JEREMÍAS 14 - Quichua Imbabura 2016

Na tamiashpa llaquichishcamanda

1Na tamiajpimi Mandaj Diosca, Jeremiasta cashna nirca:

2“Judá llactapi, causajcunaca tucuillami ninan llaquicunata apanajurca.

Tucuicuna jatun llaquihuan cashpami alpapi shitarinajura.

Jerusalenbi causajcunaca ninan llaquihuanmi caparinajurca.

3Mandajcunaca, paipajta rurajcunataca, yacuta apamuchunmi cachanajurca.

Yacuta alichina tanqueman rishpapash na tarishpallatami chushaj funduhuan tigranajurca.

Paicunaca imata na rurai ushashpami umata aspirinajurca.

4Chai llactapica na tamiajpimi, alpapash ninanda chaquishpa chijtarirca.

Alpapi tarpujcunapash ninanda llaquirishpa, imatapash na rurai ushashpami, umata aspirinajurca.

5Jihua illajpimi, tarugacunapash pambapi huachashpaca, chaillapita jichushpa rinajurca.

6Sacha burrucunapash, chaquishca lomacunapimi shayanajurca.

Chacal animalcunashnami, samaita na aisai ushanajurca.

Jihua illajpimi, ñavicunapash amsayashpa, huañunalla ricunajurca” nijurcami.

7Mandaj Dioslla, ñucanchi juchacunami ñucanchi na ali cashcataca ricuchijun.

Shina cajpipash, Cambaj ninan juyaihuan, ñucanchitaca quishpichihuayari.

Na cazushpa juchata rurashpami, Candaca ninanda fiñachishpa causashcanchi.

8Israelcuna yarishpa causana Dioslla.

Paicunataca, llaqui punllacunapica Canmi huacaichij carcangui.

¿Imashpata cunanga, caru llactamanda shamushpa, shuj tutatalla pacarishpa rij runashna tucurcangui?

9¿Imashpata, yanga ricuitalla ricujuj runashna, ushai illaj runashna tucurcangui?

Shina cashpapash Mandaj Dioslla, Canga ñucanchihuanmi cangui.

Tucuicunami, Cambaj agllashca gentecuna cajtaca yachan.

Ñucanchitaca, ama jichushpa saquihuanguichu.

10Mandaj Diosca, chai gentecunamandami cashna nirca: “Paicunaca juchata ruranataca na shaijushpa, na alita rurashpa causangapallami munan. Chaimandami Mandaj Dios Ñucaca, paicunataca fiñani. Cunanga, paicuna juchata rurashcamandami, ninanda llaquichigrini” nircami.

11Mandaj Diosca, cashnatapashmi nihuarca: “Cai gentecunaman alita rurapai nishpaca, amapacha mañahuaichu.

12Na micushpa caparishpa mañanajujpipash, napacha uyashachu. Animalcunata cushpa tucuillata rupachinajujpipash, imata carashpa Ñucapajman shamunajujpipash napacha chasquishachu. Ashtahuangarin macanajuihuan, ninan yarjaihuan, jatun ungüicunahuanmi tucuchisha” nircami.

13Shina nijpimi, cashna nircani: “¡Aij, Mandaj Jatun Dioslla! Profetacunaca: ‘Jatun macanajuipash, ninan yarjaipash napacha tiyangachu. Ashtahuangarin cai llactapica, ali causaimi tiyanga’ nishpami villanajun” nircanimi.

14Shina nijpimi, Mandaj Diosca cashna nihuarca: “Profetacunaca, na Ñuca cachajpitami, Ñuca shutipi llullashpa villanajun. Paicunaca, jipaman ima tucunata, ricushcatashna villanajushpaca, llullashpa umachishallami chashna villanajun.

15Ñuca na cachajpita, Ñuca shutipi llullashpa villaj profetacunaca: ‘Cai llactapica, jatun macanajuipash, ninan yarjaipash napacha tiyangachu’ nishpami, llullashpa villanajun. Paicunataca, jatun macanajuihuan, ninan yarjaihuanmi llaquichisha” nijunmi Mandaj Diosca.

16Chai villashcata uyajcunataca, Jerusalén ñangunapimi macanajuipi cashpa, ninan yarjaihuanmi cashpapash huañuchun saquisha. Paicunatapash, paicunapaj huarmicunatapash, churicunatapash, huañushcataca pipash na pambangachu. Paicuna na alita rurashcamandami, chashna ninanda llaquichisha.

17Paicunamanga cashna nishpa villagri:

“Ñucapajlla shicanyachishca juyailla llactamanmi, ninan llaquicuna chayamushca.

Chaimandami tutapash punllapash na samashpa huacajuni.

18Pambata ricushpaca, huañushcacuna sirinajujtami ricurca.

Pueblopica, ninan yarjaihuanmi huañushca sirinajurca.

Profetacunapash, sacerdotecunapash, na rigsishca llactacunaman rishpami, chingashca purinajurca nishpa villagri” nihuarcami.

19Judá llactapi causajcunataca, ¿causaita causaicamanllu jichurcangui?

¿Sion pueblotapash, ninandachu na ricunayachircangui?

¿Imashpata huañuna ungüita paicunaman cachamurcangui?

Cushijushpa causana punlla chayamunata shuyanajujpipash, napacha chayamurcachu.

Nanaicunahuan ali tucunata shuyanajujpipash, napacha chayamurcachu.

20Mandaj Dioslla, ñucanchipash, ñucanchi taitacunapash, Canda na cazushpami fiñachipashcanchi.

Chashna na alita rurashcata yarishpami ninanda llaquiripanchi.

21Can, ñucanchita ninanda juyashcamanda, ama jichuhuaichu.

Can mandashpa tiyajunatapash, Cambaj Ninan Ushaitapash ama yangapi churapaichu.

Ñucanchihuan ari ninajushcatapash, ama cungapaichu.

22¿Shuj llactacunapi rurashcalla dioscunaca tamiachi ushangachu?

¿Jahua pachamandapash, tamiaca yangata urmamungallachu?

¿Nachu Canga, ñucanchita Mandaj Dios cangui?

Cai tucuita churashcamandami ñucanchica, Candalla shuyashpa causanajunchi.