1 SAMUEL 25 - Quichua Imbabura 2016

Davidmandapash, Abigailmandapash

1Samuel huañujpica, Israelcunaca tucuilla tandanajushpami, huacashpa, Ramá shuti pueblopi tiyaj paipaj huasipi pambarca. Chai jipami Davidca, Parán shuti jichushca pambaman rirca.

2Maón shuti pueblopi causaj shuj runami, Carmel shuti pueblopi shuj jatun alpata charirca. Paica, ninan charij cashcamandami, quimsa huaranga llamacunata, shuj huaranga chivocunata charirca. Chai runaca, Carmel pueblopimi llamacunata rutuchijurca.

3Chai runaca, Nabal shutimi carca. Paipaj huarmica, ali yuyaita charij, Abigail shuti, juyailla huarmigumi carca. Ashtahuangarin Nabal shuti runaca, Caleb runapaj mirai, shinlli shungu, na alitalla ruraj runami carca.

4Davidca, jichushca pambapi cashpami, Nabal shuti runa llamacunata rutuchijujta yachaj chayarca.

5Chaimandami Davidca, chairalla viñai chungapura runacunataca, Carmel shuti puebloman vichai rishpa, Nabal shuti runataca ñuca shutipi, “alillachu cangui” nigrichi nirca.

6Cashnatapash ninguichi: “Cambash, cambaj huasi ucupurapash, can imatalla charishcacunapash, ali causachunmi munani.

7Canga, llamacunata rutuchijun nijtami uyani. Cambaj, michijcunaca ñucanchihuanmi, cai Carmel shuti pueblo pambapi michishpa causarca. Paicunataca na llaquichijpimi, tucuita charishpa cushijushpa causanajurca.

8Chaitaca, cambajta rurajcunata tapujpimi, paicunallata villanga. Ñuca cachamushca cai runacunapash, ali punllapi shamushca cashcamanda, cambaj ñaupajpica ali ricurishca cachun. Cunanga, can ima charishca micunaguta, cambajta rurajcunaman, cambaj churishna Davidman cachamupai nigrichi” nishpami cacharca.

9David cachashca chai runacunaca, Nabal shuti runapajman chayashpami, tucui chai shimicunata, Davidpaj shutipi villanajurca. Chai jipaca, upalla shayanajurcallami.

10Nabal shuti runaca, David cachashca chai runacunataca, cashnami nirca: “¿Pita David, pita Isaí runapaj churi canga? Cunan punllacunaca, taucacunami paicunapaj amucunata pacajushpa purinajun.

11Ñuca tandata, yacuta, yanushca aichataca, ñuca llamacunata rutujcunaman carangapami alichircani. ¿Chaita japishpachu, maimanda cajtapash na rijsishca runacunamanra carasha?” nircami.

12Shina nijpimi, David cachashca runacunaca, paicuna shamushca ñandallata tigrashpa, tucuita villanajurca.

13Shinamandami Davidca, paita catijcunataca cashna nirca: “Tucuicuna cangunapaj espadata huatarichi” nijpimi, tucuicuna paicunapaj espadata japishpaca, chumbilirishcapi huatarinajurca. Shinallata Davidpashmi, paipaj espadata japishpa huatarirca. Davidtaca, chuscu patsajshna runacunami catishpa vichai rirca. Ishcai patsaj runacunaca, imalla tiyashcacunata ricungapami saquirirca.

14Ashtahuangarin, Nabal shuti runaman rurajpuramanda shuj runami, Abigailman cashna nishpa villajurca: “Davidca, jichushca pambapi cashpami, ñucanchi amutaca ‘alillachu cangui’ nichun, paipaj randi villajcunata cachamurca. Ashtahuangarin paica, na alicachishpami pingaichishpa tigrachirca.

15Chai runacunaca, ñucanchihuanga ali cashpami, ima punllallapash na llaquichirca. Jichushca pambapi cashpa, paicunahuan purinajui punllacunapica, imapash na illajchu carcanchi.

