JOB 33 - Quichua Imbabura 2016

Eliú shuti runa, Job runata juchachishpa rimashcamanda

1Shinamanda cunanga, Job, ñuca rimashcata aliguta uyahuai.

Ñuca imata rimashcatapash ali uyahuai.

2Cunanga ñami rimashpa callarigrini.

Canda imatalla ningapaca, jallupimi charijuni.

3Na llullashpami, aliguta yarishpa rimagrini.

Ñuca shimica, chashna cashcatapachami, na llullashpa rimagrin.

4Ñucataca, Diospaj Espiritumi rurahuarca.

Tucuita rurai ushaj Diospaj Samaimi, causaita cuhuarca.

5Ñuca imata nijpipash, ushashpaca tigrachihuailla.

Ñucahuan rimaringapa chimbapura shayarilla.

6Taita Diospaj ñaupajpica, cambash, ñucapash chashnallatami canchi.

Ñucapash, alpamanda rurashcami cani.

7Ñucataca, na manllanachu cangui.

Ñuca maquipash, candaca na llaquichingachu.

8Canga, ñuca uyajtapachami rimarcangui.

Cashna nijujtami, candaca uyarcani:

9‘Ñucaca, ima mapapash, ima na alipash illajmi cani.

Imata juchachinapash, ima juchapash illajmi cani.

10Diosmi ñucata fiñashpa, juchachinata mascahuan.

Ñucataca, Paita fiñajtashnami ricuhuan.

11Ñuca chaquitapash, cadenahuanmi huatarca.

Ñuca imatalla rurajujtaca, tucuitami ricuriajurca’ nircanguimi.

12Canga pandatami chashna nijungui.

Taita Diosca, runata yali cajtami, canman villagrini.

13¿Imashpata Dioshuan fiñanajushpa rimarijungui?

Pai imatalla rurangapa yarijushcataca, na villangachu.

14Ashtahuangarin Taita Diosca, cutinbash cutimbashmi riman.

Shina cajpipash runami na yuyaipi japin.

15Muscuipipash, muscuipishna tuta ricurishpapashmi riman.

Runacunata puñui japijpi, camapi puñujujpimi riman.

16Diosca, runacuna uyajtami riman.

Ali yuyaita ricuchishpami riman.

17Runacuna na alita rurajujpi, saquichingapami riman.

Jariyashpa jatun tucunajujta saquichingapami, chashna riman.

18Shina rurashpami huañushpa pambai tucuna utujuman rinamanda jarcanga.

Espadapi huañuchi tucunamandapash quishpichingami.

19Shinallata, na ali tucunalla nanaihuanmi llaquichin.

Tullu nanaicunahuanmi llaquichin.

20Chashna nanaihuan cashpami micungapapash na munan.

Mishquilla micunatapash, ninandami millanayachin.

21Paipaj cuerpoca chaquishpami tucurin.

Tullucunapash jahuallami ricurin.

22Paipaj almaca, pambana utujuman rinallami tucun.

Paica ñapacha huañunallami tucun.

23Paita yanapangapa shamushpami,

paipaj randi shuj agllashca rimaj shamushpa,

runa imata ruranataca villanga.

24Quishpirishca runaca: ‘Taita Diosca, llaquihuarcami.

Huañushcata pambana utujuman, rinamandapash cacharichihuarcami.

Quishpirinatapash tarircanimi’ ninmanmi.

25Paipaj aichaca, llullu huahuapaj aichashna tucushpami,

chairalla viñai cashcashna tigranman.

26Taita Diosta pai mañajpica, Diosca juyanmanmi.

Paipaj ñavitapash, cushijushpami ricunman.

Runataca, alitalla rurashca cachunmi tigrachinman.

27Diostaca, tucuicunapaj ñaupajpi alicachishpami:

‘Ñucaca, juchata rurashpami, alita ruranataca saquircani,

shina cajpipash Diosca na llaquichihuashcachu’ ninmanmi.

28Huañushpa pambana utujuman rinamandaca, Diosmi quishpichihuashca.

Shina cajpimi, causanara cani.

29Taita Diosca, tucui chaicunatami ruran.

Ishcaicaman cashpa, quimsacaman cashpapash, runamanga causaita cungallami.

30Huañushpa pambana utujuman rinatami Diosca jarcan.

Causashpa catichunmi, chashna ruran.

31Job, ñuca rimashcata aliguta uyahuai.

Can upallayajpica, parlashallami.

32Imatapash aliguta yarijushpaca, tigrachihuailla.

Candaca, alitalla ruraj cajta ricuchingapami munani.

33Na cashpaca, ñucata uyahuailla.

Can upalla cajpica, ali yachajushca cachun yachachishallami” nijurcami.