1Mandaj Diosta alicachinguichi, Paica alimari.
Paipaj ninan juyaica, causaita causaicamanmi.
2Mandaj Dios quishpichishcacunaca, chashnami nina canguichi.
Fiñajcunapaj maquimanda cacharichi tucushcacunami chashna nina canguichi.
3Tucui llactacunamandami tandachimurca.
Indi llujshimujmanda, indi huashajunmanda,
janajmanda, uramandami tandachimurca.
4Ñambash illaj, jichushca pambapi,
chulunlla pushtupimi, chingashca purinajurca.
Maipi causana pueblopash na taririjpimi purinajurca.
5Yarjaimanda, yacunayaimanda, huañunallami purinajurca.
6Chashna ninan llaquipi cashpami, Mandaj Diostaca caparishpa mañanajurca.
Paimi, chai llaquicunapica yanaparca.
7Ali ñandami, paicunataca pushamurca.
Juyailla pueblopi causaj shamuchunmi pushamurca.
8Mandaj Dios ninanda llaquishcamandaca alicachinguichi.
Cai pachapi causajcunaman, jatun manllarinacunata rurashcamandami alicachina canguichi.
9Yacunaihuan purijcunamambash, Paimi yacuta caran.
Yarjachijcunamambash, Paimi micunata caran.
10Huaquingunaca, yana yana tutapishna, huañunallami purinajurca.
Llaquicunahuanga, cadenahuan huatashcashnami causanajurca.
11Mandaj Dios rimashca shimicunata na cazushcamandami, chashna causanajurca.
Jahua pachapi causajuj Dios ali yuyaita cushcatapash na cazurcachu.
12Chaimandami, shinlli ruranacunapi churajpi, ninan llaquita apanajurca.
Paicuna urmajpi jatarichingapaca, pipash na tiyarcachu.
13Shina ninan llaquipi cashpami, Mandaj Diostaca caparishpa mañanajurca.
Diosmi, chai llaquicunamandaca llujchirca.
14Yana yana tutapishna, huañunalla purinajujtami cacharichirca.
Paicunapaj llaquicunataca tucuchircami.
15Mandaj Dios ninanda juyajushcamandaca alicachinami canguichi.
Cai pachapi causaj runacunaman, jatun manllarinacunata rurashcamandaca alicachinami canguichi.
16Paica, bronce pungucunataca faquircallami.
Pungupi jarcashca jirrucunatapash ñuturcallami.
17Juizu illajcunaca, paicunallata na cazushcamandami llaquichi tucurca.
Paicuna, na ali cashcamandami chashna llaquichi tucurca.
18Paicunaca, tucui micunatami millanayachirca.
Shina cashpami, ña huañugrinajurca.
19Shina llaquipi cashpami, Mandaj Diosta caparishpa mañanajurca.
Paimi, chai llaquicunamandaca llujchirca.
20Paipaj shimihuan rimashpami alichirca.
Jatun llaquimandami, paicunataca llujchirca.
21Mandaj Dios ninanda juyashcamandaca, alicachinami canguichi.
Cai pachapi causaj runacunaman,
jatun manllarinacunata rurashcamandaca, alicachinami canguichi.
22Paimanga, animalcunata cushpa huañuchishpami alicachina canguichi.
Pai ima alicunata rurashcataca, cushijushpami villana canguichi.
23Mama cuchata jatun barcocunapi shamujcunaca,
jatushpa, randishpami purinajun.
24Paicunami Mandaj Dios imatalla rurashcacunataca ricunajurca.
Shinallata, yacu ucucunapi jatun manllarinacunata rurashcatapashmi ricunajurca.
25Dios rimashpami, ninan huairata jatarichirca.
Chai huairami, caiman chaiman cuyurijuj yacutapash ashtahuan jatarichirca.
26Jahua pachacaman vichai rijshna cashpapash, cutinmi tigramurca.
Paicunaca, chashna llaquipi cashpami huañungashna manllarirca.
27Manllaimanda chujchushpami, machashcashna purinajun.
Paicuna, tucuita ali yachajushcapash yangallatami.
28Chashna llaquipi cashpami, Mandaj Diosta caparishpa mañanajun.
Paimi, chai llaquicunamandaca llujchinga.
29Paimi, ninanda huairajujtaca jarcashpa shayachin.
Caiman chaiman cuyurijuj yacutapash, casilla cachunmi jarcan.
30Yacu casilla tucujpimi, paicunaca ninanda cushijunajun.
Chashnami Diosca, barcocuna maipi shayarina pushtuman chayachin.
31Mandaj Dios ninanda juyashcamandaca, alicachinami canguichi.
Cai pachapi causaj runacunaman,
jatun manllarinacunata rurashcamandaca, alicachinami canguichi.
32Tucui gentecuna tandanajushpami jatunyachina canguichi.
Mandaj rucucuna tandanajushcapipash alicachinami canguichi.
33Diosca, jatun yacutapash, chaquishca pambata ruranllami.
Yacucuna llujshijujtapash chaquichinllami.
34Grano fucuj ali alpacunatapash, na fucuj alpaman tigrachinllami.
Chai alpapi causajcuna jatun na alita rurashcamandami, chashna ruran.
35Jichushca pambatapash, yacu cuchata ruranllami.
Chaquishca pambapipash, yacu llujshijuj pugyuta ruranllami.
36Chaipimi, yarjachijcunataca causachun churan.
Paicunami, causana pueblota rurashpa callarichin.
37Pambacunapi tarpushpami, uvacunata viñachinajun.
Chaicunaca, ashtacatami fucunajun.
38Dios bendiciajpimi, ashtacapacha miranajun.
Paicunapaj animalcunapash, na tucurinllu.
39Paicunaca, yangapi churai tucushpa, pingaichi tucushpami causanajun.
Na ali runacuna, jatun llaquicunahuan ninanda llaquichijpimi, chashna causanajun.
40Diosllatami, mandajcunataca yangapi churan.
Shinami, paicunataca ñangunapi chingashca purinajuchun saquin.
41Paillatami imagutapash na charij runataca jatarichin.
Ayllucunatapash, llamacunatashnami mirachin.
42Ima na alitapash na rurajcunaca, chaita ricushpami cushijuna canguichi.
Na alita rurajcunaca, upalla caichi.
43Caicunata pactachingapaca, ¿pipash ali yachajushca tiyanllu?
Shina tiyashpaca, Mandaj Dios ninanda llaquij cajta yachangapachami.
Who We AreWhat We EelieveWhat We Do
2025 by iamachristian.org,Inc All rights reserved.