16Paicunahuan llamacunata michinajui punllacunapica, punllapash, tutapashmi, ñucanchitaca pirca jarcashcashna huacaichinajun carca.

17Shinamanda cunanga, imata cashpapash, aliguta yarishpa rurapailla. Ñucanchi amutapash, tucui paipaj huasi ucupuratapash, llaquichina punllacunaca ñami chayamushca. Jatun na ali cajpimi, Nabal runahuanga pipash na parlai ushanchi” nijurcami.

18Shina nijpimi Abigail huarmica ucha rishpa, ishcai patsaj tandata, ishcai cara muchilapi vinota, picha llama cusashcata, chaupi quintal camllashca granota, patsaj malqui uva chaquishcata, chaquishca higohuan rurashca ishcai patsaj tandata, burrucunaman apachirca.

19Chai jipami, paipajta rurajcunataca: “Cangunaca, ñaupashpa richilla, ñucaca jipalla catimushallami” nishpa cacharca. Chaitaca, paipaj cusamanga, imatallapash na villarcachu.

20Paica, shuj burrupi tiyarishpami, pipash na ricunalla shuj lomata pacalla urai shamujurca. Shina shamujushpami, Davidtaca, paita catijcunandi, chimbata shamunajujta ricushpa, paicunahuan tuparigrirca.

21Davidca, cashnami nijushca carca: “Jichushca pambapi tucui imatalla chai runa charishcataca, yangapachami ricushpa causashcani. Pai charishcacunaca, imallapash na chingashcachu carca. Chashna alita rurashcamandaca, na alitami tigrachihuashca.

22Shina cashcamanda Davidta fiñajcunataca, Taita Diosca ashtahuan ninanda llaquichishpami ali canman. Cunanmanda caya punllapaca, Nabal shuti runapaj huasi ucupurataca, shujllatapash na causajta saquishachu” nijurcami.

23Abigail huarmica, Davidta ricushcandimi, burrumanda ucha uriajushpa, Davidpaj ñaupajpi cungurishpa, alpaman chayajta cumurirca.

24Paica, Davidpaj chaquipi ugllarishpami, cashna nijurca: “Ñucata mandajlla, ima juchata rurashcapash, ñucapaj jahua cachun. Ashtahuangarin cambajta ruraj ñuca ima nijujtapash, ama fiñarishpa uyahuayari.

25Ñucata mandajlla, chai Nabal shuti na ali runa imatalla nishcataca ama cazupaichu. Paipaj shutica, Nabal shutimi. Paica, chai shutishnallata juizu illajpachami capan. Ashtahuangarin, cambajta ruraj ñucami, can cachamushca runacunataca na ricupashcani.

26Cunanga, ñucata mandajlla, Mandaj Diosca ricujunmi, cambash ricujupanguimi. Na alita rurashcamanda chashnallata llaquichishpa cambaj maquihuan huañuchishpa, yahuarta jichaj shamunataca, Mandaj Diosllatami candaca jarcapashca. Canda fiñajcunapash, ñucata mandaj canda llaquichingapa tucui munajcunapash, Nabal shuti runashnallata llaquita apashpami ali canman.

27Cunanga, cambajta ruraj ñuca, canman carangapa apamushca cai micunagucunataca chasquishpa, canda catij runacunaman carapailla.

28Cambajta ruraj ñuca chashna fiñachishcataca, cungapailla nishpami mañapani. Mandaj Diosllatami, cambaj miraicunatapash, shinllitapacha mandanajuchun churanga. Can, ñucata mandajca, Mandaj Diosmandami macanajushpa puringui. Tucui cambaj causaipica, ima na alitapash na rurapashcanguichu.

29Canda huañuchingapa munashpa maijan mascajujpipash, ñucata mandajpaj causaitaca, Mandaj Diosta cazushpa, ali causajcunahuan tandachishpami charinga. Ashtahuangarin, canda fiñajcunapaj causaitaca, paillatami rumita huaracapi churashpa shitajshna chingachinga.

30Shinallata, Israelcunata mandachun, Mandaj Dios churasha nishcashnallata pactachishpami, candaca Israelcunata mandachun churanga.

