OSEAS 8 - Quichua Imbabura 2016

Israelcunata jarcashpa rimashcamanda

1Ricushpa shayaj runa, trompetata huacachishpa villayari.

Jatun angashnami, Mandaj Diospaj huasita tucuchingapa shamunajun.

Ñucahuan ari ninajushcata saquishpa,

Ñuca mandashca shimicunata na cazushcamandami, chashna llaquichi tucunga.

2Israelcunaca, Ñucatami caparinajurca:

‘Ñucanchi Taita Dioslla, Candaca rijsipanchimari’ nij tucushpami caparinajunga.

3Israelcunaca, na alitalla ruranajushcamandami, fiñajcuna catiriyashpa llaquichinga.

4Paicunaca, Ñucata na tapushpami, jatun mandajcunatapash churanajurca.

Ñuca na yachajtami, cati mandajcunatapash churanajurca.

Paicunapaj, culquihuan, curihuan rurashca dioscunata catinajushpami, ninan llaquita apanajurca.

5Samaria pueblopi causajcuna,

cangunallata rurashca shicu diosta mañashpa causanajushpami, Ñucamanda caruyarcanguichi.

Chaimandami, chai pueblopi causajcunahuanga, ninandapacha fiñarishca cani.

Paicunaca, mapa illaj causaitaca napacha ushashpami, chashna causanajurca.

6Cai Israelcunapaj rurashcalla shicu diosca, chashna ruranata ali yachaj runa rurashcallami.

Na Taita Dioschu.

Samaria pueblopi tiyajuj rurashcalla shicu diostaca, ñutushpami tucuchisha.

7Paicunaca, huairata tarpushpa, acapanata cozechanshnami, ninanda llaquichi tucunga.

Ima granota cozechanapash illangami.

Asha trigo jacuta rurashcatapash, na rijsishca runacunami quichushpa micunajunga.

8Israelcunaca, tucuillami tucuchi tucunga.

Shuj llacta gentecunapaca, na munanayai mangashnami tucunga.

9Israelcunaca, Asiria llacta gentecunapajman,

sacha burrushna calpanajushcamandami, chashna llaquichi tucunga.

Efraín aylluca, shujcuna yanapachunmi culquita cunajushca.

10Maijan llactacunaman ashtaca culquita cunajushpapash na quishpiringachu.

Paicunataca, asha huatacunatami tandachishpa caru llactacunaman cachashpa llaquichisha.

Paicunaca, Jatun mandajpash, cati mandajcunapashmi llaquichinga.

11Efraín ayllucuna,

cangunaca altarcunata rurashpami juchata rurarcanguichi.

12Mandashca shimicunata quilcashpa cujpipash,

yangapi churashpami na cazurcanguichi.

13Ñucaman cushpa animalcunata huañuchishca aichatapash cangunami micurcanguichi.

Chashna rurashcataca, Mandaj Dios Ñucaca, napacha alicachinichu.

Cunanga, chashna juchata rurashcamandami,

cutin Egipto llacta gentecuna llaquichinajuchun saquigrini.

14Israelcunaca, paicunata ruraj Diostaca cungashpami,

rurashcalla dioscunaman huasicunata ruranajurca.

Judá llactapi causajcunapash, pueblocunapimi muyundi pircacunata churanajurca.

Chai pueblocunatapash, huasicunatapash, tucuillami rupachishpa tucuchisha” nircami.