2 REYES 15 - Quichua Imbabura 2016

Azarías shuti runa mandajushcamanda(2 Crón. 26:3-5,16-23)

1Israel llactata jatun mandaj Jeroboam shuti runaca, ishcai chunga canchis huatata ña mandajujpimi, Judá llactata jatun mandaj Amasías shuti runapaj churi Azariasca, mandai callarirca.

2Azariasca, chunga sucta huatata charishpami, mandai callarirca. Paica, picha chunga ishcai huatatami, Jerusalenbi mandajurca. Paipaj mamaca, Jerusalenmanda Jecolías shutimi carca.

3Azariasca, Mandaj Diospaj ñaupajpica, paipaj taita Amasías alicunata rurashpa causashcashnami, alita rurajurca.

4Tucuita chashna rurashpapash, lomacunapi altarcunataca na anchuchircachu. Chai altarcunapimi, gentecunaca animalcunata huañuchishpa, inciensotapash cushnichishpa catinajurca.

5Ashtahuangarin Mandaj Diosca, jatun mandajtaca lepra ungüihuanmi llaquichijurca. Paica, pai huañuna punllacamanmi, chai lepra ungüihuanga, shuj huasipi pailla causajurca. Mandana huasipica, jatun mandajpaj churi Jotam shuti runami, gentecunata mandashpa tiyajurca.

6Azarías runa ashtahuan imatalla ashtahuan rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata quilcashca libropi tiyajun?

7Azarías runa huañushpa, paipaj ñaupa taitacunahuan tandanajungapa rijpica, Davidpaj pueblopimi pambarca. Paipaj randica, paipaj churi Jotam shuti runami mandajurca.

Zacarías runa mandajushcamanda

8Judá llactata jatun mandaj Azariasca, quimsa chunga pusaj huatata ña mandajujpimi, Jeroboam runapaj churi Zacariasca, Israel llactata mandai callarirca. Paica, sucta quillatallami mandajurca.

9Paica, paipaj ñaupa taitacuna na alicunata rurashcashnami, Mandaj Diospaj ñaupajpica, na alita rurajurca. Paipash, Nabat shuti runapaj churi Jeroboam runa, Israelcunata juchacunata rurachishcatallatami rurachishpa causajurca.

10Zacariastaca, Jabes shuti runapaj churi Salum shuti runami, shujcunahuan pacalla parlarishpa, paipaj gentecunapaj ñaupajpi huañuchirca. Chashna huañuchishpami, paipaj randica paillata mandai callarirca.

11Zacarías imatalla ashtahuan rurashcacunaca, Israel llactata jatun mandajcuna imatalla rurashcacunata quilcashca libropimi tiyajun.

12Mandaj Diosca, cai shimicunatami Jehú shuti runamanga nishca carca: “Cambaj huahuacunaca, chuscu miraicamanmi, Israel llactataca mandanajunga” nishcami carca. Chashna nishca shimicunami pactarca.

Salum shuti runa mandajushcamanda

13Judá llactata jatun mandaj Uzías shuti runaca, quimsa chunga iscun huatata ña mandajujpimi, Jabes shuti runapaj churi Salum shuti runaca, Israel llactata mandai callarirca. Paica, shuj quillatallami Samaria pueblopi mandajurca.

14Gadi shuti runapaj churi Manahem shuti runaca, Tirsa shuti pueblomanda Samaria pueblomanmi vichai shamurca. Jabes runapaj churi Salum shuti runataca, chai Samaria pueblopimi huañuchirca. Chashna huañuchishpami, paillata paipaj randi mandajurca.

15Salum shuti runa ashtahuan imatalla rurashcacunapash, Zacariasta huañuchingapa huashalla shujcunahuan parlarishcapash, Israel llactata jatun mandajcuna imatalla rurashcacunata quilcashca libropimi tiyajun.

16Manahem shuti runaca, Tifsa shuti pueblopi tucui imalla tiyashcacunatapash, chai pueblopi causaj tucui gentecunatapashmi aparca. Tirsa shuti pueblomanda callarishpaca, Tifsa shuti pueblo muyundicamanmi quichushpa aparca. Chai pueblo pungucunata na pascashcamandami, chashna quichushpa aparca. Shinallata, chaipi causanajuj vijsayu huarmicunataca, vijsata pascashpami huañuchirca.

Manahem shuti runa mandajushcamanda

17Judá llactata jatun mandaj Azariasca, quimsa chunga iscun huatata ña mandajujpimi, Gadi shuti runapaj churi Manahem shuti runaca, Israel llactata mandai callarirca. Paica, chunga huatatami Samaria pueblopi mandajurca.

18Paica, Mandaj Diospaj ñaupajpica, na alita rurashpami causajurca. Nabat shuti runapaj churi Jeroboam, Israelcunata juchacunata rurachishcataca, tucui causaipi chashnallata rurachishpa catijurca.

19Shinallata, Asiria llactata jatun mandaj Pul shuti runami, Israel llactapi macanajungapa shamurca. Chaimandami Manahem runaca, jatun mandaj Pul shuti runaman, sucta patsaj pusaj chunga quintal culquita, paillata mandashpa catijungapa curca.

