JEREMÍAS 18 - Quichua Imbabura 2016

Mangata ruraj runamanda, mangata rurana turumanda

1Mandaj Diosca, Jeremiastaca cashna nishpami mandarca:

2“Alpa mangata ruraj runapaj huasiman ri. Chaipimi, imata canman villana cashcatapash villasha” nircami.

3Shina nijpimi, ñucaca alpa mangata ruraj runapaj huasiman urai rircani. Chaipica, chai runaca shuj pirurupi churashpami, alpa mangata rurajushca carca.

4Pai rurajushca alpa mangaca, paipaj maquipillatami huaglirca. Chaimandami pai munashcashna shuj mangata cutin rurajurca.

5Shinamandami Mandaj Diosca, cashna nihuarca:

6“Israel ayllucunalla, ¿Nachu cangunatapash, alpa mangata ruraj cai runashna rurai ushanalla cani? Mangata ruraj runapaj maquipi turushnami, cangunapash Ñuca maquipi canguichi. Mandaj Dios Ñucami, chashna nini.

7Cungashcapimi, gentecunatapash, llactacunatapash sapimanda llujchishpa tucuillata tucuchigrini.

8Ashtahuangarin chai gentecuna na alita ruranata saquishpa Ñucapajman tigrarijpica, paicunata llaquichingapa yarijushcataca na llaquichishpa saquishallami.

9Ashtahuangarin, maijan gentecunatapash, maijan llactapi mandajcunatapash, na llaquichishpami jatumbi churasha.

10Shinallata, Ñuca mandashcata na cazushpa, Ñuca ñaupajpi na alita rurajpica, paicunaman alita ruranata yarijushcataca na pactachishachu.

11Shina cashcamanda cunanga, Judá llactamanda tucui runacunatapash, Jerusalenbi causajcunatapash cashna nigri: Mandaj Diosca, cashnami nin: ‘Cangunata fiñashpa llaquichinatami yarijuni. Jatun llaquihuan imashna llaquichinatapash, ñami yarishcalla cani. Cunanga tucuicuna na ali causaita saquishpa tigrarimuichi. Cangunapaj causaipipash, alitalla rurai callarichi’ nishpa villagri” nihuarcami.

12Ashtahuangarin paicunaca, cashnami ninajurca: “Yangallatami chashna nijungui. Ñucanchica, ñucanchipaj rurashcalla dioscunatami catishun. Tucuillami, na alita yarinajushcataca rurashpallata causashun” ninajurcami.

13Shinamandami Mandaj Diosca, cashna nirca:

¿“Maipipash chashna na ali gentecuna tiyanllu imashi? yachangapa shuj llactacunapi tapugrichi.

Israelcunaca, chairalla cuitsashna cashpapash, jatun na alitallami rurarca.

14Líbano urcu jatun rumi jahuacunamandaca, ¿ima punllapash rasu anchuringachu?

Caru llactamanda shamujuj chirilla yacuca, ¿ima punllapash chaquingachu?

15Ñuca agllashcacunaca, rurashcalla dioscunaman inciensota carashpa cushnichishpami, Ñucata cunganajurca.

Punda imashna causashcashnallata causashpami, pandarishpa causanajun.

16Chashnamandami, paicunapaj llactaca llaquinayaita tucuchi tucunga.

Tucui causaipi ninanda asishpa ricuna llactami tucunga.

Maijambash cai llactata yalinajushpaca, ninanda na alicachishpa, umata muyuchishpami yalinajunga.

17Paicunataca, indi llujshimujmanda huairashna shamushpa, paicunata fiñajcuna caita chaita calpachinajuchunmi saquisha.

Jatun llaqui chayamui punllapica, paicunataca na yanapashpami, jichushpa saquisha” ninmi.

Huañuchingapa pacalla parlanajujpi, Jeremías Diosta mañashcamanda

18Shinamandami paicunaca cashna ninajurca: “Shamuichi, Jeremiasta imashna llaquichinata yarishunchi. Mandashca shimita yachachij sacerdotepash, yuyaita cuj alipacha yachajushca runapash, profetapash, na illangachu. Pai villajushcata juchachishpa llaquichingapa shamuichi. Pai villashcataca, imatallapash na uyanachu canchi” ninajurcami.

19Mandaj Dioslla, ñuca mañashcata uyahuayari.

Ñucata fiñashpa imatalla rimanajujta uyapayari.

20¿Alita rurashcamandaca, na alita rurashpachu, ñucataca huañuchingapa yarinajun?

Paicunapaj ali cachun ñuca mañajujtaca, Canllata yachapanguimi.

Paicunata ama ashtahuan llaquichijuchunmi mañajurcani.

21Chaimanda cunanga, paicunapaj huahuacunataca,

yarjaihuan cashpapash, espadahuan cashpapash huañuchun saquipailla.

Huarmicunatapash, huahua illajta, cusa illajta saquipailla.

Paicunapaj cusacunapash, ungüihuan huañuchun saquipailla.

Chairalla viñai, paicunapaj churicunatapash, jatun macanajuipi espadahuan huañuchi tucuchun saquipailla.

22Paicunata fiñaj runacunata Can cachamujpica,

paicunapaj huasicunapi ninanda caparinajujmi uyaringa.

Paicunaca, ñucata japingapami, utujuta allanajushca.

Ñuca chaqui sarunapimi, tsagnarina lazuta pacalla churanajushca.

23Mandaj Dioslla, ñucata huañuchingapa imashna yarinajujtaca yachapanguimi.

Paicuna na alita rurashpa, Cambaj ñaupajpi juchata rurashcamandaca, ama perdonapanguichu.

Paicunataca, ninanda fiñarishpa llaquichipailla.