1Ariel pueblolla, Ariel pueblolla, ¡aij imachari tucungui!
David causajushca pueblolla.
Huatandi, huatandi jatun cushijuna punllacunata rurashpa catijuilla.
2Ashtahuangarin, Ñucami Ariel pueblotaca, jatun llaquipi churasha.
Shinamandami, ninan llaquicunahuan causajunga.
Chai puebloca Ñucapaca, ninata rupachina pushtushnami tucunga.
3Ñucami, cangunapaj muyundipi carpacunata shayachishpa chapachun churasha.
Ashtaca macanajuj runacunatami, muyundi churasha.
Macanajungapa yaicuna, baluartecunatami shayachisha.
4Chashna rurajpimi, ninanda pingai tucungui.
Can rimashcapash, alpa ucumanda rimashcashnami uyaringa.
Alpa ucumanda, alma chingajlla rimajunshnami uyaringa.
5Canda fiñaj runacunaca, ñutu alpashna ashtacapachami canga.
Ninan shinlli ashtaca runacunapash huairapi jupa yalijshnami, cungashcapi ñapash shamunga.
6Tucuita Mandaj Diosmi, ninanda culun nishpa ricuj shamunga.
Ninanda alpa mama cuyurishpa, manllanayaita culun nishpami shamunga.
Ninanda yacu jatarijta tamiajuj huairahuan,
tucurijta rupachij ninahuanmi ricuj shamunga.
7Ariel pueblopi causajcunahuan macanajungapa shamuj gentecunaca, tuta puñushpa muscuipi ricurijshnami chinganga.
Cai pueblopi causajcunahuan macanajushpa, jatun torretapash urmachishpa, ninanda muspachij runacunaca chashnami chinganga.
8Ninanda yarjachijuj runa micujushpa muscujshnami canga.
Ashtahuangarin, yarjaillatami rijcharinga.
Yacunayachijun runapash, yacuta ufiajushpa muscujshnami canga.
Ashtahuangarin, shaijushca yacunayaihuanllatami rijcharinga.
Sion shuti urcupi causajcunahuan macanajungapa, tucui llactacunamanda shamuj runacunaca, chashnami tucunga.
Israelcunaca, mishqui shimi jayaj shungucunami tigrashca9Cangunaca juizu illajcunashna, ñausacunashna causaichilla.
Vinota, sidrata na ufiashca cashpapash, machashcashna caiman chaiman urmanajuichilla.
10Mandaj Diosmi, cangunamanga puñunajujshna causana espirituta cachamurca.
Chaimandami, cangunapaj profetacunapash ñausashna tucunajushca.
Shinallata, finduhuan ñavita quilpashcashnami tucushca.
11Ima tucunata villanacunapash, quilcashca librota pillushpa sellashcashnami tucushca.
Chashna sellashcata maijambash quilca catinata yachajman:
“Caita quilca catishpa uyachi” nijpica:
“Sellashcamari, na quilca cati ushanichu” ningami.
12Na cashpaca, na quilca catinata yachajman librota cushpa:
“Caita quilca catishpa uyachi” nijpica:
“Na quilca cati yachanichu” ningami.
13Jatun Diosca, cashna nin: “Cai genteca, shimihuanllami alicachinajun.
Shimi jahuallami Ñucataca alicachinajun.
Ashtahuangarin paicunaca, Ñucamandaca carupimi.
Ñucatapash, runacuna mandashpa yachachijpillami cazunchi ninajun.
14Shina cashcamanda, cutinmi pipash na rurai ushanallacunata rurashpa, ninanda manllachigrini.
Ali yachajushcacunapaj yuyaipash chingangami.
Ali yuyaita charijcunapaj juizupash tucuringami” ninmi.
15Mandaj Diosta na cazushpa pacalla imatapash rurajcunaca, ¡aij imachari tucunga!
Paicunaca, ali yachachishcacunata saquishpami, yana tutapishna causanajushpa, cashna ninajun:
“Ñucanchitaca pipash na ricunllu, pipash na yachanllu” ninajunmi.
16Canguna na alita rurashcacunaca, mangata rurana turushnami, cangunapaj causaipica ricuringa.
Ña rurashca tiyajuj mangaca, paita ruraj runataca:
¿Canllu ñucataca rurahuarcangui, nishpa tapungachu?
¿Manga rurana alpapash, mangata rurajuj runataca:
Imatallapash na yachanguichu, ningachu?
Israelcunata, llaquimanda quishpichina cashcamanda17Nachu ¿Cunanmanda asha huatacuna jipaca, Líbano quirucuna tiyaj pambapica, ali fucuj alpacuna tucunga?
Nachu, ali fucuj alpacunaca, ¿Sachaman tigranga?
18Chai huatacunapica, na uyajcunapash libropi quilcashcata quilca catijtaca uyanajungami.
Ñausacunaca, tutayashca cajpipash, yana yana tuta cajpipash ricungallami.
19Shinamandami aliguta causaj runacunaca, Mandaj Dioshuan ashtahuan cushijunga.
Tucuicunata ashtahuan yali imagutapash na charijcunapashmi, Israelcunapaj jucha illaj Dioshuan ninanda cushijunajunga.
20Ñapash fiñarij runaca, tucuchi tucungami.
Na cazushpa asijpash, chingangallami.
Na alita ruranamandalla, puñuitapash na puñujcunaca, tucuillami tucuringa.
21Na alita rimashpa, juchata rurachijcunaca tucuringami.
Pueblo pungupi yachachij runacunata, umachingapa munajcunaca tucuringami.
Alita rurajcunata yangamanda juchachijcunaca tucuringami.
22Chaimandami, Abrahamda quishpichij Mandaj Diosca, Jacobpaj miraicunataca cashna nijun:
“Cunanga, Jacobca na ashtahuan pingai tucushpa, ñavicuna pucayangachu.
23Paipaj miraicunataca, Ñuca ninan ushaihuan alichijpimi, Ñuca shutita alicachinajujpi, Jacobca ninanda cushijunga.
Israelpaj Taita Dios Ñucatami, manllashpa causanajunga.
24Panda yuyaita charijcunapash, ali yuyaitami japinajunga.
Na alicachishpalla parlajcunapash, Diosmanda yachajungami” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
