi causajujpi, chaiman shamushpami tucuita villanajurca.

23Shina villajpimi chai huarmica cashna nijurca:

“Israelcunata Mandaj Taita Diosca, cashnami nin: ‘Ñucapajman cachamuj runataca, Mandaj Diosca cashnami nin:

24Judá llactata jatun mandajpaj ñaupajpi quilca catishca libropi tucui llaquichinata villajushcashnami, cai llactamambash, cai llactapi causajcunamambash jatun llaquita cachamugrini.

25Ñucamanda anchurishpa, rurashcalla dioscunaman animalcunata cushpa huañuchishpa, jatun na alita rurashpa ñucata ninandapacha fiñachishcamandami, jatun llaquita cachamugrini. Ñucaca, ninandapacha fiñarishpami, cai llactamanga jatun llaquicunata cachamugrini’ ninmi

26Ashtahuangarin Mandaj Dios, ñucata tapuchun cachamushca, Judá llactata jatun mandajtaca, cashna ninguichi: Israelcunata Mandaj Taita Diosca, cashnami nin: ‘Canga, chai quilcashcapi imatalla nijujtaca alimi uyarcangui.

27Cai llactatapash, cai llactapi causajcunatapash, llaquichina cajta uyashpami, cambaj shungupi nanarishpa, ñuca ñaupajpi pingai tucushpa urai cumurircangui. Shinallata, cambaj churajushcatapash liquishpa, ñuca ñaupajpi huacajpimi, ñucapash uyarcani ninmi Mandaj Diosca.

28Candaca, cambaj ñaupa taitacunahuan tandachijpimi, ima llaquipash illaj aliguta pambai tucungui. Canga, cai llactata, cai llactapi causajcunata ñuca llaquichijtaca, na ricunguichu’ ninmi nigrichi” nijurcami.

Shina nijpimi, chai runacunaca, jatun mandajman tucuita villangapa tigranajurca.

29Chaita villajpimi jatun mandajca, Judá llactamanda, Jerusalenmanda ancianocuna tandanajuchun mandarca.

30Chai jipami jatun mandajca, Mandaj Diospaj huasiman vichai rirca. Paihuanga, Judá llactamanda jaricunapash, Jerusalenbi causajcunapash, sacerdotecunapash, levitacunapash, tucui gentecunapashmi, uchillamanda callarishpa, rucucaman rinajurca. Chaipimi, Dioshuan ari ninajushpa quilcashcapi, imatalla nijujta tucuicunapaj ñaupajpi quilca catirca. Chaitaca, Mandaj Diospaj huasipimi tarishca carca.

31Jatun mandajca, chai pushtupi shayajushpallatami, Mandaj Diosta catingapa, pai mandashcacunata cazungapa, mandashpa quilcachishca tucui shimicunata cazungapa, Mandaj Diospaj ñaupajpi ari nijurca. Dioshuan ari ninajushpa quilcashca libropi imatalla nijushcataca tucui shunguhuan, tucui almahuan pactachingapami ari nijurca.

32Jerusalenbi causajcunatapash, Benjamín ayllucunatapashmi, chai mandashcacunata cazuchun ari nichirca. Jerusalenbi causajcunaca, paicunapaj Taita Dioshuan ari ninajushcashnami tucuita pactachinajurca.

33Josías runaca, tucui na alicunata, Israel llactamanda anchuchishpami, Israel llactapi causajcunataca, paicunata Mandaj Taita Diospajta ruranajuchun mandarca. Pai causajui huatacunapica, paicunapaj ñaupa taitacunata Mandaj Taita Diostaca, na saquishpami catinajurca.