ECLESIASTÉS 9 - Quichua Imbabura 2016

1Tucuita alipacha yachajushca jipami, caicunataca nigrini: Alitalla rurajcunapash, alipacha yachajushca runacunapash, paicuna imatalla rurashcacunapash, Taita Diospaj maquipimi. Shinallata, juyarinapash, fiñarinapash, runacunapaj ñaupajpi imamanda chashna cajtapash na yachanllu.

2Ima cashpapash, tucuicunatami japimunga. Alitalla ruraj runatapash, Diosta na manllaj runatapash, ali shunguta charij runatapash, Diospaj ñaupajpi alita ruraj runatapash, na alita ruraj runatapash, Diosman animalta cushpa huañuchij runatapash, chaita na ruraj runatapash, juchata na ruraj runatapash, juchata ruraj runatapash, juramentuj runatapash, juramentunata manllaj runatapash, tucuicunatami huañuica japinga.

3Cai pachapi, runacunapaj causaipica, caicunami na ali ricurin: Tucuicunatami huañuna punlla japimunga. Shinallata, runacunapaj shungupica, tucui causaipimi juizu illajshna, na alita rurana yuyailla tiyajun. Shina cashpapash, tucuicunami huañunga.

4Causaj runacunapaca, imata shuyanapash tiyanrami. Huañushca leonbaj randica, causajuj alcumi ashtahuan ali.

5Gentecunaca, huañui chayamunataca yachanmi. Ashtahuangarin huañushcacunaca, imatapash na yachanllu. Imata ashtahuan japinatapash na charinchu. Paicunataca, pipash na yaringachu.

6Huañushcacunapajca, juyaipash, ima shuj yuyaicunata charinapash illanmi. Cai pachapica, imatalla ruraitapash na ushangachu.

7Cunanga, micushpa, ufiashpa cushijugrilla. Can imatalla rurashcatapash, Taita Diosca cushijushpami chasquijun.

8Churajunatapash, punllandi yurajta churajunguilla. Cambaj umapipash, mishquilla ashnajujta churajunguilla.

9Cai pachapi causajushcacamanga, cambaj juyashca huarmihuan cushijushpa causangui. Cai pachapica, can tucui imatalla ninanda shaijushpa rurashcamandaca, chashnami cushijunata charingui.

10Tucui imata rurana ricurijpica, chaitaca cambaj tucui ushaihuanmi rurana cangui. Seolman rijpica, imata ruranapash, imata yarijunapash, imata yachajunapash na tiyangachu.

11Cai pachata ricujpica, ali calpajcunallapash na mishanllu. Jatun macanajuipipash, na ninan shinllicunalla mishanllu. Shinallata, ali yachajushcacunapash, na micunata charinchu. Ali yuyaihuan causajcunapash, na charijyanllu. Alipacha yarishpa rimajcunapash, ima alitapash na japinllu. Imata rurana cashpapash, shuj punllami chayamunga.

12Runacunaca, chaicuna ima punlla pactamunataca na yachanllu. Imashna pijicuna linllipi japi tucunshna, alasyu animalcuna tugllapi huatarishpa japi tucunshnami, runacunapash na ali punllacunapica, imapash na ali yuyaicunahuan japi tucunlla.

13Shinallata, cai pachapica, ashtahuan cai ali yachajunatapashmi ricurcani:

14Shuj uchilla pueblopica, huaquinlla gentecunami causanajun. Chai pueblopi causajcunahuan macanajungapami, shuj jatun mandaj shamushpa, chai pueblota chaupipi churashpa, baluartecunata shayachirca.

15Chai pueblopica alipacha yachajushca, imagutapash na charij runami causan. Chai runaca, alipacha yachajushca cashpami, chai pueblotaca quishpichin. Shina cajpipash paitaca, pipash na yarircachu.

16Chaimandami: “Ninan shinlli canapaj randica, alipacha yachajushca cana ashtahuan ali. Imagutapash na charij runagutaca, alipacha yachajushca cajpipash yangapi churashpami, pai ali yuyaita cushcatapash na uyanayachinajun” yajurcanimi.

17Alipacha yachajushca runa rimashcata uyanaca, alipachami.

Ashtahuangarin, juizu illaj runa caparishcata uyanaca, napacha alichu.

18Ali yachajushca canaca,

macanajungapa imata charishcatapash ashtahuan yali alimi.

Ima juchata rurashpapash, tucui ali cashcatapash tucuchingallami.