MIQUEAS 1 - Quichua Imbabura 2016

Samaria pueblotapash, Jerusalendapash llaquichinamanda

1Jotam, Acaz, Ezequías shuti jatun mandajcuna, Judá llactata mandanajui punllacunapimi Mandaj Diosca, Moreset pueblomanda Miqueas runaman, cai shimicunata villarca. Miqueas runaca, Samaria pueblota, Jerusalén pueblota llaquichinatami ricushca carca.

2Tucui gentecuna, uyaichi.

Cai pachapash, cai pachapi tucui ima tiyajcunapash ali uyaichi:

Cangunata llaquichinataca, Mandaj Jatun Diosllatami,

Paipajlla huasimanda ricushpa llaquichinga.

3Mandaj Diosca, Pai causajuj pushtumanda llujshishpami,

cai llacta urcucunata sarushpa, urai shamunga.

4Pai sarujpimi urcucunaca, ninapi vira yacuyajshna tucuringa.

Pugru pambacunapash, jatun yacu jatarishpa jacayachishpa saquishcashnami tucunga.

5Jacobpaj mirai Israelcuna na cazushpa juchata rurashcamandami,

tucui cai llaquicunaca japinga.

Jacobpaj miraicunaca, ¿nachu Samaria pueblopi juchata rurashcanga?

Judá llactapi altarcunaca, ¿nachu Jerusalenbi tiyanajun?

6Mandaj Diosca: “Shinamandami Samaria pueblotaca, rumi mundundalla saquisha.

Uvata tarpuna alpatami rurasha.

Pircashca rumicunatapash, pugru pambaman shitashpami,

callaripi churashca rumicunatapash llujchisha.

7Paicunapaj rumi dioscunatapash, ñutushpami saquisha.

Paicuna imatalla charishcacunataca, tucuillatami rupachisha.

Paicunapaj rurashcalla dioscunatapash, faquishpami tucuchisha.

Paicunaca, culquimanda huainayaj huarmicunashnami, culquita tandachinajurca.

Chaicunaca, culquimanda huainayaj huarmicunapajllatami tigranga” nircami.

8Shinamandami ninanda caparishpa, churajunapash illaj, chaqui lluchulla purisha.

Chacal, avestruz animalcunashnami, llaquinayaita huacasha.

9Samaria pueblopi causajcunapaj nanaica, na jambi ushanallami.

Chai ungüica, Judá llactacamanmi chayamurca.

Ñuca llactapuracuna causanajuj, Jerusalén pungucamambashmi chayamurca.

10Chai llaquicunataca, Gat shuti pueblopica na villanachu canguichi.

Na yapa huacanachu canguichi.

Chai llaquihuanga, Bet-le-afra shuti llactapi tiyaj ñutu alpapimi shitarina canguichi.

11Safir shuti pueblopi causajcunalla,

pinganayaita lluchulla ñaupashpa richiyari.

Zaanán shuti pueblopi causajcunaca, na yanapangapa llujshingachu.

Bet-esel shuti pueblopi causajcunataca, llaqui japijpimi na yanapai ushanga.

12Marot shuti pueblopi causajcunaca, ali causanatallami ninanda munanajurca.

Chaimandami Mandaj Diosca, Jerusalén pungucaman llaquicunata urai cachamurca.

13Laquis shuti pueblopi causajcunalla,

carretacunapica ali calpaj caballocunata huataichiyari.

Cangunami, Sión pueblopi causajcunataca, juchata ruranata callarichircanguichi.

Israel llactapica, cangunami juchata rurashpa causarcanguichi.

14Shinamandami cangunaca,

Moreset-gat shuti pueblopi causajcunahuanga cutinga ñana tuparina canguichi.

Aczib shuti pueblopi huasicunaca,

Israel llactata jatun mandajcunata umachingapami canga.

15Maresa pueblopi causajcunalla,

cangunata mandachunga, shuj gentecunatami cachamusha.

Juyailla sisashna Israelcunaca,

Adulam shuti pueblomanmi calpanajunga.

16Judá llactalla, cangunapaj juyashca huahuacunamandaca, ajchata tucuilla ruturichiyari.

Israel llactapi causajcuna, shuj llactaman prezu apai tucushcamandaca,

jatun angashna lluchu uma tucuichiyari.