1Mandaj Diosca, cutinmi Jonasman cashna nirca:
2“Ucha Jatarishpami, Nínive pueblopi causajcunapajman, Ñuca ima nishcata villangapa rina cangui” nircami.
3Shina nijpimi, Jonasca jatarishpa, Mandaj Dios mandashcata, Nínive pueblopi causajcunaman villangapa rirca. Nínive puebloca, quimsa punllata purinashna jatunmi carca.
4Jonasca, chai puebloman yaicushpami, shuj punlla canatashna rishpa: “Cunanmanda chuscu chunga punllapica, cai Nínive puebloca tucuringami” nijurca.
5Chashna villajpimi, Nínive pueblopi causajcunaca, Taita Diosta crinajurca. Paicunaca, jatunmanda callarishpa, uchillacunacamanmi, cañamuta churajushpa, micuitapash na micushpa llaquirinajurca.
6Nínive llactata mandajpash, chashna villashcata yachashpami, pai mandashpa tiyajunamanda jatarishpa, paipaj churajunata llujchishpa, cañamuta churajushpa, uchufapi tiyarirca.
7Jatun mandajca, paipaj cati mandajcunandimi, Nínive pueblopi causajcunaman cashna villachun mandarca: “Maijanllapash na micunachu canguichi. Huagracunaman, llamacunaman, ima shuj animalcunamambash, imatallapash na caranachu canguichi. Yacutallapash na ufiachinachu canguichi.
8Ashtahuangarin gentecunapash, animalcunapash cañamuta churajushpami, Taita Diosta ninanda caparishpa mañana canchi. Na alita rurajcuna cashpapash, macashpa shuhuajcuna cashpapash, Taita Diospajman tigrarinami canchi.
9Taita Diosca, ninanda fiñarishcata yalichishpa, ñucanchita cutin llaquishpa, Pai llaquichinata saquingapashchari” nichunmi mandarca.
10Na alita rurashpa causanajushcata saquishpa, Diospajman tigrarishcatami, Taita Diosca ricurca. Chaimandami, llaquichishami nishca cashpapash, na llaquichishpa saquirca.
Who We AreWhat We EelieveWhat We Do
2025 by iamachristian.org,Inc All rights reserved.
