1Abías shuti runa huañushpa, paipaj taitacunahuan tandanajugrijpica, Davidpaj pueblopimi pambarca. Abías runapaj randi, paipaj churi Asa shuti runa mandajujpimi, chai llactapica chunga huatata ima llaquipash illaj causanajurca.
2Asa shuti runaca, Mandaj Diospaj ñaupajpimi, imatapash na pandashpa aligutalla rurajurca.
3Paica, rurashcalla dioscunata yarina altarcunatapash, lomacunapi tiyaj altarcunatapashmi anchuchirca. Imamambash rijchajta rurashca dioscunatapash faquishpami, Asera shuti huarmi diosman rijchajtapash tucuchirca.
4Judá llactapi causajcunataca, paicunapaj ñaupa taitacunapaj Mandaj Diosta cazushpa causachunmi mandarca. Shinallata mandashca shimicunatapash tucuipi pactachinajuchunmi mandarca.
5Ashtahuambash, Judá llactapi tiyaj pueblocunamandaca, lomacunapi tiyanajuj altarcunata, imamambash rijchajta rurashca dioscunataca tucuillami anchuchirca. Pai mandajui punllacunapica, ima llaquipash illajmi aliguta causanajurca.
6Judá llactapica, macanajuicuna na tiyashcamandami jatun pircacunata charij pueblocunata shayachirca. Chai huatacunapica, Mandaj Diosmi paicunamanga ali causaita cararca.
7Chaimandami, Judá llactapi causajcunataca, cashna nirca: “Cai llactaca ñucanchipaj cashcamandami, pueblocunata shayachishpa, ali shinlli torrecunata shayachishpa, pircahuan muyundita rurashpa, pungucunapipash ali jarcana jirrucunata churana canchi. Ñucanchita Mandaj Taita Diosta mascashcamandami, ñucanchi maipi cajpipash juyailla causaiguta carashpa charijun” nircami. Chaicunata, paicuna rurai callarijpica, tucuimi ali llujshirca.
8Asa shuti runaca, macanajuipi jarcarina jirrucunata, tucsishpa huañuchina jirrucunata charij runacunatami charirca. Chai runacunaca, Judá ayllumandaca, quimsa patsaj huaranga, Benjamín ayllumandaca, ishcai patsaj pusaj chunga huaranga runacunami carca. Paicunaca, jarcarina jirrucunahuan, tucsishpa huañuchina jirrucunahuan, macanajunata ali yachaj runacunami carca.
9Paicunahuan macanajungapaca, Etiopía llactata mandaj Zera shuti runami, shuj millón runacunahuan, quimsa patsaj carretacunahuan, Maresa shuti pueblocaman llujshimurca.
10Chaimandami Asa shuti runaca, paicunahuan macanajungapa rishpa, Maresa shuti pueblopi tiyajuj Sefata shuti pugru pambapi macanajui callarirca.
11Chaipimi Asa runaca, Mandaj Taita Diosta caparishpa cashna nishpa mañajurca: “¡Mandaj Taita Dioslla, ninan ushaita charijtapash, na ushaita charijtapash, Canga yanapanguillami! Shina cashcamanda ñucanchitapash yanapahuayari. Ñucanchita Mandaj Taita Dioslla, Can yanapanga yashpami, cai runacunahuanga, Cambaj shutipi macanajuj shamurcanchi. Mandaj Dioslla, Canmi ñucanchi Taita Dios capangui, runacunaca, Canda mishaitaca na ushangachu” nishpami mañarca.
12Asa shuti runapaj ñaupajpipash, Judá llactapi causajcunapaj ñaupajpipash, Etiopía llactamanda macanajuj runacunataca Mandaj Dios mishajpimi, paicunaca pacajushpa calpanajurca.
13Asa shuti runaca, paipaj macanajuj runacunahuan, Gerar shuti pueblocaman catishpami, Etiopía llactamanda runacunataca, tucuillata huañuchishpa tucuchirca. Paicunaca, Mandaj Diospaj ñaupajpipash, macanajuj runacunapaj ñaupajpipash tucuillata huañuchishpami, paicuna imatalla charishcatapash ashtacatapacha apanajurca.
14Gerar shuti pueblo muyundipi causajcunamanga, Mandaj Diosllatami jatun manllaita cachamurca. Shina cajpimi, chai pueblocunaman macanajungapa yaicushpa ima tiyashcatapash, ashtacatapacha quichushpa apanajurca.
15Shinallata, animalcuna shayanajuj ucuman yaicushpami, ashtaca llamacunata, camellocunata apashpa Jerusalenman tigranajurca.
Who We AreWhat We EelieveWhat We Do
2025 by iamachristian.org,Inc All rights reserved.
