ÉXODO 8 - Quichua Imbabura 2016

Sapocunahuan llaquichishcamanda

1Chai jipami Mandaj Diosca, Moisestaca cashna nirca:

“Faraonbaj ñaupajman rishpa cashna ningui: ‘Mandaj Diosca cashnami nin: Ñuca agllashca gentecuna Ñucata alicachingapa richun saqui.

2Paicunata na richun saquijpica, cambaj tucuilla llactatami sapocuna jundashpa llaquichinga.

3Jatun yacumanda sapocuna llujshishpami, cambaj huasiman, cambaj puñuj ucuman yaicushpa, cama jahuapi purinajunga. Shinallata, canda cati mandajcunapaj huasicunaman, cambaj hornocunaman, tandata masana jatun bateacunamanmi yaicunajunga.

4Shinallata cambaj jahuacunapi, tucui gentecunapaj jahuacunapi, cambaj cati mandajcunapaj jahuacunapimi sapocunaca purinajunga’ ninmi ningui” nircami.

5Mandaj Diosca, Moisestaca cashnatapashmi nirca:

“Aarondaca cashna ningui: ‘Jatun yacupi, larca yacucunapi, cuchayashca yacucunapi, cambaj vara caspita japishpa, cambaj maquita chutangui. Cai Egipto llactaman sapocuna llujshimuchunmi, chashna rurana cangui’ ningui” nircami.

6Shina nijpimi Aaronga, Egiptopi tiyaj yacucunaman paipaj maquita chutarca. Shina rurajpimi sapocuna llujshishpa, Egipto llactapica jundanajurca.

7Brujucunapash, paicunapaj yachajushcahuanmi chashnallata ruranajurca. Shina rurajpimi, Egipto llactapica sapocuna jundanajurca.

8Shina cajpimi Faraonga, Moisestapash, Aarondapash cayashpa cashna nirca:

“Ñucamandapash, ñuca gentecunamandapash, sapocuna anchurichun, cangunapaj Mandaj Diosta mañaichi. Chaipaj jipaca, cangunapaj gentecunataca, cangunapaj Mandaj Diosman animalcunata cushpa huañuchingapa richun saquishallami” nirca.

9Shina nijpimi Moisesca, Faraondaca cashna nirca:

“Canmandapash, cambaj cati mandajcunamandapash, cai llactapi causajcunamandapash, ima punlla mañana cajpipash, canllata villahuailla. Canmandapash, cambaj huasicunamandapash, sapocuna anchurishpa jatun yacucunapilla tiyachunmi mañasha” nircami.

10Shina nijpimi, Faraonga:

“Caya mañangui” nirca.

Shina nijpimi Moisesca:

“Ñucanchita Mandaj Taita Diosca jatunmi. Paishnaca pipash na tiyashcata, can yachachunmi, can nishcashnallata mañasha nirca.

11Shina mañajpimi sapocunaca, canmandapash, cambaj huasicunamandapash, cambaj cati mandajpaj huasicunamandapash, cambaj gentecunamandapash anchurishpa, jatun yacupilla tiyanga” nirca.

12Shina nishpami Moisespash, Aaronbash, Faraonbaj ñaupajmanda llujshishpa rirca. Shina rishpami Moisesca: “Faraonbajman cachamushca sapocunata anchuchipai” nishpa, Mandaj Diostaca ninanda mañarca.

13Mandaj Diosta, Moisés mañashcashnami, huasicunapi, canllacunapi, pambacunapi tiyashca sapocunaca huañushpa tucurirca.

14Chai huañushca sapocunata tandachinajujpimi, chai llactapica millanayaita ashnajurca.

15Llaquicuna ñana tiyajta ricushpami, Faraonga shinlli shungu tucushpa, Mandaj Dios nishcashna, paicunataca na uyanayachirca.

Piliscunahuan llaquichishcamanda

16Shinamandami Mandaj Diosca, Moisesta cashna nirca:

“Aarondaca cashna ningui: ‘Tucuilla Egipto llactapi piliscuna jundachun, cambaj vara caspihuan chai llacta alpapi huajtai’ ningui” nircami.

17Shina nijpimi paicunaca, chashna ruranajurca. Aarón, paipaj maquipi charijuj vara caspita alpapi huajtajpimi, runacunapipash, animalcunapipash pilis jundarca. Tucui Egipto llactapimi, ñutu alpaca pilisman tigrarca.

