1Tucuita Mandaj, Israelcunapaj Taita Diosca, Moab llactata llaquichinamandaca, cashnami nirca:
“¡Aij Nebo shuti pueblolla, candaca tucuilla tucuchijpimi, pingaipaj saquirishcangui!
Quiriataim shuti pueblotapash mishashpa quichushcamari.
Misgab shuti pueblopi causajcunapash, ninan llaquipi cashpami, imata ruraitapash na ushanajurca.
2Moab llacta gentecunaca, na cutinga cushijuita charingachu.
Hesbón shuti pueblopimi, Moab llactata llaquichingapa chashna ninajurca:
‘Chai llactataca tucuillami tucuchina canchi’ nishpami rimarinajurca.
Madmena shuti pueblolla, cambashmi tucuilla tucuringui.
Candaca, espadahuanmi huañuchishpa tucuchinga.
3¡Horonaim shuti pueblopi causajcunapashmi ninanda caparinajun.
Chai pueblotaca, ninanda llaquichishpami tucuchinajun!
4Moab llactaca, ninandami llaquichi tucurca.
Chaipi causajcuna ninanda caparishpa huacashcami uyarirca.
5Vichai rina, Luhit shuti ñandaca ninanda huacashpami rinajunga.
Horonaim shuti ñanda urai rijcunapash, ninanda huacanajujtami, paicunata fiñajcunaca uyarca.
6Ama huañungapa, pacajushpa calpaichiyari.
Jichushca pambapi tiyaj retama yurashna causagrichiyari.
7Cangunaca, tucui imatalla charishcacunahuanmi, yariashpa jariyashpa causarcanguichi.
Chaimandami cangunapash, prezu apai tucugringuichi.
Quemos shuti rurashcalla diospash, paipaj sacerdotecunandi, paipaj mandajcunandimi prezu apai tucunga.
8Tucuilla pueblocunaman shamushpami, llaquichishpa tucuchinga.
Maijan pueblollapash na quishpiringachu.
Pugru pambacunapi, jatun pambacunapashmi, tucuchi tucunga.
Mandaj Diosllatami, chashna nirca.
9Angashna richun, Moab llactaman alasta cuichiyari.
Chaipi tiyaj pueblocunapica, pipash illajpimi, jichushca pambashna saquiringa.
10Mandaj Dios mandashcata na tucuita pactachij runaca, ninandami llaquichi tucunga. Espadahuan huañuchijuchun mandajpipash na pactachij runaca, ninandami llaquichi tucunga.
11Moab llactapi causajcunaca, pundamandapachami ima llaquipash illaj causanajurca. Shuj fundupilla unaita alichishca vinoshnami alipacha causanajurca. Vinota shuj fundumanda caishuj funduman na yalichishcashnami paicunaca, maijan llactamambash na prezu apai tucushpa, alipacha causanajurca” nijurcami.
12Mandaj Diosca, cashnatapashmi nirca: “Cunanga, shuj fundumanda shuj funduman yalichijcuna rurana punlla chayamushca. Chai punllapi shamushpami, chai vinotaca shuj funducunaman yalichinajunga. Funducunatapash, chushajta saquishpami, cara muchilacunatapash liquinajunga.
13Shina rurajpimi Moab llacta gentecunaca, Quemos shuti rurashcalla diosta yangallata charishcamanda, pingai tucunajunga. Bet-el shuti pueblota yariajlla causashcamanda, Israelcuna pingai tucushcashnami, pingai tucunajunga.
14¿Imashnata cangunaca: ‘Ñucanchica, ninan shinlli runacunami canchi,
ali macanajuj runacunami canchi’ nigringuichi?
15Moab llactataca, ñami tucuillata tucuchishca.
Pueblocunapash, llaquinayaitami tucurishca.
Chairalla viñaicunapash, alicachi tucushca runacunapash, cungata fiti tucungapami rinajushca” nijurcami Jatun Mandaj Diosca.
Paica, tucuita Mandaj Diosmi.
