Psalms 48 - Quichua Imbabura 2016

Sion puebloca, juyailla punchapamba cashcamandaCoré shuti runapaj miraicuna rurashca Salmomi.

1Mandaj Diosca ninan ushaita charijpimi, ninandapacha alicachina canchi.

Ñucanchi Taita Diospaj pueblopi, Paipajlla lomapimi jatunyachina canchi.

2Tucuicuna ninanda cushijuna, juyailla lomagumi.

Sion shuti lomaguca, janajmanmi tiyajun.

Chaica, Jatun Mandajpaj pueblomi.

3Pai mandana huasicunapica, Taita Dios huacaichijujtami yachanchi.

4Llactacunata jatun mandajcunaca, tucuicuna tandanajushpami shamunajurca.

5Chayamushpa ricushpaca, ninandami manllarinajurca.

Chashna manllarishpami, pacajungapa calpanajurca.

6Chaipillatami, paicunaca ninanda chujchunajurca.

Huahuata ungugrijuj huarmishnami, caparinajurca.

7Indi llujshimujmanda shinlli huairahuanmi,

Tarsis pueblomanda jatun barcocunataca faquircangui.

8Ñucanchi uyashcataca, tucuitami ricushcanchi.

Tucuita Mandaj Diospaj pueblota, ñucanchi Taita Diospaj chai pueblotaca,

causaita causaicamanmi, Taita Diosllata shinllitapacha charijunga. Selah

9Taita Dioslla,

Can ninan juyaita charijtaca tucuicunami yachanchi.

Cambaj huasi ucupimi chaitaca yachanchi.

10Taita Dioslla,

Cambaj Shutitaca ninandami alicachipanchi.

Cai pacha manñacunacaman Candaca, chashna alicachinajun.

Ninan ushaita charij Cambaj maquihuanga, alitallami rurajungui.

11Sion lomapi causajcunaca ninandami cushijunga.

Judá llactapi causajcunaca, ninandami cushijunga.

Can alitalla rurashcamandami, ninanda cushijunga.

12Sion lomapi pueblotaca muyundita purigrichi.

Mashna torrecuna tiyashcata yupagrichi.

13Canllaman pircacunatapash, aliguta ricunguichi.

Mandashpa tiyajuna huasicunatapash ricunguichi.

Chaicunataca, cangunapaj jipa miraicunaman villangapami ricuna canguichi.

14Taita Diosca, causaita causaicaman ñucanchi Taita Diosmi.

Paimi, ñucanchi huañushca jipapash, ñucanchihuan canga.