1Cunanga, Ñucapajta ruraj, Jacobpaj miraicuna uyahuaichi.
Ñuca agllashca Israel gentecuna, uyahuaichi.
2Cangunaman causaita caraj,
cangunapaj mamapaj vijsapi cajpi viñachij Mandaj Dios,
cangunataca tucuipimi yanapaj, Ñucami cashna nin:
Ñucapajta ruraj Jacobpaj miraicunalla, cangunaca manllanachu canguichi.
Jesurún, cambash na manllanachu cangui.
Candapash, Ñucami agllarcani.
3Ñucami, chaquishca pambacunapi yacu tiyachun llujchisha.
Chaquishca pambacunataca, jatun yacucunami rijunga.
Cangunapaj miraicunapimi, Ñuca Espirituta cachamusha.
Cangunapaj miraicunatami, chashna bendiciasha.
4Paicunaca, yacu manñapi jihuashnami viñanga.
Sauce quiru, yacu manñapi viñajshnami llujshinga.
5Maijanga: ‘Ñucami, Mandaj Dios cani’ ningami.
Caishujca: ‘Jacobpaj miraimi cani’ ningami.
Shujca: ‘Mandaj Diospajllami cani’ nishpami, shutita quilcajunga.
Caishujcunaca: ‘Israelcunami canchi’ nishpami shutichiringa” ninmi.
6Israelcunata Jatun Mandaj Dios,
Paicunata Quishpichij, tucuita Mandaj Diosmi, cashna nin:
“Ñucami callarichijpash, tucuchijpash cani.
Ñucamanda ashtahuan shuj Diosca, na tiyanllu.
7¿Pita, ima chayamugrijujtapash villai ushanga?
¿Pita, Ñucashnallata causaita callarichishpa aliguta ricushpa villaj tiyanga?
Pipash shuj tiyashpaca, ñalla ima tucugrijundapash, jipa punllacuna ima tucunatapash villaichilla.
8Imatapash na manllanachu canguichi.
¿Nachu, pundamandallata villashpa yachachircani?
Cangunami, Ñucamanda villajcuna canguichi nircanimi.
Ñucamanda ashtahuan shuj Taita Diosca na tiyanllu.
Ñucallami Dios cani. Ñucamanda ashtahuan shuj tiyajtaca na rijsinichu” ninmi.
Rurashcalla dioscunata mañajcunaca, yangallata cashcamanda9Caspita imamambash rijchajta rurajcunapash yangallatami. Paicuna rurashca chai dioscuna juyailla cashpapash, yangallatami. Chai rurashcalla dioscunaca, na ricunajun, na yuyanajun, yangallata cashcataca, paicunallata yachanmi.
10¿Pita rurashcalla shuj diostaca rurarca? Imatapash yacuyachishpa, imamambash rijchajta rurashca, yanga diostaca, ¿pita rurarca?
11Ricuichi, chai rurashcalla dioscunata catijcunaca, tucuicunami pingai tucunajunga. Chai dioscunata rurajcunaca, yanga runacunallami. Paicuna tandanajushpa, Diospaj ñaupajpi ricurishpaca, manllarishpami pingai tucunajunga.
12Jirruta tacashpa imamambash tigrachij runaca, jirruta rupachishpa, tenazahuan japishpami, paipaj maquihuan juyaillata ruran. Chai jipaca, yarjachishpa ushai illaj tucushpa, yacuta na ufiashpaca, nimata na rurai ushanllu.
13Caspita llagllashpa imatapash ruraj runaca, caspita imata ruranata aliguta ricushpami, llagllashpa llambullata rurashpa, runaman rijchajta juyaillaguta rurashpa, paipaj huasipi churan.
14Quirucuna shayanajuj pambapimi, cedro, ciprés, encina shuti quirucunata cuchun. Chai jipaca, tamiahuan viñachunmi, pino yurata tarpun.
15Runacunaca, chai quirucunatallata, yamdata rurashpami rupachishpa cununajun. Shinallata hornopi rupachishpami, tandata cusan. Chai caspitallata, shuj diosta rurashpami alichin. Chashnami shuj rurashcalla diosta rurashpa, chaipaj ñaupajpi cungurishpa mañajun.
