ISAÍAS 59 - Quichua Imbabura 2016

Israelcuna, paicunapaj juchacunata, Diosman villashcamanda

1Mandaj Diosca, cangunata quishpichingapaca, ninan ushaihuanmi shuyajun.

Canguna mañashcata uyangapapash Paimi chapariyajun.

2Ashtahuangarin, canguna juchara rurashcami,

Taita Diosmandaca shicanyachishca.

Cangunapaj juchacunallatami, canguna mañashcata Dios ama uyachun jarcashca.

3Cangunapaj maquihuan huañuchishcamandami maquipipash yahuar, javirishcanguichi.

Cangunapaj maquicunaca, na alitalla rurashcamandami mapayashca.

Cangunapaj shimipash, llullashpami na alitalla rimashca.

4Alitalla ruranata mascajcunaca, pipash na tiyanllu.

Aliguta ricushpa mandaj runapash, na tiyanllu.

Ashtahuangarin, na alitalla yarishpa causashpami, chashna na alitalla rimanajun.

Na ali yuyaicunalla junda cashpami, na alitalla ruranajun.

5Paicunaca, culebra lulungunata ugllanshna,

araña telata ahuanshnami causanajun.

Maijambash chai lulungunata micushpaca, huañungallami.

Chai lulungunata tugyachijpica, culebracunami llujshinga.

6Paicuna chashna rurashpa causashcacunaca, imapapash na alichu canga.

Paicuna tucui imatalla rurashcacunaca, imapapash na alichu.

Imata rurashpapash, na alitallami ruranajun.

Paicunapaj maquihuanga, imatapash llaquitallami ruranajun.

7Paicunapaj chaquihuanga, na alita rurangapallami calpanajun.

Ima na alitapash na rurajcunata huañuchishpa yahuarta jichangapallami, ucha rinajun.

Paicunapaj yuyaipipash, na alita ruranatallami yarinajun.

Maipipash llaquichishpa, tucuchishpallami purinajun.

8Paicunaca, ali causaitaca, na charircachu.

Paicunapaj causaipica, alitalla ruranapash na tiyanllu.

Paicunapaj causaica, napacha alichu.

Maijambash chashna causashpaca, ali causaitaca na charingachu.

9Chaimandami, quishpirinataca na charinchi.

Shinallata, ali causaipash ñucanchipajca na tiyashcachu.

Punllapishna aliguta causangapa shuyanajushpapash, yanapishnami causanchi.

Pacarichun shuyanajushpapash, tutapishnami purinajunchi.

10Ñausacunashnami, patacunapi maquihuan taunarishpalla purinajunchi.

Chaupi punllapash, tutapishnami nitijanajunchi.

Huañushcacunashnami, yana tutapishna causanajunchi.

11Tucuicunami, osocunashna huacanajunchi.

Palomacuna huacanshnami, huacanajunchi.

Ñucanchipajca quishpirinapash illajpimi, na quishpiri ushanchi.

12Cambaj ñaupajpica, juchata rurashpallami causashcanchi.

Ñucanchi na alicuna cajtaca, ñucanchi juchacunallatami ricuchijun.

Ima na alita ruranapash, ñucanchipillatami tiyajun.

Chaimandami, ñucanchi juchayu cashcataca yachanchi.

13Mandaj Diosta na cazushpa fiñachishcata,

ñucanchi Taita Diosmanda anchurishcatapashmi yachanchi.

Shinallata, Diosta na cazushpami, ñucanchi shungupica na alitalla rurana yuyaihuan causashcata yachanchi.

14Chaimandami, ima alita japinatapash na japi ushashpa causanchi.

Llullashpalla causashcamandami, ima alita ruranapash illaj causanchi.

15Tucuicuna llullashpa causanajushpami,

alitalla rurashpa causaj runatara, prezu churarca.

Alitalla ruranata saquishpa causajta ricushpami, Mandaj Diosca ninanda fiñarirca.

16Shina na alita ruranajujpipash, jarcangapaca pipash na tiyajpimi, Diosca ninanda fiñarirca.

Chaimandami, Paipaj ninan ushaihuan quishpichirca.

Shinami Paica, alitalla ruraj cajta ricuchirca.

17Alitalla ruranatami, jirru churajunatashna churajurca.

Quishpirinataca, umapi churajuna jirruta churajushcashnami shayarirca.

Paita na cazushcamanda randi llaquichingapami chashna shayarirca.

Paica, ninanda fiñarishca cashcatami ricuchirca.

18Paita fiñajcunataca, llaquichina cashcamandami llaquichinga.

Paita na ricunayachijcunamanga, imata cuna cashcatallatami cunga.

Mama cucha manñacunapi causajcunamambashmi, imata cuna cashcatallata cunga.

19Shina rurajpimi, Mandaj Dios ninan ushaita charijtaca,

indi llujshimujman causajcunapash, indi huashajunman causajcunapash ninanda manllarinajunga.

Diosta fiñaj runaca, jatun yacushnami shamunga.

Ashtahuangarin, Mandaj Diospaj Espiritumi, ninan ushaihuan jarcanga.

20“Quishpichijca, Jacobpaj miraicuna na alita ruranajushcata saquijpimi,

quishpichingapa Sion puebloman shamunga” ninmi Mandaj Diosca.

21Shinallata, Mandaj Dios Ñucami, paicunahuan pactachingapa ari nigrini:

“Ñuca Espirituca, cangunahuanmi causajun.

Ñuca yachachishca shimicunaca,

cangunapajpash, cangunapaj huahuacunapajpash, paicunapaj huahuacunapajpash,

causaita causaicaman napacha illangachu” nircami Mandaj Diosca.