16“Moab llactapaj llaquicuna shamuna punllapash, ñami chayamugrin.
Jatun llaquica, ñapashmi shamujun.
17Paipaj muyundipi causajcunaca, tucuicunami llaquirina canguichi.
Chai llactata rijsijcunaca, tucuicunami:
‘¿Imashpata alipacha, shinlli juyailla caspishna puebloca tucurishcayari?’ ninami canguichi.
18Dibón shuti pueblopi causajcunalla,
ninanda alicachi tucushpa causajushcamanda, cunanga chaquishca alpapi tiyarichiyari.
Moab llactata llaquichishpa tucuchijcunamari, cangunahuan macanajungapa shamushca.
Paicunami, cangunapaj jatun pircacunatapash urmachirca.
19Aroer shuti pueblopi causajcunalla, ñambi shayarishpa ricuichiyari.
Quishpiringapa pacajushpa calpajcunataca:
‘¿Ima llaquita tiyarca?’ nishpa tapuichiyari.
20Moab llactaca ninanda llaquichi tucushpami, pingai tucurca.
Shina cashcamandaca, ninanda caparishpa huacaichiyari.
Moab llacta tucuchi tucushcataca, Arnón shuti yacu manñapi causajcunamambash villaichiyari.
21Jatun pambacunapi tiyaj pueblocunamanmi, jatun llaqui chayamurca.
Holón, Jahaza, Mefaat,
22Dibón, Nebo, Bet-diblataim,
23Quiriataim, Bet-gamul, Bet-meón,
24Queriot, Bosra shuti pueblocunamanmi, jatun llaqui chayamurca.
Moab llactapica, tucui muyundi pueblocunamanmi, jatun llaquicunaca chayamurca.
25Ninan ushaita charij Moab llactaca tucurircami.
Paica ushai illajmi saquirirca” ninmi Mandaj Diosca.
26Moab llacta gentecunataca juizu illajtashna saquichiyari.
Paicunaca, Mandaj Dios Ñucatami na cazurca.
Moab llacta gentecunaca, paicuna shunguta tigrachishca jahuapillatami urmanajunga.
Paicunataca, na alicachishpa, asishpa ricushca cachun.
27Cangunaca, ¿Nachu Israelcunataca, shuhuacunata japinshna na alicachishpa rimanajurcanguichi?
Paicunata yarishpa parlanajushpaca, ninandami asinajurcanguichi.
28Moab llactapi causajcunalla, pueblocunamanda llujshishpa, rumi jacacunapi causagrichiyari.
Jatun huaicu patapi, paloma tazinda rurashpa tiyarinshna causagrichiyari.
29Moab llactapi causajcuna ninanda jariyashcataca uyarcanchimi.
Paicunaca, ninanda jariyashca, jatun tucushca, pitapash na manllashpa, pitapash na cazujcunami carca.
30Mandaj Diosca, cashnami nin:
“Ñucaca, paicuna ninanda fiñarishcatapash rijsinimi.
Ashtahuangarin imatapash na rurai ushangachu.
Paicuna na cazushpa jariyashcapash, yangallatami canga” ninmi.
31Shinamandami ñucaca, Moab llactamandaca ninanda huacagrini.
Tucui Moab llacta gentecunamanda, Kir-hares shuti pueblopi causajcunamandaca, ninandami huacagrini.
32Sibma shuti pambapi tiyaj uva chagralla,
canmandaca Jazer shuti pueblopi causajcunamanda huacashcashnami, ninanda huacasha.
Cambaj malqui yuracunaca, mama cucha chimbacamanmi mirarca.
Jazer shuti cuchacamanmi, ñaviyashpa viñarcangui.
Shina juyailla viñashpa fucushcata tandachinalla cajpimi, fiñajcuna chayamushpa tucuchirca.
33Moab llactapi ali fucuj pambacunapi ninanda cushijunapash, na tiyangachu.
Uvacunata cutana pushtucunapipash, vinoca illangami.
Candashpandi uvacunata sarunapash tucuringami.
