1Chai jipami, jahua pachamandaca cutin shuj ángel ninan ushaihuan urai shamujta ricurcani. Chai angelca, punchapamba cashpami, cai pachatapash punchayachijurca.
2Paica, shinllitapachami cashna nishpa caparijurca:
“Babilonia jatun puebloca, ñami urmashca, ñami urmashca.
Chaipica, ayacuna, tucui mapata rurachij espiritucuna causana huasimi tucushca.
Alasyu, mapa, na ricunayai animalcuna, tazinda rurashpa causanapashmi tucushca.
3Tucui llactacunami, machana vinota ninanda ufiajshna, huainayashpa causashca.
Cai pachapi jatun mandajcunapash, paihuanmi huainayashpa causanajurca.
Jatun na alita rurashpa, tucuita pai charijpimi,
cai pachapi randishpa, jatushpa causajcunaca, ninanda charijyanajurca” nijurcami.
4Jahua pachamanda cutin shuj rimajtami uyarcani:
“Ñuca agllashca gentecunalla,
chai pueblomanda llujshimuichi.
Paishnalla juchacunata rurashpa,
ama pacta paihuan llaquichi tucungapami llujshimuna canguichi.
5Paipaj juchacunaca, jahua pachacamanmi chayagrishca.
Pai ima na alita rurashcatapash, Taita Diosca na cungashcachu.
6Cangunaman, chai huarmi imashna cushcashnallata,
cangunapash, chai huarmiman cunguichilla.
Pai imata rurashcatapash, chaupi yalihuan tigrachinguichi.
Ufiachingapaj copapi chapushcashnallata,
chaupi yalita chapushpa paiman tigrachinguichi.
7Paica, pai munashcata rurashpa, ninanda jatun tucushcamandami,
chashnallata ninanda llaquichishpa huacachina canguichi.
Paipaj shungupica:
‘Jatun mandaj huarmishnapachami tiyajuni,
na sapalla huarmichu cani, huacaitapash na huacashachu’ yajurcami.
8Shina cajpipash, shuj punllapillami jatun llaquicuna japinga.
Paitaca: huañuipash, huacaipash, yarjaipashmi japinga.
Ninapimi rupachi tucujunga.
Paita tapuchishpa llaquichij Mandaj Taita Diosca,
ninan ushaitami charin” nijurcami.
9Cai pachapi jatun mandajcunaca, chai huarmihuanmi huainayashpa, paicuna munashcata rurashpa, ninanda cushijushpa causanajurca. Chai pueblo rupashpa cushni llujshijujta ricushpaca, ninandami llaquirishpa huacanajunga.
10Shina llaquichijujta carumanda ricushpami, manllarishpa cashna ninajunga:
“¡Aij, aij, ninan ushaita charij Babilonia jatun pueblolla!
Canda llaquichinaca, ñapashmari japimushca” ninajungami.
11Shinallata, cai pachapi jatujcunapash, imatallapash pipash na randij tiyajpimi, ninanda llaquirishpa huacanajunga.
12Paicunaca, curita, culquita, juyailla rumicunata, perlacunata, juyailla linota, morado yana puca seda telacunatami jatungapa apamunajunga. Shinallata, tucui tiyashca mishquilla ashnajun caspicunata, marfilta imatapash rurashcacunata, caspicunata juyaillata rurashcacunatapash. Cobreta, jirruta, marmolta, imatapash rurashcacunatami jatunajurca.
13Canelatapash, mishquilla ashnajun jihuacunatapash, inciensotapash, mirratapash, olíbanotapashmi jatunajurca. Shinallata, vinotapash, aceitetapash, cutashca ali jacutapash, trigrotapash, huasipi charina animalcunatapash, llamacunatapash, caballocunatapash, carretacunatapash, gentecunatapash gañangunatashnami jatunajurca.
14Chai pueblotami cashna ninajunga:
“Cushijushpa can imata charishcapash ña tucurishcami.
Can juyailla ricuringapa tucui ima charishcapash tucurishcami.
Chaicunataca, cutinga na tigrashpa ricunguichu” ninajurcami.
15Chai jatujcunaca, chai pueblopi jatushpa, ninanda charijyashpa causashca cashpami, chashna llaquichijujta carumanda ricushpa manllarishpa, ninanda llaquirishpa huacanajunga.
16Paicunaca cashnami ninajunga:
“¡Aij, aij, chai jatun pueblolla!
Juyailla linota, morado yana puca churajunata churajushca huarmishnami, chai puebloca tiyajurca.
Shinallata, curihuan, juyailla rumicunahuan, perlacunahuan,
aligutapacha alichirishcami carca.
17Pai juyailla ninanda charishcacunapash, ñapashmi tucurishca” ninajungami.
Shinallata, barcocunata purichijcunapash, chaipi tucui gentecunapash, chaipi mandajcunapash, mama cuchapi imatalla rurajcunapash, tucuillami carupi shayanajurca.
18Chai pueblo rupashpa, cushni llujshijujta ricushpami: “¿Maijan pueblota, cai jatun puebloshna tiyarcayari?” nishpa ninanda caparinajurca.
19Shinallata, alpata umapi churarishpa, ninanda llaquirishpa huacashpami, cashna nishpa caparinajurca:
“¡Aij, aij, chai jatun pueblolla!
Pai ninanda charij cajpimi, mama cuchapi barcocunata tucui charijcunapash charijyarca.
¡Cunanga, ñapashmi llaquinayaita tucuchi tucushca!” ninajurcami.
20Paita tucuchishcamandaca, jahua pachapi causajcuna,
Diospajlla causajcuna, apostolcuna, profetacunapash, ninanda cushijuichi.
Taita Diosca, chai tucui na alicunata rurashcamandami chashna llaquichishca.
21Chai jipallami, ninan ushaita charij angelca, molino rumitashnalla japishpa, mama cuchaman cashna nishpa shitarca:
“Cashnallatami Babilonia jatun pueblopash, ucuman shitai tucunga.
Shina shitajpica, cutinga napacha ricuringachu.
22Shinallata, arpata, gaitata, trompetata taquijcunapash,
candajcunapash, cambaj ñangunapica, cutinga na uyaringachu.
Tucui yachashcata rurajcunapash, na ashtahuan tiyangachu.
Molino cutajujpash, cambica na ashtahuan uyaringachu.
23Michata japichishcapash, candaca na ashtahuan punchayachingachu.
Cazaraipi cushijushpa parlanacunapash, cambica na ashtahuan tiyangachu.
Cambi jatushpa causajcunaca, tucuita yalimi ashtahuan charijyanajurca.
Canga brujushpami, tucui llactacunapi causajcunataca, llullashpa umachijurcangui” nijurcami.
24Shinallata, profetacunapaj, Diospajlla causajcunapaj, cai pachapi huañuchi tucushcacunapaj yahuarmi, chai pueblopica jicharishca ricurirca.
Who We AreWhat We EelieveWhat We Do
2025 by iamachristian.org,Inc All rights reserved.
