1Mariapash, Aaronbash, Moisestaca paipaj huarmimandami na alicachishpa rimanajurca. Moisesca, Cus shuti llactamanda huarmihuan cazarashca cajpimi, chashna na alicachinajurca.
2Paitaca cashnami ninajurca: “¿Moisestallachu, Mandaj Diosca, ñucanchihuan rimachun mandashca? ¿Nachu ñucanchitapash rimashcayari?” ninajurcami. Chashna ninajujtami Mandaj Diosca uyarca.
3Tucui cai pachapi causaj gentecunamandaca, Moisesmi tucuita yali ali shunguta charij carca.
4Chai jipami Mandaj Diosca, Moisesta, Aaronda, Mariatapash: “Ñucahuan tuparina jatun carpaman quimsandi llujshichi” nirca.
Shina nijpimi quimsandi rinajurca.
5Chai jipami Mandaj Diosca, pilarshna shayajuj fuyupi uriajushpa, carpa punguman shayarirca. Chaipimi Aarondapash, Mariatapash cayajpi, ishcandi quimirimurca.
6Paica cashnami nirca: “Ñuca rimashcata uyahuaichi. Mandaj Dios Ñucapaj profeta cangunapurapi tiyajpica, muscuipishnami ricurisha. Paihuanga muscuipimi parlasha.
7Ashtahuangarin, Ñucapajta ruraj Moiseshuanga na chashna parlashachu. Paica tucuicunata yali, aliguta rurashpami pactachijun.
8Chaimandami, Ñuca ima nijujta ali yachachun, na muscuipishna parlashpa, paihuanga ñavi ñavi parlasha. Shina cajpimi, Mandaj Dios Ñuca imashna cajtaca, ñavi ñavi ricuhuanga. ¿Ñucapajta ruraj Moisestaca, imashpata na manllashpa, na alicachishpa rimarcanguichi?” nircami.
9Shina nishpallami Mandaj Diosca, paicunata ninanda fiñarishpa rirca.
10Diospaj jatun carpamanda fuyu anchurishpa rijpica, Mariaca lepra ungüihuanmi, rasushna yuraj yuraj cashca carca. Mariataca, Aaronga, lepra ungüihuan cajtami ricurca.
11Chaimandami Aaronga, Moisestaca cashna nirca: “¡Ñucata mandajlla! Ñucanchica, imatapash na yachajshna maitapash ninajushpami, juchata rurapashcanchi. Cunanga, cai juchamandaca, ñucanchitaca ama llaquichihuaichu.
12Paitaca, huañushcata ungushca huahuatashnaca ama saquipaichu. Mamapaj vijsapillata, chaupita ismushca huahua huacharishcatashnaca, ama saquipaichu” nircami.
13Shina nijpimi Moisesca, Mandaj Diostaca: “Taita Dioslla, paitaca cunanda alichipayari nipanimi” nishpa caparishpa mañajurca.
14Shina cajpimi Mandaj Diosca, Moisestaca cashna nirca: “Paipaj taita ñavipi t'ucajpica, ¿nachu canchis punllacaman pingai tucunman? Shinamandami, canchis punllacaman carpacunamanda llujchishpa cachana cangui. Chai jipami, Israelcunapajman cutin tigramui ushanga” nircami.
15Shina nijpimi Mariaca, canchis punllacunata carpacunamanda llujchishpa cachai tucurca. María, paicunahuan tigramungacamanmi, Israelcunaca shuj pushtumanga na rishpa shuyanajurca.
16Chai jipami Israelcunaca, Hazerot shuti pushtumanda llujshishpa, Parán shuti chaquishca pambapi carpacunata shayachishpa tiyarinajurca.
Who We AreWhat We EelieveWhat We Do
2025 by iamachristian.org,Inc All rights reserved.