Ima candanapash na tiyangachu.
34Hesbón shuti pueblopi causajcunaca, Eleale shuti pueblocaman uyarijtami, ninanda huacanajurca.
Jahaza shuti pueblocamanmi uyarirca.
Nimrim shuti yacupashmi, tucuchi tucunga.
Chaimandami Zoar shuti pueblomandaca,
Horonaim shuti puebloman uyarijta, quimsa huatata charij shicucunashna huacanajurca.
35Mandaj Diosca, cashnami nin:
“Moab llacta gentecunataca tucuchishami.
Rurashcalla dioscunaman lomacunapi animalta carajcunataca tucuchishami.
Chai rurashcalla dioscunaman inciensota cushnichijcunatapash tucuillami tucuchisha” ninmi.
36Shinamandami ñuca shunguca, Moab llactamandapash,
Kir-hares shuti pueblomandapash, gaitacunata taquijpishna huacasha.
Paicuna imatalla charishcacuna tucuilla tucurishcamandami, chashna huacasha.
37Tucuicunapaj uma ajchatapashmi rutunga.
Tucuicunapaj barbastapashmi anchuchinga.
Tucuicunapaj maquipipashmi, aspishpa chugrichinga.
Tucuicunami cañamuta churajunajunga.
38Mandaj Diosca, cashnami nin:
“Ñucami, Moab llactataca maucayashca funduta na munashpa, ñutujshna llaquichircani.
Shinamandami, Moab llacta gentecunaca, tucui huasi jahuacunapipash, ñangunapipash ninanda huacanajunga” ninmi.
39¡Ninanda llaquirishpa huacaichiyari!
¡Moab llacta gentecunaca, ninandamari llaquichi tucushca!
¡Moab llactataca, jichushpa saquishpami, tucuicuna na alicachishpa rimanajurca!
Paicunapaj muyundipi causajcuna, ninanda na alicachishpa, llaquichijpimi causanajunga.
40Mandaj Diosca, cashnami nin:
“Moab llactata llaquichingapaca, alasta pascashpa jatun anga shamujshnami shamunga.
41Shina shamushpami, uchilla pueblocunatapash,
jatun pircahuan jarcashca pueblocunatapash mishashpa quichunga.
Chai punllapica, Moab llactapi causaj shinlli runacunapash, ninan manllaihuan causaj huarmishnami tucunga.
42Moab llactapi causajcunaca,
Mandaj Dios Ñucata fiñachishcamandami, tucuilla tucuchi tucunga” ninmi.
43Mandaj Diosca, cashnatapashmi nin:
“Moab llacta gentecunalla,
cangunataca, ninan manllaimi japinga.
Lazupi japi tucunshnami, llaquichi tucunguichi.
44Manllarishpa pacajungapa calpashpapash, utujupimi urmanguichi.
Utujumanda llujshishpapash, lazupimi japi tucunguichi.
Ñucami, Moab llactapi causajcunaman jatun llaqui punllacunata cachamugrini” ninmi Mandaj Diosca.
45“Pacajushpa calpajcunaca, Hesbón shuti pueblomanmi, ushai illajcuna chayarca.
Ashtahuangarin Hesbón shuti pueblomandapash,
Sehón shuti pueblo chaupimandapash,
rupajuj nina llujshishpami, Moab llacta manñacunatapash rupachijurca.
Na cazuj gentecunaca, umacamanmi rupanajurca.
46¡Aij Moab llacta gentecunalla!
Quemos shuti rurashcalla diosta yarij gentecunaca tucurircami.
Cangunapaj churicunapash, ushicunapash,
shuj llactamanmi prezu apai tucunajurca.
47Ashtahuangarin jipa punllacunapica,
Moab llactamanda prezu apai tucushcacunataca cutinmi tigrachimusha” ninmi Mandaj Diosca.
Moab llactata imashna llaquichinata villashca shimicunaca, caicamanmi.
Who We AreWhat We EelieveWhat We Do
2025 by iamachristian.org,Inc All rights reserved.
