ESDRAS 4 - Quichua Imbabura 2016

Diospaj huasita huasichinajujta jarcashcamanda

1Israelcunata Mandaj Diospaj huasitaca, prezu apai tucushcamanda tigramushcacuna shayachi callarinajujtami Judá aylluta, Benjamín aylluta fiñajcunaca yachaj chayarca.

2Chaimandami Zorobabel shuti runapajman, ñaupa taitacunapaj huasi ucupuracunata mandajcunapajman shamushpa cashna ninajurca:

“Cai huasitaca, ñucanchipash cangunahuan shayachishunllami. Ñucanchipash, cangunapaj Taita Diostami mascanchi. Ñucanchica, Asiria llactata jatun mandaj Esar-hadón shuti runa, cai llactaman apamushca punllamandapachami, cangunashnallata Diosman animalcunata cushpa huañuchinajunchi” ninajurca.

3Shina nijpimi Zorobabel shuti, Jesúa shuti runacunapash, ñaupa taitacunapaj huasi ucupura Israelcunata, huaquin mandajcunapash cashna ninajurca:

“Ñucanchi Taita Diospaj huasita cangunahuan tandanajushpa shayachinaca, na ali ricurinllu. Ashtahuangarin, Israelcunata Mandaj Diospaj huasitaca, Persia llactata jatun mandaj Ciro shuti runa mandashcashna, ñucanchillami shayachina canchi” ninajurca.

4Shina nijpipash chai llactapi causajcunaca, Judá llactapi causajcunataca, imatapash nishpa, Diospaj huasita ama shayachinajuchun manllachinajurca.

5Chai jahuapash, yuyaita cushpa yanapajcunamanmi, huasita ama shayachishpa tucuchinajuchun, culquita pacalla cunajurca. Persia llactata jatun mandaj Ciro shuti runa mandajui huatacunapimi, Darío shuti runa mandai callaringacaman chashna ruranajurca.

6Jatun mandaj Asuero shuti runa mandai callari huatapimi, Judá llactapi causajcunata, Jerusalenbi causajcunata ninanda fiñashpa juchachishpa, cartata quilcashpa cachanajurca.

7Artajerjes shuti runa mandajui punllacunapipash, shinallatami Bislam, Mitrídates, Tabeel shuti runacunaca, paicunapaj cumbacunahuan tandanajushpa, shuj cartata quilcashpa, Persia llactata jatun mandaj Artajerjes shuti runaman cachanajurca. Chai quilcashcapi, ima nishcapash arameo rimaipimi carca.

8Macanajuj runapuramanda mandaj Rehum shuti runapash, Simsai shuti mandaj quilcashcapashmi, Jerusalenbi causajcunata juchachishpa, jatun mandaj Artajerjes shuti runaman shuj cartata cachanajurca.

9Chai punllapica, quilcajcunata mandaj Rehum shuti runahuan, quilcaj Simsai shuti runahuan, paicunapaj cumba juezcunahuan, pueblota mandajcunahuan, cati mandajcunahuanmi cartata quilcanajurca. Shinallata Persia llactamanda, Erec shuti pueblomanda, Babilonia llactamanda, Susa shuti pueblomanda shamushca elamita gentecunahuanmi quilcanajurca.

10Ninanda alicachi tucushca Asnapar shuti jatun mandaj, shuj gentecunata apamushpa, Samaria llactapi tiyaj pueblocunapi, shuj llactacunapi causachun churashcacunapash, jatun yacu chimbaman tiyaj llactacunapi causajcunapashmi quilcanajurca.

11Chai cartata shujman yalichishpa quilcashcapica, cashnami nijun: “Jatun mandaj Artajerjes: Jatun yacu chimba llactacunapi causaj cambajta rurajcunami, alillachu capangui nipanchi.

