NÚMEROS 30 - Quichua Imbabura 2016

Diospaj ñaupajpi ari nishcata pactachinajuchun mandashcamanda

1Moisesca, Israel ayllucunata mandajcunatami cashna nijurca: “Mandaj Diosca cashna nishpami mandashca:

2‘Maijan cashpapash Mandaj Diospajta rurangapa ari nishpa, na cashpaca tucui shunguhuan rurashapachami nishpa, paipaj shimihuan juramentushcataca pactachinapachami canga. Paipaj shimihuan tucui imatalla nishcashnami pactachina canga.

3Ashtahuangarin maijan huarmi cashpapash, cuitsara cashpa, paipaj taitapaj huasipi causajushpa, Mandaj Diospajta rurangapami tucui shunguhuan pactachingapa ari nijunga.

4Tucui shunguhuan Diospajta rurashapacha nijujta, paipaj taita uyashpapash, imatapash na nishpa saquijpica, pai imata rurashapacha nijushcataca pactachinapachami canga. Tucui shunguhuan Diospajta rurashapachami nijushcataca, pactachinatami charin.

5Ashtahuangarin, cuitsapaj taita yachaj chayashpa chai punllallata imatapash nishpa jarcajpica, tucui shunguhuan Diospajta rurashapacha nijushcataca saquinallami canga. Paipaj taita jarcashcamandami, pai na pactachijpipash, Mandaj Diospash perdonanga.

6Ashtahuangarin cazarashca huarmi, tucui shunguhuan Diospajta rurangapa, paipaj shimihuambacha pactachisha ningami,

7chaita paipaj cusa uyashpapash na jarcajpica, chai huarmica, tucui shunguhuan Diospajta rurashapachami nijushcataca pactachinami canga.

8Ashtahuangarin, shina nijushcata paipaj cusa yachaj chayashpa jarcajpica, Diospajta rurashapacha nijushcapash, paipaj shimihuambacha, tucui shunguhuan Diospajta rurashapacha nijushcapash yangami canga. Chaimanda, pai na pactachijpipash, Mandaj Diosca perdonangami.

9Ashtahuangarin sapalla huarmi cashpa, na cashpaca cusa jichushca cashpapash, paipaj tucui shunguhuan Diospajta rurashapacha nijushcataca, pactachinami canga.

10Cusayuj huarmipash, cusahuan causajushpa, paipaj tucui shunguhuan Diospajta rurashapacha nishpami juramentunga.

11Chai huarmi shina nijujta paipaj cusa uyashpapash imatapash na nishpa saquijpica, Diospajta rurashapacha nijushcataca, chaitapachami pactachinga. Tucui shunguhuan Diospajta rurasha nijushcataca, chaitapachami pactachinga.

12Ashtahuangarin, shina nijujta paipaj cusa chai punllallata yachaj chayashpa jarcajpica, paipaj shimihuan Diospajta rurashapacha nijushcapash yangami canga. Shina nijushcata, paipaj cusa jarcashcamandami, pai shina nijushcataca Mandaj Diospash perdonanga.

13Diospajta rurashapacha nijushcata, tucui shunguhuan juramentushcataca, cusami rurachun saquinga, na cashpaca cusallatami jarcanga.

14Diospajta rurashapachami nijujta, paipaj cusa uyashpapash, punllandi imatapash na nishpa purijujpimi, chai huarmi pactachingapa ari nishcatapash, tucui imatalla ruranatapash, paipaj cusa na imatapash nishca cashcamanda, pactachinatapacha charin.

15Ashtahuangarin, shina nijujta uyashpa saquishca jipara yangapi churajpica, huarmipaj juchamandaca cusami llaquichi tucunga’ nishpami mandarca” nijurcami.

16Cai mandashca shimicunataca, cusayuj huarmi cashpaca, paipaj cusahuan, cuitsara cashpaca, paipaj taitahuan, imashnalla Diospajta ruranamanda, Mandaj Dios, Moisesman yachachishcami.