EZEQUIEL 43 - Quichua Imbabura 2016

Mandaj Diospaj ninan ushai, Paipaj huasipi jundashcamanda

1Chai jipami ñucataca, indi llujshimujman tiyajuj punguman pushahuarca.

2Chaipica, indi llujshimujmandami, Israelcunapaj Taita Diospaj ninan ushai shamujuj ricurirca. Pai shamujujca, ashtaca yacu huacashpa shamujujshnami uyarirca. Cai llactaca, Diospaj ninan ushaihuan shamujujpimi, punchapamba carca.

3Chaitaca muscuipishnami ricurcani. Jerusalén pueblota tucuchingapa shamujta, muscuipi ricushcatashnami ricurcani. Quebar shuti yacu manñapi cashpa muscuipishna ricushcashnami ricurcani. Chaita ricushpaca, alpaman chayajtami urai cumurircani.

4Mandaj Diospaj jatun ushaica, indi llujshimujman tiyajuj pungutami, paipaj huasiman yaicurca.

5Ñucataca, Diospaj Espíritu jahuaman apashpami, Diospaj huasi ucu patioman apahuarca. Chaipica, Mandaj Diospaj jatun ushaimi, Paipaj huasi ucupi jundarca.

Diospaj huasipi mandashcacunata pactachinacunamanda

6Diospaj huasimanda ñucata rimajujtami uyarcani. Ñucapaj quimiriapica, shuj runami shayajurca.

7Paimi cashna nihuarca: “Huañuna aichayuj runa. Caipimi, Ñuca mandashpa tiyarinata churana pushtu. Ñucaca caipi samashpami, causaita causaicaman Israelcunahuan causasha. Israelcunapash, paicunapaj jatun mandajcunapash na ashtahuan na alita rurashpa, jucha illaj Ñuca shutita yangapi churangachu. Jatun mandajcuna huañushcatapash, na ashtahuan lomacunapi tiyaj altarcunapi churashpa alicachingachu.

8Paicunaca, paicunapaj huasi pungu umbralcunatapash, Ñuca huasi pungu umbral quimiriapi pilarcunatapash, Ñuca huasi pilar quimiriapi churanajurca. Ñuca huasihuambash, paicunapaj huasihuambash shuj pircata shayachishcallami shicanyachijurca. Chashnami, paicunapash millanayaicunata rurashpa, jucha illaj Ñuca shutita yangapi churarca. Chaimandami, ninanda fiñarishpa paicunataca tucuchircani.

9Shina cajpipash, paicuna na alita ruranatapash saquishpa, jatun mandajcuna huañushcata alicachinatapash saquijpica, paicunapaj chaupipimi causaita causaicaman causasha.

10Huañuna aichayuj runa. Israelcunaman cai huasita imashna tupushpa rurashcata ricuchiyari. Paicuna na alita rurashcata yarishpa, pingai tucuchun.

11Paicuna tucui na alita rurashcamanda pingai tucujpica, cai huasita imashna ruranata aliguta yachachingui. Shinallata, imashnalla huasita ruranata, maitalla llujshinacunata, maitalla yaicunacunata, chai huasi imashna cajta tucuita imashna tupunata, imashna juyaillagu ricurijujta, mandashca tucui shimicunata yachachingui. Cai huasi imashna cajta yarishpa causanajuchun, mandashcacunata pactachishpa, tucui imatalla ruranajuchun, paicunapaj ñaupajpi yachachingui.

12Cai huasipi imatalla ruranacunamanda mandashcapica cashnami nijun: ‘Jatun loma jahuaman alpaca, tucui muyundimi Diospajlla canga’ ninmi. Caica cai Diospajlla huasipi imatalla ruranacunata mandashcami canga.

13Altartaca, imashnami punda tupunahuan rurashcashnami ruranga. (Chai tupunaca, picha chunga ishcai centimetrotami charin). Altarta rurai callaritaca, picha chunga ishcai centimetrotami jahuaman rurashpa, picha chunga ishcai centímetro anchota rurana. Altarta muyundipica, ishcai chunga ishcai chaupi centímetro uchilla pircatami rurana. Chaimi, altarta shayachina canga.

