1 REYES 13 - Quichua Imbabura 2016

Judá llactamanda profeta, Jeroboam runata shinlli rimashcamanda

1Diosman inciensota altarpi cushnichingapa Jeroboam runa shayajujpimi, Diosmanda villaj runata, Mandaj Dios cachamujpi, Judá llajtapi tiyajuj Bet-el pueblomanda chayamurca.

2Diosmanda villaj runaca, Mandaj Dios mandajpimi, chai altarta fiñashpa cashna caparirca: “Altar, altar, Mandaj Diosca cashnami nijun: Davidpaj miraimandami, Josías shuti huahua huacharinga. Paimi lomacunapi tiyaj altarpica, Diosman inciensota cushnichij sacerdotecunataca huañuchinga. Shinallata, huañushcapaj tullucunataca chai altarpimi rupachinga ninmi” nircami.

3Chai punllallatami, pai villashca imashna pactanataca cashna nirca: “Mandaj Dios rimashca pactanaca cashnami canga: Cai altar faquirijpimi, chai jahuapi tiyajuj uchufapash taliringa” nircami.

4Bet-el shuti pueblopi tiyajuj altarca faquiringami nishpa, Diosmanda villaj runa caparijtami, jatun mandaj Jeroboam runaca uyarca. Chaipimi, paipaj maquita chutashpaca: “¡Chai runata japichi!” nirca. Chai chutashca maqui chaquijpimi, cutin cuyuchitaca na usharca.

5Shinallata altarpash faquirijpimi, chai altar jahuapi tiyajuj uchufapash talirirca. Mandaj Dios mandajpi, Diospajta ruraj runa villashcami, tucui pactarca.

6Chashna tucujpimi jatun mandajca, Diosmanda villaj runataca:

“Ñuca maqui ali tucuchun, canda Mandaj Diosta mañapai” nirca.

Shina nijpi, Mandaj Diosta mañajpimi, jatun mandajpaj maquica pundashnalla, cutin ali carca.

7Chai jipami jatun mandajca, Diosmanda villaj runataca cashna nirca:

“Ñuca huasipi micungapa ripashun, chaipimi imagutapash carapasha” nircami.

8Shina nijpimi Diosmanda villaj runaca, jatun mandajtaca cashna nirca:

“Cambaj huasipi ima tiyashcata chaupita carana cajpipash, na rishachu. Cai llactapica, imatapash na micushachu, yacutallapash na ufiashachu.

9Mandaj Diosmi ñucataca: Imatapash ama micunguichu, yacutallapash ama ufianguichu, ñandapash shuj ñanda tigramungui, nihuarca” nircami.

10Shina nishpami, Bet-el pueblomanda, rishca ñandaca na tigrashpa, shuj ñanda rirca.

11Bet-el pueblopimi, Diospaj profeta rucu taitagu causarca. Paipaj churi shamushpami, Diosmanda villaj runa, Bet-el pueblopi imatalla rurashcata villarca. Shinallata jatun mandajta imatalla nishcatapashmi, paipaj taitaman villajurca.

12Shina villajpimi, paipaj taitaca:

“¿Maijan ñandata rirca?” nishpa tapurca.

Shina nijpimi, paipaj churicunaca, Diosmanda villaj runa, Judá llactamanda shamushpa maijan ñanda tigrashcatapash ricuchinajurca.

13Chaimandami, paipaj churicunataca:

“Burruta apamugrichi” nishpa mandarca.

Burrupi tiyarinata churajpimi, tiyarishpa catirca.

14Catishpa rishpaca, encina yura ucupi tiyajujtami Diosmanda villaj runataca japigrirca. Chaipimi:

“¿Canllu, Diosmanda villaj Judá llactamanda shamushca, capangui?” nishpa tapurca.

Shina tapujpimi:

“Ari, ñucami cani” nirca.

15Shina nijpimi:

“Ñuca huasipi micungapa ripashun” nirca.

16Ashtahuangarin chai runaca, cashnami nirca:

“Canhuan tigraitaca napacha ushashachu. Cai llactapica, canhuanga imatallapash na micushachu, yacutallapash na ufiashachu.