12Can jatun mandajca, yachanami capangui. Judá llactapi causajcunaca, cambaj llactamanda ñucanchipajman vichai shamushpaca, Jerusalenmanmi shamurca. Paicunaca na cazuj, na ali gentecuna causashca pueblotami alichinajun. Cai pueblo muyundi jatun pircacunatapash, callari rumicunatapashmi churashpa alichinajun.

13Cunanga, can jatun mandajca, caitapashmi yachana capangui. Cai pueblota cutin shayachishpa, muyundi jatun pircacunatapash cutin shayachishpaca, canman imamandalla culquita cashpa, imapash shuj cuna cashcacunatapash, na ashtahuan cungachu. Shina cajpica, jatun mandajcunapaj huasipica, culquipash tucuringami.

14Ñucanchitaca, mandashpa tiyajuna huasipi imalla tiyashcata carashpa charishcamandami, can jatun mandajta chashna yangapi churanajuchun saquitaca, na ushapanchi. Chaimandami, can jatun mandaj yachachun, villashpa cachamupanchi.

15Caitaca, ama cungangapa cambaj ñaupa taitacuna quilcachishca libropi mascachunmi villapanchi. Chai libropi mascashpaca, cai pueblopi causajcunaca na cazujcuna cashcata, jatun mandajcunatapash, llactacunatapash llaquichishpa causashcatami yachapangui. Shinallata, cai pueblopica, ñaupa huatacunamandapacha na cazushpa jatarijcuna cashcamanda, cai pueblopash tucurishcatami yachapangui.

16Can jatun mandaj yachachunmi villapanchi. Cai pueblota cutin shayachishpa, muyundi jatun pircata cutin shayachijpica, jatun yacu ashtahuan chaiman llactacunaca, na ashtahuan cambaj cangachu” nishpami quilcashca carca.

17Jatun mandajca cashna nishpami, quilcashpa tigrachirca: “Quilcajcunata mandaj Rehum shuti runatapash, quilcaj Simsai shuti runatapash, Samaria llactapi causanajuj cumbacunatapash, jatun yacu chimbaman causanajuj gentecunatapash, alillachu capanguichi, ali causaiguta charipaichi ninimi.

18Canguna cachamushca cartataca, ñami ñuca ñaupajpi alipacha quilca catishpa uyachihuarca.

19Chaitaca, ñuca mandajpimi mascashpa, cashna nishcata tarinajurca: Ñaupa huatacuna chai pueblopi causajcunaca jatun mandajcunata fiñashpa jatarishpami, na cazunajushca. Shinallata, chai pueblopi tandanajushpami imatapash na alita rurangapa yarinajushca.

20Jerusalenbica, jatun yacu ashtahuan chaiman tiyaj tucui llactacunata manllachij, shinlli jatun mandajcunami tiyashca. Chai llactacunapi causajcunaca paicunaman imamandalla cuna cashcatapash cushpa causashcatami tarinajurca.

21Cunanga, chai runacuna imatalla ruranajushcata saquichun mandaichi. Chai pueblotaca, ñuca cutin mushujta mandangacaman, na alichishpa catinachu canguichi.

22Ricuichi, chaita saquichinataca pactarallapash cunganguichiman. ¿Imashpata jatun mandajcunataca ashtahuan llaquichishpa catinajungayari?” nishpami, cartata tigrachimurca.

23Chaimandami, jatun mandaj Artajerjes shuti runa cachamushca cartata shujman yalichishpa quilcashcataca Rehum shuti runapaj, quilcaj Simsai shuti runapaj, paicunapaj cumbacunapaj ñaupajpi quilca catishpa uyachirca. Chaita uyashpami paicunaca, Jerusalenbi causaj Judá llactamanda runacuna huasichinajushcaman ucha rishpa, ninan ushaihuan ninandapacha llaquichishpa jarcanajurca.

24Shinamandami, Taita Diospaj huasita Jerusalenbi shayachinajushcataca saquinajurca. Persia llactata jatun mandaj Darío shuti runa yaicushpa, ishcai huatata mandangacamanmi chaitaca saquirca.