14Altarta shayachinamanda, ucu callaripi tiyajuncaman tupujpica, shuj metro chuscu centímetro jatun, picha chunga ishcai centímetro anchomi canga. Altar tiyajujmanda, pircata rurai callarishca alpacaman tupujpica, ishcai metro, chuscu centimetromi canga. Anchoca, picha chunga ishcai centimetromi canga.

15Chai altarca, ishcai metro chunga centímetro jatunmi carca. Altar jahua manñacunapica, chuscu cachucunami tiyarca.

16Chai altarca largomambash, anchomambash sucta metro, ishcai chunga chuscu centimetrotami charirca. Chuscundimanmi, chashnallata carca.

17Chai altarta charijuj pircata ricujpica, jatunmambash, anchomambash, canchis metro, ishcai chunga pusaj centimetromi carca. Chuscundimanmi, chashnallata tupurca. Chai muyundica, ishcai chunga sucta centímetro ancho llujshirishcami carca. Chai altarta rurashpa callarinapica muyundipimi, picha chunga ishcai centímetro ancho pircata rurashca carca. Shinallata gradacunaca, indi llujshimujmanmi carca” nihuarcami.

18Chai jipaca cashnami nihuarca: “Huañuna aichayuj runa. Mandaj Jatun Diosmi cashna nin: ‘Animalcunata cushpa tucuillata rupachingapapash, yahuarta tsirapachingapapashmi chai Altartara rurashpa tucuchina canga. Chai punllapimi caita rurana cangui.

19Sadoc shuti sacerdotepaj mirai levita sacerdotecunami, Ñucapajta rurangapaca quimirinajunga. Cangunapaj juchacunamanda, paicuna Ñucaman cuchunga, huagracunamanda shuj shicuta agllashpami cuna cangui. Mandaj Jatun Dios Ñucami chashna nini.

20Chai huagra yahuarta japishpaca, altarpi tiyaj chuscundi cachucunapi, altar chaqui chuscundi manñacunapi, altar muyundi jahuacunapipashmi tsirapachina cangui. Shinami ima mapapash illajta saquingui.

21Shina rurashca jipaca, juchamanda cushca maltun jari huagra aichata rupachingui. Diospaj huasipi imashna ruranata mandashcashnami, Ñucapajlla huasi canllaman rupachina cangui.

22Cayandi punllapaca, imapash na tucushca jari chivotami cangunapaj juchamanda Ñucaman cuna cangui. Maltun shicupaj yahuarhuan imashna altarpi tsirapachishpa, mapa illajta saquishcashnami rurana cangui.

23Juchamanda cushca jipaca, imapash na tucushca, maltun shicuta, llamacunamandaca shuj jari llamatami Ñucaman cuna cangui.

24Chaicunataca, Mandaj Dios Ñuca ñaupajman apamujpimi, sacerdotecuna aichapi cachita churashpa, Mandaj Dios Ñucaman cushpa tucuillata rupachinajunga.

25Jari chivota, huarmi huagracunamandaca shuj maltun shicuta, llamacunamandaca imapash na tucushca jari llamatami, juchamanda Ñucaman cushpa canchis punllacaman, punllandi huañuchinajunga.

26Altar jahuapica, canchis punllacaman animalcunata rupachishpami altartaca, mapa illajta ruranajunga. Chashnami, Ñucapajlla cachun ruranajunga.

27Chai canchis punlla cayandi, pusaj punllamanda callarishpaca, sacerdotecunami canguna Ñucaman cushpa tucuilla rupachinacunatapash, Ñucahuan ali cangapa cushcacunatapash rupachinajunga. Shina rurajpimi, cangunataca chasquisha’ ningui” nihuarcami Mandaj Jatun Diosca.