17Taita Diosca, cashnami mandahuarca: Chai llactapica, imatallapash ama micunguichu, yacutallapash ama ufianguichu. Can rishca ñandapash ama tigrashpa shamunguichu, nihuarcami” nircami.

18Shina nijpimi catishpa rij runaca, llullashpa cashna nirca:

“Ñucapash canshnallata, profetami cani. Mandaj Dios cachamujpi, shuj ángel shamushpami: Tandaguta micuchun, yacutapash ufiachun, cambaj huasiman pushamugri, nihuarca” nircami.

19Shina nijpi tigrashpami, paipaj huasipica micunatapash micushpa, yacutapash ufiarca.

20Micushpa tiyanajujpimi, llullashpa tigrachimuj profetataca, Mandaj Diosca rimamurca.

21Shina rimamujpimi, Dios ima nishcata villaj, Judá llactamanda shamushca runataca, caparishpa cashna nirca:

“Mandaj Diosca cashnami nin: Ñuca mandashcata na cazushpami na pactachishcangui.

22Chai llactapica, ama micunguichu, yacutapash ama ufianguichu nishpa, Mandaj Dios mandashcataca na cazushpami micushcangui, yacutapash ufiashcangui. Chaimandami can huañushpaca, cambaj ñaupa taitacunata pambashcapica, na pambai tucungui, ninmi” nircami.

23Diosmanda villaj runa micushpa, ufiashpa tucuchijpimi, tigrachimuj runaca, pai tiyarishpa richun burrupica alichirca.

24Chai burrupi tiyarishpa rijujpimi, shuj león ñambi tuparishpa huañuchirca. Huañushpa ñambi sirijujpimi burrupash, leonbash chaillapita sirinajurca.

25Shuj runacuna ñanda rinajushpami, huañushca sirijujtapash, chaipi león sirijujtapash ricunajurca. Paicunami, rucu profeta causajuj puebloman chayamushpa ima tucushcata villanajurca.

26Ñanmanda tigrachimuj, profeta uyashpami, cashna nirca: “Taita Diosmanda villaj runami canga. Paitaca, Mandaj Dios mandashcata na cazushcamandami, Mandaj Dios nishcashnallata, león huañuchijuchun saquishcanga” nircami.

27Chai jipami, paipaj churicunataca: “burrupi tiyarishpa richun tiyarinata churaichi” nijpimi tiyarinata churarca.

28Chai burrupi rishpami, Diosmanda villaj runataca, ñambi huañushca sirijujta tarigrirca. Shinallata burrupash, leonbash chaipillatami carca. Leonga huañuchishpapash na micushcachu carca, burrutapash na chugrichishcachu carca.

29Shinamandami, profetaca, Diosmanda villaj runa huañushcataca, burrupi apachishpa aparca. Diospaj rucu profetaca, ninanda huacashpami, pueblopi pambangapa apamurca.

30Paita pambachun rurachishca utujupi pambashpami: “¡Aij, ñuca huauquigulla!” nishpa, ninanda yarishpa huacanajurca.

31Chashna pambashca jipami, paipaj churicunataca cashna nirca:

“Ñuca huañujpica, Diosmanda villaj runata pambashcapillata pambahuanguichi. Ñuca tullucunataca, paipaj tullucunahuan pacta churapanguichi.

32Mandaj Dios rimashca shimita pai caparishpa rimashca shimicunaca pactangami. Paica, cashna nishpami rimarca: ‘Bet-el pueblopi tiyaj altarpash, Samaria llacta pueblocunapaj, lomacunapi tiyaj altarcunapash urmangami’ nishpami rimashca carca” nircami.

33Chashna tucunata yachashpapash Jeroboam runaca, pai na alita rurashpa causajushcataca, na saquircachu. Ashtahuangarin, rurashcalla dioscunaman lomacunapi tiyaj altarcunapi rupachishpa carachunmi, sacerdotecunata agllashpa Israelpuramanda churarca. Paica, maijambash chai munaita charijtaca, lomacunapi tiyaj altarcunapi sacerdote cachun churajllami carca.

34Jeroboam runa chashna na alita rurashcamandami, paipaj huasi ucupuracunatapash, cai pachamanda anchuchirca.