20Manahem shuti runaca, Asiria llactata jatun mandajman cungapami, Israel llactamanda ninan ushaita charijcunapaj, ninan charij runacunapaj chaupi kilo yalita pezaj culquita japijurca. Chai culquita cujpica, Asiria llactata jatun mandajca, Israel llactamandaca rircalla.

21Manahem shuti runa ashtahuan imatalla rurashcacunapash, tucui imatalla rurashcapash, ¿nachu Israel llactata jatun mandajcuna imatalla rurashcacunata quilcashca libropi tiyajun?

22Manahem shuti runa huañushpa, paipaj ñaupa taitacunahuan tandanajungapa rijpica, Pekaía shuti paipaj churi, paipaj randica mandajurca.

Pekaía shuti runa mandajushcamanda

23Judá llactata jatun mandaj Azariasca, picha chunga huatata ña mandajujpimi, Manahem shuti runapaj churi Pekaía shuti runaca, Israel llactata mandai callarirca. Paica, ishcai huatatami Samaria pueblopi mandajurca.

24Paica, Mandaj Diospaj ñaupajpica, na alita rurashpami causarca. Nabat shuti runapaj churi Jeroboam runa, Israelcunata juchata rurachishcatallatami rurachishpa causajurca.

25Pekaía shuti runataca, paipaj macanajuj runacunata mandaj Peka shuti runami, shujcunahuan pacalla parlarishpa, Samaria pueblopillata mandana huasipi huañuchirca. Peka shuti runaca, Remalías shuti runapaj churimi carca. Paica, Argob shuti, Arie shuti runacunahuan, Galaad llactamanda picha chunga runacunahuambash cumba tucushpami huañuchirca. Chashna huañuchishpaca, paimi Pekaía shuti runapaj randi mandajurca.

26Pekaía shuti runa ashtahuan imatalla rurashcapash, tucui imatalla rurashcapash, Israel llactata jatun mandajcuna imatalla rurashcacunata quilcashca libropimi tiyajun.

Peka shuti runa mandajushcamanda

27Judá llactata jatun mandaj Azarías shuti runaca, picha chunga ishcai huatata ña mandajujpimi, Remalías shuti runapaj churi Peka shuti runaca, Israel llactata mandai callarirca. Paica, ishcai chunga huatatami Samaria pueblopi mandajurca.

28Paica, Mandaj Diospaj ñaupajpica, na alita rurashpami causajurca. Nabat shuti runapaj churi Jeroboam runa, Israelcunata juchata rurachishca, chai juchatallata rurachishpami causajurca.

29Israel llactata jatun mandaj Peka shuti runa mandajui huatacunami, Asiria llactata jatun mandaj Tiglat-pileser shuti runa shamurca. Paica, Ijón, Abel-bet-maaca, Janoa, Cedes, Hazor, Galaad, Galilea pueblocunata, shinallata, Neftalí shuti tucui llactata quichushpami, chaipi causajcunatapash Asiria llactaman prezu aparca.

30Ela shuti runapaj churi Oseas runaca, shujcunahuan pacalla parlarishpa, Remalías shuti runapaj churi Peka shuti runata huañuchishpami, chai runapaj randica, pai mandai callarirca. Uzías runapaj churi Jotam shuti runa ishcai chunga quimsa huatata Judá llactata ña mandajujpimi, chashna tucurca.

31Peka shuti runa ashtahuan imatalla rurashcacunapash, tucui imatalla rurashcapash, Israel llactata jatun mandajcuna imatalla rurashcacunata quilcashca libropimi tiyajun.

Jotam shuti runa mandajushcamanda(2 Crón. 27:1-9)

32Remalías shuti runapaj churi Peka shuti runaca, ishcai huatata Israel llactata ña mandajujpimi, Uzías runapaj churi Jotam shuti runaca, Judá llactata mandai callarirca.

33Paica, ishcai chunga picha huatata charishpa mandai callarishpami, chunga sucta huatata, Jerusalenbica mandajurca. Paipaj mamaca, Sadoc shuti runapaj ushi, Jerusa shutimi carca.

34Jotam shuti runaca, Mandaj Diospaj ñaupajpica, paipaj taita Uzías alicunata rurashpa causashcashnami alita rurajurca.

35Tucuita chashna rurashpapash, lomacunapi altarcunataca na anchuchircachu. Chai altarcunapimi, gentecunaca animalcunata huañuchishpa, inciensotapash cushnichishpa catinajurca. Paimi, Mandaj Diospaj huasipica ashtahuan jatun punguta rurachirca.

36Jotam shuti runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata quilcashca libropi tiyajun?

37Jotam shuti runa mandajui huatacunapimi Mandaj Diosca, Judá llactapi causajcunata llaquichinajuchun, Siria llactata jatun mandaj Rezín shuti runata, Remalías shuti runapaj churi Peka shuti runata cacharca.

38Jotam runa huañushpa paipaj ñaupaj taitacunahuan tandanajungapa rijpica, Davidpaj pueblopi, paipaj ñaupaj taitacunata pambashcapimi, pambarca. Paipaj randica, Acaz shuti paipaj churimi mandajurca.