1Temán llactamanda Elifaz shuti runaca, cashnami nirca:
2“¿Alipacha yachajushca runaca, yangata rimanllachu?
Ñapash fiñarishpa ¿maitapash yangata rimangallachu?
3Maijanhuan fiñarishpapash, ¿yangata rimangallachu?
¿Napash rimana shimicunata rimangallachu?
4Cambash, Diosta manllanata cunganguillami.
Taita Diospaj ñaupajpi mañanatapash, yangapi churanguillami.
5Cambaj shimillatami, can na alita rurashcataca villarca.
Canga, umachinata alipacha yachajcunapaj rimaitami agllashcangui.
6Cambaj shimillatami candaca, llaquipi churanga.
Ñucaca, na llaquipi churashachu.
Cambaj shimillatami, canda llaquichinata villanga.
7¿Canga, Adán runapaj pundachu huacharircangui?
Na cashpaca, ¿urcucunata nara rurashpallatachu, candara rurarca?
8¿Taita Dios, imata Pailla yachashcataca canmanrachu villarca?
¿Canmanllachu ali yachaita cararca?
9Canga, ñucanchi na yachashcataca, ¿imatata ashtahuan yachangui?
Canga, ñucanchi na yachashcataca ¿imatata ashtahuan ali yachangui?
10Ñucanchipurapica yuraj uma, alipacha rucu runacunami tiyan.
Paicunaca, cambaj taitatapash yali rucucunami.
11Canman, Taita Dios cushijuita carashcatapash,
ali shimicunahuan rimashcatapash, ¿yangapichu churangui?
12¿Imashpata cambaj shunguca, Dioshuan fiñarijun?
¿Imashpata cambaj ñavica pucayashpa fiñaringui?
13¿Imashpata Taita Dioshuanga ninandapacha fiñaringui?
¿Imashpata shimi llujshishcata, chashna rimajungui?
14Jucha illaj runacunaca, ¿shujllapash tiyangachu?
Huarmimanda huacharishcacunaca, ¿shujllapash alita ruraj tiyangachu?
15Diosca, Paipajlla causajcunataca alimi canga yangachu.
Jahua pachapash, Paipaj ricuipica napacha mapa illajchu.
16Na alitalla ruraj runacarin, ¿maitata ali cangayari?
Paica, ¿nachu, ñapash yacuta ufiajshna na alita rurajun?
17Ñuca villajujta uyahuayari.
Ñuca ñavihuan ricushcatami, canman villagrini.
18Alipacha yachajushcacuna ñucanchiman villashcatami villagrini.
Paicunapaj ñaupa taitacunamanda, na pacashpa ñucanchiman parlashcatami villagrini.
19Cai llactataca, chai taitacunamanllami cararca.
Paicunapaj llacta chaupitaca, na rijsishca runacunaca, na yali usharcachu.
20Diosta na manllaj runaca, tucui causaipimi, nanaihuan llaquilla causajun.
Llaquichij runa mashna huatata causanapash, pacashcami tiyajun.
21Paipaj rinripica, ninan llaquicunata apanatami uyajun.
Pai tucuipi ali causajujpimi, tucuchij runa shamushpa tucuchinga.
22Paica, yana yana tutapi cashpa cutin tigramunataca, na crinchu.
Paica, espadahuan huañui tucunallami causajun.
23Paica, micunata mascashpa, muyundita purishpami:
‘¿Micunaca maipitayari?’ nijun.
Paica yana yana tutaman rinataca alimi yachan.
24Llaquicunapash, huacaicunapashmi, paitaca muspachinga.
Paita llaquichingapaca, jatun mandaj macanajungapa alichirishcalla shamujshnami llaquichinga.
25Paillatami, Taita Diostaca fiñashpa shayarishca.
Paillatami, tucui ushaita charij Diosta na cazushpa causajurca.
26Paica imatapash na manllashpami, Diostaca jariyarca.
Jarcarina ninan shinlli escudocunahuanmi calpajurca.
27Paica ninanda charijyashpami chashna carca.
Pai tucui charishcacunapash ashtahuan mirajpimi chashna carca.
28Paica, llaquinayaita tucuchi tucushca pueblocunapimi causajurca.
Pipash na causajuj urmashca huasicunapimi causajurca.
29Pai ali canaca, na unaicaman cangachu.
Pai imatalla charishcacunataca, ashtahuanga na mirachi ushangachu.
30Manllanayai yana yana tutapi cashpaca, na quishpiringachu.
Ninami, paipaj tucui charishcacunatapash rupachishpa tucuchinga.
Paipaj shimihuan, Dios fucujpimi huañunga.
31Umachishpa imata nijpipash, na crinachu canguichi.
Chaicunata crishpaca umachi tucunguichimi.
32Paica, huañuna punlla nara pactajpillatami, huañunga.
Paipaj miraicunapash, na tiyangachu.
33Paica, malqui illaj uva yurashnami canga.
Paica, olivo yuramanda sisacuna urmajshnami canga.
34Diosta na manllajcunapaj tandanajuipash, llaquinayaitami tucuchi tucunga.
Imatapash pacalla cujpi charishca huasicunataca, ninami tucuchinga.
35Paicunaca, na alitalla rurashpa causanajushpami, llaquichi tucurca.
Paicunaca, umachina yuyaihuanllami causanajun” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
