1Llactata jatun mandajcunatapash, caishuj mandajcunatapash manllaihuan cazushpa, ima alitapash ucha ruranajuchunmi yarichina cangui.
2Ama pitapash na alicachishpa, pihuambash na fiñanajushpa, ali shunguhuan, tucuicunata juyachunmi yachachina cangui.
3Ñucanchipash pundaca, juizu illaj, pitapash na cazuj, chingashcami causarcanchi. Imatapash na alitalla rurachun yarichimujta gañangunashna cazushpami, chaitara rurashpa cushijuj carcanchi. Imatapash na alitalla rurashpami, shujcuna imata charijtapash “ñucapaj cashcanman” yashpa ricuj carcanchi. Shinallata, millanayachi tucushpa, caishuj chaishuj millanayachirishpami pundaca causarcanchi.
4Chashna cajpipash, ñucanchita Quishpichij Taita Diosmi, tucui gentecunata ninandapacha llaquishpa, juyajushcata ricuchimurca.
5Ima alitalla ñucanchi rurashcamandaca na quishpichircachu. Ashtahuangarin, ñucanchita ninanda llaquishpallami quishpichirca. Shinallata, ñucanchi juchacunata maillashpami, Paipaj Espirituta carashpa, shuj mushuj huahua huacharishcatashna ñucanchitaca quishpichirca.
6Chai Espiritutaca, Taita Diosmi ñucanchita Quishpichij Jesucristomandalla, tucuicunaman talijshna cachamurca.
7Taita Diosca, ñucanchita ninanda juyashpallami, alitalla rurashcatashna chasquirca. Chashna cashpami, causaita causagrinata japigrinata yariajlla cushijushpa shuyanajunchi.
8Cai shimicunaca napacha llulla cajpimi, shinllipacha rimashpa yachachina cangui. Taita Diosta crijcunataca, imatapash alita rurashpa causachunmi chashna yachachina cangui. Chashna alita rurashpa causanaca tucuicunapaj alipachami.
9Ashtahuangarin yanga parlocunata, ñaupa taitacunamanda parlocunata, imatapash nirishpa fiñanajunata, mandashca shimicunamanda rimarinataca saquinami cangui. Chaicunaca imapapash na ali, yanga parlocunami.
10Crijcunapura fiñanajushpa, shicanyarichun yachachij runataca, shuj cutin cashpa, ishcai cutin cashpapash shinllita rimangui ninimi. Chaita na cazujpica, llujchishpami cachana cangui.
11Paillata, ninanda pandarishpa juchacunata rurashcamanda jatun llaquiman rina cajtami yachana cangui.
Imaguta rurachumbash Titomanmi mingashca12Artemas huauquita, Tíquico huauquita cambajman cachamujpica, Nicópolis puebloman ñucahuan tuparingapa ucha shamungui ninimi. Tamia punllacunapica chaipi yalingapami munajuni.
13Cai pachapi mandashca shimicunamanda rimaj Zenas runaman, Apolos runamambash, ama imagupash illaj rinajuchun, aliguta ricushpa carapangui.
14Chashna rurajta ricushpami, ñucanchi huauquicunapash, imagupash illajcunaman caranata yachajushpa alita ruranajunga.
“Taita Dios bendiciapachun” nishpami tucuchishca15Ñucahuan caipi cajcunapash tucuillami candaca, “alillachu capangui” ninajun. Ñucanchita juyaj crijcunatapash, “alillachu capanguichi” nijunmi nishpa villapangui. Taita Diospash cangunataca ninanda juyachun nipanchimi. Chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
