APOCALIPSIS 20 - Quichua Imbabura 2016

Huaranga huatacunamanda

1Jahua pachamanda, shuj ángel urai shamujtami ricurcani. Paica, manllanayai yana yana ucupaj pascanatapash, jatun cadenatapash apashpami shamujurca.

2Chai angelmi, dragondaca japirca. Pundamandapacha causajuj culebrapash, diablopash, Satanaspash, paillatami. Paitaca, huaranga huata pactangacamanmi huatarca.

3Chai diablotaca, manllanayai yana yana ucuman shitashpami, pungutapash vichashpa sellashpa saquirca. Llactacunapi causajcunata, huaranga huata pactangacaman, ama ashtahuan umachijuchunmi, chashna shitarca. Huaranga huata pactashca jipami, ashacamanlla cutin cacharinga.

4Chai jipallami, mandangapa tiyarinacunata ricurcani. Chai tiyarinacunapimi, Dios ushaita carajpi, tapuchishpa llaquichingapa tiyarinajurca. Jesusmandapash, Diospaj Shimimandapash villanajushpa, cungata fiti tucushpa huañuchi tucushcacunapaj almacunatapashmi ricurcani. Paicunaca, manllanayai animaltapash, paiman rijchajta rurashcatapash, na alicachijcunami carca. Shinallata, chai animalpaj shutita, maquipi cashpa, frentepi cashpapash, na churai tucushcacunami carca. Paicunami, huaranga huatacaman Cristohuan mandashpa causanajurca.

5Paicunami, punda causarina chayajpi punda causarirca. Ashtahuangarin, caishuj huañushcacunaca, huaranga huata pactangacamanmi nara causarirca.

6Punda causarina chayajpi causarinata charij, Diospajlla causajcunaca, ninanda cushijunguichi. Cangunataca, jipa huañuica na llaquichi ushangachu. Ashtahuangarin, paicunaca Taita Diospajta, Cristopajta ruraj sacerdotecuna cashpami, huaranga huatacaman Cristohuan mandanajunga.

7Huaranga huata pactajpimi, prezu tiyajuj Satanastaca cacharinga.

8Shina cacharijpica, cai pacha tucui chuscundi suyucunapi tiyaj, Gog, Magog llactacunapi causajcunata umachingapami llujshimunga. Chai llactacunapi causanajuj macanajuj runacunatami, macanajugrichun tandachijunga. Chaicunaca, mama cucha manñapi illul alpashna, na yupai ushanalla ashtaca ashtacacunami canga.

9Chaicunaca, tucuimanda muyundi shamushpami, Diospajlla causajcuna tiyanajuj pambatapash, Pai juyashca pueblotapash, chaupipi churashpa shayanajurca. Shina shayanajujpimi Taita Diosca, jahua pachamanda ninata cachamushpa paicunataca tucuchirca.

10Shinallata, umachishpa causaj diablotaca, azufrehuan rupajuj nina cuchamanmi shitarca. Chaimanllatami, manllanayai animalpash, llulla profetapash shitai tucushca carca. Paicunaca chaipimi tutapash, punllapash, causaita causaicaman ninanda llaquichi tucunajunga.

Yuraj tiyarinapi tiyarishpami tapuchishpa llaquichijunga

11Chai jipami mandangapa yuraj tiyarinatapash, chaipi tiyajujtapash ricurcani. Paipaj ñaupajmandaca cai pachandi, jahua pachandi chingajpimi, paicuna maipi tiyanajushcapash na ricurirca.

12Shinallata huañushcacunataca, jatungunatapash, uchillacunatapash, Taita Diospaj ñaupajpi shayanajujtami ricurcani. Librocunatapash pascanajujtami ricurcani. Shinallata, shuj librotapashmi pascarca, chaica causaita causagrinata villajuj libromi carca. Caishuj librocunapica, paicuna causajushpallata imata rurashcata quilcashca tiyajujta ricushpa llaquichinami carca.

13Shinallata, mama cuchapashmi chaipi huañushcacuna tiyashcataca tigrachirca. Huañuipash, Hadespash, paicunapi huañushcacuna tiyashcataca tigrachircami. Tucui paicuna imatalla rurashcacunatami ricuchijurca.

14Huañuitapash, Hadestapash, nina rupajuj cuchamanmi shitarca. Chaiman shitai tucunaca jipa huañuimi canga.

15Causaita causagrinata villajuj libropi shutita maijan na quilcachishcacunaca, nina rupajuj cuchamanmi shitai tucurca.