1Tucui gentecuna, caita uyaichi.
Tucui cai pachapi causajcuna, uyaichi.
2Yangalla gentecuna cashpa, alicachi tucushca gentecuna cashpa,
charij cashpa, imagutapash na charij cashpapash, tucuicuna uyaichi.
3Ñuca shimihuanga, ali yachajushcatami rimagrini.
Ñuca shunguhuanga, ali yuyaitallami yarisha.
4Ali yuyaita cuj shimitami, aliguta uyasha.
Na yachai ushanallatami, arpahuan taquishpa yachachisha.
5Llaquita apajui punllapica ¿imatata manllasha?
Na alita gentecuna llaquichinajujpica ¿imatata manllasha?
6Paicunaca, imata charishcahuanmi manllachin.
Ninandapacha charishcahuanmi, jariyashpa parlanajun.
7Chaicunahuanga, shuj huauquita quishpichitaca napacha ushangachu.
Pai quishpiringapapash, Taita Diosman cuitaca na ushangachu.
8(Causaita quishpichingapaca, napacha ushanallami.
Chaitaca, culquita cushpapash napacha ushangachu).
9Causaita causaicaman causangapapash,
ama huañungapapash, imata cuitapash na ushanllu.
10Ashtahuangarin alipacha yachajushcacunapash, huañungami.
Paicunapash shinlli shungu runashnallata, juizu illaj runashnallatami huañunga.
Paicunapaj charishcacunataca, shujcunamanmi saquinga.
11Paicunapaj shungu ucupica, paicunapaj huasicunaca, causaita causaipajmi yanajunmi.
Chai huasi ucucunapash, tucui causaipajmi yanajunmi.
Paicunapaj alpacunatapash, paicunapaj shutihuanmi saquinajun.
12Ashtahuangarin runaca, na alicachi tucushpalla causajungachu.
Paicunapash, huañushpa chinganalla animalcunashnami.
13Paicunapaj causaipipash, juizu illajshnami causanajun.
Shina cajpipash paicunapaj miraicunaca, chashna yuyaicunahuanmi cushijunajun. Selah
14Paicunataca, llamacunatashnami Seolman pushanga.
Chaipica huañuimi mandajunga.
Alitalla rurajcunami, paicunataca jipa punllapica mandanajunga.
Paicuna juyailla cashcapash tucuringami,
Seolmi paicuna causana huasi canga.
15Ashtahuangarin ñuca causaitaca, Taita Diosmi Seolpaj ushaimandaca quishpichihuanga.
Paimi ñucataca pushahuanga. Selah
16Maijambash ninanda charijyajpica na llaquirinachu cangui.
Paipaj huasipi ninanda mirachishpa catijpipash, na llaquirinachu cangui.
17Ima punlla pai huañushpaca, imatapash na apangachu.
Imatalla charishcapash, na paihuan ringachu.
18Paica, causajushpallami, ninanda cushijurishpa causajun.
Ninanda charishcamandami, alicachi tucujun.
19Shina cashpapash, paipaj ñaupa taitacunahuanmi tandanajugringa.
Paicunaca, cutinga na punllata ricungachu.
20Alicachi tucushpalla causaj runaca, na ali yuyaita japinchu.
Paica, huañushpa chinganalla animalshnami.
Who We AreWhat We EelieveWhat We Do
2025 by iamachristian.org,Inc All rights reserved.