16Chai puchushca caspicunataca, rupachishpa aichata cusashpami, vijsa pactajta micujun. Chai jipaca, chai ninapi cunushpami: “¡Aij cunushcanimari, ninata ricushcanimari!” nijun.
17Chai puchushca caspicunataca, rurashcalla paipaj shuj diosta rurashpami, chai ñaupajpi cungurishpa mañajun. Chai jipaca: “Quishpichihuai nipanimi, canmari ñuca dios cangui” nishpami mañajun.
18Chashna rurajcunaca, ñausacunashna cashpami, imatapash na yachashpa, imatapash na yuyaipi japi ushashpa causan.
19Chaimandami imata rurajushcatapash, yuyaipi japi ushashpaca cashna nijunman: “Cai caspimandami, ashataca rupachishpa, chai ninayashcapica tandata, aichata cusashpa micurcani. ¿Chai puchu caspitachu, millanayai shuj diosta rurasha? ¿Chai quiru putu ñaupapichu cungurisha?” yajunmanmi.
20Uchufata micujshnami, chai gentecunaca, paipaj shungullata pandachijpi llaquiman rinajun. Ali yuyaita japishpaca: “Ñuca maquipica, ¿nachu yanga caspitalla charijuni?” yajunmanmi.
Israelcunataca Mandaj Dios quishpichij cashcamanda21“Jacobpaj mirai Israelcunalla, tucui chaicunataca aligutami yarina canguichi.
Cangunaca, Ñucapajta rurajcunami canguichi.
Cangunamanga, Ñucami causaita curcani.
Israelcunaca, Ñucapajta rurajcuna cashcataca, napacha cunganachu canguichi.
22Ñucata na cazushcataca, fuyutashnami chingachircani.
Cangunapaj juchacunataca, yuraj fuyutashnami anchuchircani.
Ñucapajman tigrarimuichi, Ñucami cangunataca quishpichircani” ninmi.
23Mandaj Diosmi, jahua pachataca churarca.
Chaipi tucui imalla tiyajcunapash ninandami alicachina canguichi.
Cai pachapi tucui tiyajcunapash, cushijushpami caparina canguichi.
Urcucunapash, quiru junda pambacunapash, chaipi shayaj quirucunapash ninandami alicachina canguichi.
Mandaj Dios ñucami, Jacobpaj miraicunataca quishpichircani.
Chaimandami, Israelcunapash ninanda alicachinajunga.
24Mamapaj vijsapillata cajpi ricujuj, cangunata Quishpichij, Mandaj Diosca cashnami nin:
“Ñucami, tucuita ruraj Mandaj Dios cani.
Ñucallami, jahua pachatapash, cai pachatapash, fachahuan quilpajshna churarcani.
Ñucallami tucuita churarcani.
25Yachajcuna imata rurashpa ricuchishcatapash, ñucami yangapi churani.
Brujucuna rimashcatapash, yangapimi churani.
Alipacha yachajushca runacunatapash, yangapimi churani.
Paicuna imatalla yachajushcatapash, yangapimi churani.
26Ñucapajta rurajcuna villachunga, Ñucami yachachini.
Ñuca cachajpi villashcacuna pactachunmi cachani.
Jerusalén pueblotaca: ‘Caipica cutinmi causaj shamunga’ ninimi.
Judá llactapi tiyaj pueblocunatapash: ‘Cutinmi alichisha.
Tucuilla urmashpa tucurishcatapash, cutinmi alichisha’ ninimi.
27Mama cucha yacutapash: ‘Chaquichi’ ninimi.
Rijuj jatun yacucunatapash: ‘Chaquichishami’ ninimi.
28Ciro shuti mandaj runatapash, cashnami nini:
‘Canmi, Ñuca llamacunataca michingui.
Tucui imatalla Ñuca rurachun mandashcatami rurangui.
Jerusalén pueblotapash, Ñuca huasitapash, cutinmi shayachingui nijpica’ chashnami pactanga” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