18Brujucunapash, paicuna yachashcahuan, piliscunata llujchingapa, chashnallata ruranajushpapash, na usharcachu. Piliscunaca, gentecunapipash, animalcunapipash ninandami jundarca.

19Shina cajpimi brujucunaca:

“Caitaca, Taita Diospaj ushaihuanmari chashna rurajun” nishpa, Faraonman villanajurca.

Ashtahuangarin, Mandaj Dios imashna nishcashnallata, Faraonbaj shungu shinlliyashpami, na uyanayachirca.

Chuspicunahuan llaquichishcamanda

20Mandaj Diosca, Moisestaca cashnami nirca:

“Caya tutamandata jatarishpa, Faraonbaj ñaupajman ringui. Paica Nilo yacumanmi llujshijunga. Paitaca: Mandaj Diosca cashnami nin: ‘Ñuca agllashcacunataca, Ñucata alicachingapa richun saqui nijunmi’ ningui.

21Shinallata ‘Ñuca nishcata na uyajpica, cambajman, cambaj cati mandajcunapajman, cambaj gentecunapajman, cambaj huasicunamambashmi, tucui laya chuspicunata cachamusha. Shina cajpimi, Egiptopi causajcunapaj huasicunapipash, maipi paicuna causanajuj llactapipash chuspicuna jundanajunga.

22Chai punllapica, Ñuca agllashca gentecuna causanajuj Gosén shuti llactataca, ima shuj chuspillapash ama tiyachunmi huacaichisha. Cai llactapica, Mandaj Dios cajta tucuicuna yachachunmi, chashna rurasha.

23Ñuca agllashcacunataca na llaquichishpami, cambaj gentecunataca llaquichisha. Cayami chai ricuchinataca ricuchisha’ ninmi ningui” nircami.

24Mandaj Dios chaita pactachijpimi tucui laya chuspicuna, Faraonbaj huasipipash, paipaj cati mandajcunapaj huasicunapipash, tucuilla Egipto llactapi ninanda jundajpimi, chai llactaca ninan llaquita apajurca.

25Shina cajpimi Faraonga, Moisestapash, Aarondapash cayashpa:

“Cai llactapillata, cangunapaj Taita Diosman, animalcunata cushpa huañuchinallami canguichi” nirca.

26Shina nijpimi Moisesca cashna nirca:

“Ñucanchi chashna ruranaca napacha alichu. Mandaj Taita Diosman animalcunata cushpa huañuchijpica, Egiptopi causajcunaca napacha alicachingachu. Ashtahuangarin, Egiptopi causajcunapaj ñaupajpi, paicuna na alicachishcata chashna ruranajujpica, ñucanchitaca rumicunahuanmi huañuchinga.

27Quimsa punllata jichushca pambata rishpami, pai imashna nishcashna ñucanchita Mandaj Taita Diosman, animalcunata cushpa huañuchishun” nircami.

28Shina nijpimi Faraonga:

“Ñucallatami, cangunata Mandaj Taita Diosman, jichushca pambapi animalcunata cushpa huañuchingapa richun saquisha. Shina cajpipash, ashtahuan carumanllami na rina canguichi. Ñucamandapash Diosta mañanami canguichi” nirca.

29Shina nijpimi Moisesca cashna nirca:

“Cambaj ñaupajmanda llujshishpaca, Faraonbajmandapash, cambaj cati mandajcunamandapash, cambaj gentecunamandapash, tucui laya chuspicuna cayapallata anchurichunmi, Mandaj Diostaca mañagrini. Shina cajpipash, Faraón nishcashna, Mandaj Diosman, animalcunata cushpa ñucanchi huañuchigrichun, saquina cajpillami chashna rurasha” nircami.

30Shina nishpami Moisesca, Faraonbaj ñaupajmanda llujshishpa, Mandaj Diosta mañarca.

31Mandaj Diosca, Moisés mañashcashnami pactachirca. Shinami, Faraonmandapash, paita cati mandajcunamandapash, paipaj gentecunamandapash, chai tucuilla chuspicunata anchuchijpi, shujllapash na saquirirca.

32Ashtahuangarin Faraonbaj shunguca cutin shinlliyashpami, Israelcuna richunga na saquirca.