OSEAS 9 - Quichua Imbabura 2016

Israelcuna na ali tucujpi llaquichinamanda

1Israelcunalla, shuj llactacunapi causanajuj gentecunashnaca,

na fahuashpa ninanda cushijunachu canguichi.

Cangunapaj Taita Diosmanda anchurishpami huainayanshna pandarircanguichi.

Trigota trillana pambacunapi fucushcatapash, na alita rurashcamanda culquita japinshnami chasquishcanguichi.

2Chaimandami trillana pambapica, ima granopash illanga.

Uvata cutana pushtumandaca, llullu vinopash na llujshingachu.

3Efraín aylluca, Mandaj Dios carashca llactapica na saquiringachu.

Ashtahuangarin Egipto llactaman, Asiria llactamanmi tigranga.

Chaipimi, ama micuchun mandashca micunata micunajunga.

4Mandaj Diosman carashpa talina vinocunapash na tiyangachu.

Animalcunata Diosman cushpa huañuchishcatapash, na chasquingachu.

Paicunaca, huañui huasipi micujshnami micunajunga.

Chai micunata tucui micujcunami mapa canga.

Chai micunaca, paicuna micungapallami canga.

Chai micunaca, napacha Mandaj Diospaj huasiman yaicungachu.

5Mandaj Diospaj jatun punllapica,

¿imatashi cangunaca ruranguichi?

6Paicunata llaquichishpa tucuchigrijujpi pacajushpa rijpipash,

Egipto llactapi causajcunami huañuchinga.

Menfis pueblopi causajcunami pambanajunga.

Paicunapaj culquita tandachishca ucupica, tsinicunarami jundanga.

Paicunapaj huasicunapica, cashacunami jundanga.

7Llaquichina punllacunapash chayamurcami.

Paicuna imata japina cashpapash, chaitallata chasquina punllapash pactamurcami.

Chaitaca, Israelcunami ricunga.

Cangunallata, ninandapacha na alicunata rurashcamandami,

profetapash shinlli shungu tucushca.

Diospaj causaj runapash, juizu illajmi tucushca.

8Ñuca Taita Diosca, Efraín ayllupajca tucuita ricushpa shuyanshnami.

Profeta runapash tucui causaipimi, llaquichi tucunalla ñanda purijun.

Chaimandami, paipaj Taita Diospaj huasipipash na ricunayachin.

9Gabaa shuti pueblopi causanajui punllacunashnami, yapatapacha huaglinajurca.

Chashna na alicunata rurashcata yarishpami,

paicunapaj juchamandaca llaquichinga.

10Jichushca pambapi uvata tarinshnami, Israelcunataca tarircani.

Cangunapaj ñaupa taitacunataca, punda fucushca higotashnami ricurcani.

Paicuna pingai tucungapallatami, Ñucamanda anchurishpa, Baal-peor shuti diosta mañanajurca.

Chai diosta paicuna juyashcamandami, millanayachi tucunajurca.

11Efraín ayllu juyailla cashcapash, alasyu animalshnami calpanga.

Chaimandami huahuacunata unguj huarmipash, na tiyanga.

Vijsayu tucushpa huahuata ungunapash, na tiyanga.

12Huahuacunata charishpa, paicuna ña jatun cajpipash, causaita quichushallami.

Paicunata, Ñuca jichushpa saquijpica, ¡aij imachari tucunga!

13Ñuca ricuipica, Efraín aylluca,

Tiro shuti pueblopi causajcunashnami juyailla pushtupi causanajurca.

Shina cashpapash Efraín aylluca,

paicunapaj churicunataca huañuchi tucuchunmi llujchinajunga.

14Mandaj Dioslla,

paicunaman imata cuna cashpapash cupailla.

Paicunaca, huahuata na chari ushaj huarmicuna cachun,

chari ushashpapash, na micunata carai ushanajuchun.

15Paicunaca, Gilgal pueblopimi, tucui na alita ruranajurca.

Chaipimi, na ricunayachi callarircani.

Paicuna jatun na alicunata rurashcamandami, Ñuca huasimanda llujchishpa cachasha.

Paicunataca, na ashtahuan juyashachu.

Paicunata mandajcunapash tucuicunami na cazujcuna.

16Efraín aylluca llaquichi tucushcami.

Quiru sapi illajshnami tucushca.

Chaimandami, imatallapash na chari ushanga.

Huahuacunata tarijpipash, chai juyashca huahuacunataca, Ñucami causaita quichusha.

17Paicunallata na cazushcamandami, ñuca Taita Diosca llujchishpa shitanga.

Chaimandami shuj llactacunapi chingashca purinajunga.