31Shina cashcamanda, ñucata mandajlla, na yangamanda pipaj yahuartapash jichashcanguichu, na canda llaquichishcashnallata pitapash llaquichishcanguichu. Na chaita rurashcamandami, imamanda llaquirinatapash na charipangui. Ñucata mandajlla, chashna ruranamandaca jarcaripanguilla. Mandaj Diosllata alita rurashpa pactachijpica, cambajta ruraj ñucataca yarihuangui” nijurcami.

32Shina nijpimi Davidca, Abigailtaca cashna nijurca: “Israelcunata Mandaj Diosca, alicachi tucushca cachun. Paimi candaca, ñucahuan cunan tuparichun cachamushca.

33Cambaj ali yuyaipash, alicachi tucushca cachun. Huañuchishpa yahuarta jichanamanda, ñucata llaquichishcamanda, randi llaquichinamanda jarcaj shamushcamandaca, alicachi tucushcami cangui.

34Israelcunata Mandaj Diosca ricujunmi. Paimi, canda ama llaquichijuchunga jarcahuashca. Ñucahuan tuparingapa can na uchalla shamushca cajpica, cunanmanda cayapaca Nabal shuti runapaj huasi ucupurataca, shujtallapash causajtaca na saquimanllu carcani” nijurcami.

35Shina nishpallami Davidca, Abigail huarmi imatalla apamushcata chasquishpa, cashna nirca: “Imatapash na manllashpa, cambaj huasiman tigrailla. Can ima nishcatapash uyashpa, pactachishami” nirca.

36Shina nijpimi Abigail huarmica, paipaj cusapajman tigrarca. Chaipimi Nabal shuti runaca, jatun mandajpaj micunatashna, ninan micuita rurashpa, cushijushpa, ninandapacha machashca tiyajushca carca. Shinamandami Abigail huarmica, cayandi punllacaman imatapash na villarca.

37Ashtahuangarin cayandi tutamandapaca, Nabal shuti runa, machai ña yalishca cajpimi, paipaj huarmi Abigailca, tucuita villarca. Shina villajpimi Nabal shuti runataca, shungu nanai japijpi, huañushcashna, casilla saquirirca.

38Chaimandami chunga punlla jipaca, Mandaj Diosllata nanaita ashtahuan cujpi, Nabal shuti runaca huañurca.

39Davidca, Nabal shuti runa huañushcata yachashpami, cashna nijurca: “Mandaj Diosca, alicachi tucushca cachun. Ñucata rimashpa pingaichishcamandami, Nabal shuti runataca llaquichishca. Diospajta ruraj ñuca na alita ruranamandaca, Paimi jarcahuashca. Mandaj Diosllatami, Nabal shuti runa na alita rurashcamandaca, paimanllata tigrachishca” nijurcami. Chai jipami Davidca, Abigail huarmitaca paipaj huarmi cachun cazarangapa parlachun cacharca.

40Davidpajta rurajcunaca, Carmel shuti pueblopi causajuj Abigail huarmipajman shamushpami: “Davidca, canda cazarangapa munashpami, villachun cachamun” ninajurca.

41Shina nijpi Abigail huarmica cungurishpa, alpaman chayajta cumurishpami cashna nirca: “Paipajta ruraj ñucaca, caipimi capani. Ñucata mandajpajta rurajcunapaj chaquitaca, maillachipashallami” nirca.

42Chai jipami Abigail huarmica, jarihuan nara tacarishca paipajta ruraj pichapura cuitsacunandi, burrupi tiyarishpa, David villachun cachashca runacunata catishpa rirca. Chaipimi Davidhuan cazararca.

43Shinallata Jezreel shuti pueblomanda Ahinoam shuti huarmihuambashmi, Davidca cazararca. Shinami ishcandi, paipaj huarmicuna tucurca.

44Saulca, Davidpaj huarmi Micaltaca, Galim shuti pueblopi causajuj, Lais shuti runapaj churi Palti shuti runahuanmi cazarachirca.