1Israelcunata michij Dioslla,
uyahuayari.
Canmi Josepaj miraicunataca, llamacunatashna michijupangui.
Querubín angelcunapaj chaupipi causajuj Dioslla,
ninan ushaihuan shamupayari.
2Efraín aylluta, Benjamín aylluta, Manasés aylluta,
Cambaj ninan ushaihuan quishpichingapa shamupayari.
3Taita Dioslla,
ñucanchitaca cutin chasquihuailla.
Can ñucanchita urai ricushpa yanapajpimi, quishpirishun.
4Tucuita Mandaj Taita Dioslla,
¿ima punllacamanda, Can agllashcacuna mañanajujta na uyagripangui?
5Micunata carangapa randica, huacanatami carashcangui.
Yacucunata carangapa randica, ashtahuan huacanatami carashcangui.
6Ñucanchitaca, muyundi llactacunapi causajcuna fiñashpa asinajuchunmi saquircangui.
Ñucanchita fiñajcunaca, na alicachishpa asinajuchunmi saquircangui.
7Tucuita mandaj Taita Dioslla,
ñucanchitaca cutin chasquihuailla.
Can ñucanchita urai ricushpa yanapajpimi, quishpirishun.
8Ñucanchica, Egipto llactamanda uva yurata apamushcashnami canchi.
Cai llactapi causajcunata calpachishpa, tarpushcashnami canchi.
9Alpata alichishpa mapa illajta saquijpi,
sapiyashpa cai alpapi viñashcashnami jundarcanchi.
10Urcucunaca, chai yuracunapaj llandunahuan quilpashcami carca.
Taita Diospaj cedro quirucunataca, paicunapaj malquicunahuanmi quilpanajurca.
11Paicunapaj malquicunaca, mama cuchacamanmi mirarca.
Paicunapaj cutin viñashca yuracunapash, jatun yacucamanmi mirarca.
12¿Imamandata chai uva chagra muyundi jarcashcacunataca faquircangui?
¿Imamandata ñanda yalijcunaca, chai uvata pallashpandi yalinajun?
13Urcu cuchicunami tucuchinajun.
Sacha animalcunami micushpa tucuchinajun.
14Tucuita mandaj Taita Dioslla,
ucha shamupayari.
Cai uva chagra imashna cajta, jahua pachamanda aliguta ricushpa llaquipayari.
15Cambaj ninan ushaihuan tarpushca yuracunataca llaquipayari.
Cutin viñashca, Cambaj yuracunatapash llaquipayari.
16Ninapi rupachijpimi llaquinayaita tucurishca.
Chashna rurajcunataca, ninanda fiñarishpa llaquichipayari.
17Can agllashca runapaj jahuapi, Cambaj maquita churapayari.
Cambajlla cachun agllashca, runa aichayuj runapaj jahuapi Cambaj maquita churapayari.
18Shina rurajpimi, Canmandaca napacha anchuripashun.
Ñucanchiman causaita carajpimi, Cambaj shutita alicachipashun.
19¡Tucuita mandaj Taita Dioslla,
ñucanchitaca cutin chasquihuailla.
Can ñucanchita urai ricushpa yanapajpimi, quishpirishun.
Who We AreWhat We EelieveWhat We Do
2025 by iamachristian.org,Inc All rights reserved.
