1Naamat llactamanda Zofar shuti runaca, cashnami nijurca:
2“Ninanda chashna rimarijujtaca, ¿nachu tigrachina tiyanga?
Ninanda rimarijuj runataca, ¿pipash alimi ningachu?
3Maitapash can rimashca shimicunaca, ¿pitapash upallayachingachu?
Can na cazushpa chashna rimajujpica, ¿candaca nachu pipash pingaichinga?
4Canga, ñuca yachachishcapash alipachami, nijunguimi.
Shinallata, cambaj ñaupajpica, mapa illajmi cani, nijunguimi.
5Taita Diosca, canhuan parlashpachari ali canman.
Paipaj shimita pascashpa, canhuan parlashpami ali canman.
6Paica, pipash na yachashca ali yachaicunata canman villashpami ali canman.
Chaicunaca, imata charishcacunatapash, chaupi yali cajtami ricuchinman.
Chaita ricushpami, can na alita rurashcamandaca,
Taita Diosca ashatalla llaquichijushcata yachanguiman.
7¿Canga, Taita Dios imatalla yarijushcataca, yachai ushanguichu?
¿Tucuita rurai ushaj Dios imashna cashcashna cai ushanguichu?
8Paica, jahua pachatapash yali jahuamanmi. ¿Imatashi rurai ushangui?
Seoltapash yali ucumanmi. ¿Imashnashi rijsingui?
9Paica, cai pachatapash yali jatunmi,
mama cuchatapash yali jatunmi.
10Pai shamushpa, prezu japishpami, imatalla rurashcata tapuchingapa cayanga.
Shina rurajpica, ¿pita jarcai ushanga?
11Paica llulla runacunataca rijsinmi.
Na alita rurajujta ricushpapash ¿saquingallachu?
12Yuyai illaj runaca, ali yuyaitaca napacha japi ushangachu.
Sacha burru, genteta ungüi ushajpillami, ali yuyaita japi ushanman.
13Cambaj shunguta alichirishca cashpa,
Cambaj maquitapash paipajman chutai ushashpa,
14Cambaj maquihuan ima na alitapash rurajushpaca,
ima na alita ruranacuna cambaj huasipi tiyachumbash, na saquinachu cangui.
15Shina causajushpami, mapa illaj ñavihuan vichai ricungui.
Shina cashpaca, shinllipacha cashpami, imatapash na manllangui.
16Cambaj llaquicunatapash cunganguimi.
Na cashpaca chai llaquitaca, yacu yalishcatashnami yaringui.
17Cambaj causaica, chaupi punllatapash yali punchapambami canga.
Tutayashca cajpipash, tutamandashnami canga.
18Canga ali causaita charingapami shuyai ushangui.
Muyundita chapashpami, imatapash na manllashpa puñungui.
19Puñungapa can sirijujpica, pipash na manllachingachu.
Taucacunami, candaca yanapahuai ninajunga.
20Ashtahuangarin na alita rurajcunapaj ñavica, na ricui ushangachu.
Paicunaca, maipi pacajunatapash na charingachu.
Paicuna huañunatallami shuyanajunga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
