1 SAMUEL 9 - Quichua Imbabura 2016

Jatun mandaj cachun, Samuelta churashcamanda

1Benjamín ayllupurapimi, alipacha shinlli, Cis shuti runa tiyarca. Paica, Abiel runapaj churimi carca. Abiel runaca, Zeror shuti runapaj churimi carca. Zeror runaca, Becorat shuti runapaj churimi carca. Becorat runaca, Benjamín ayllupura Afía shuti runapaj churimi carca.

2Cis shuti runaca, chairalla viñai Saúl shuti juyailla churigutami charirca. Israelpurapica, paita yali ashtahuan juyaillaguca na tiyarcachu. Paica, tucui gentecunata yali jatunmi carca.

3Shuj punllami, Saulpaj taita Cis shuti runapaj burrucuna chingashca carca. Shinamandami, paipaj churi Saultaca: “Cunanga, caipi imatalla rurajcunata pushashpa, burrucunata mascangapa ucha rilla” nirca.

4Shina nijpimi Saulca, Efraín shuti urcu alpacunata yalishpa, Salisa shuti llactacaman mascangapa rishpapash, na tarirca. Chai jipaca, Saalim shuti llactata, Benjamín ayllupaj llactata yalishpa mascagrishpapash, na tarircachu.

5Zuf shuti llactaman ña chayamushpami Saulca, paihuan rijuj runataca: “Cunanga tigranallami canchi. Ñuca taitara, burrucuna chingashcatapash cungashpa, ñucanchimandara ninanda llaquirishpa tiyajunman” nirca.

6Shina nijpimi chai runaca, cashna nirca: “Cai pueblopimi, tucuicuna alicachishca, Taita Diospajta ruraj shuj runagu causajun. Pai ima nishcapash tucui pactajlla cashcamandami, paipajman rina canchi. Ñucanchi mascangapa shamushcataca, maita rishpa tarinatapash villaipapash” nircami.

7Shina nijpimi Saulca cashna nirca: “Shina cashpaca, cunanda jaculla. Ashtahuangarin chai runaguman carangapaca, ¿imatata apashun? Ñucanchipaj cucabi tandagupash tucurishcamandami, Taita Diospaj runaguman imata carangapapash na charinchi. ¿Imapash tiyanrachu?” nircami.

8Shina nijpimi chai runaguca, Saultaca cashna nirca: “Ricui, ñucami asha culquiguta charijuni. Ñucanchi maijan ñanda rishpa mascagrinatapash, Taita Diospaj runagu villachunga, caitami carasha” nircami.

9(Ñaupa punllacunaca, Israel llactapica maijan cashpapash, Taita Diosta imatapash tapushun nishpaca: “Dios ricuchishcata villaj runata jacuchi, tapushunchi” ninajunmi carca. Dios ricuchishcata villaj runatami, cunan punllacunaca: “Profeta” ninajun) nircami.

10Shina nijpimi, Saulca, paipajta runataca: “Alimi nijungui, shina cashpaca jaculla” nirca. Shina nishpami,Taita Diospajta ruraj runagu maipi causaj puebloman rinajurca.

11Chai puebloman chayagrina ñanda vichai rinajushpami, jarihuan nara tacarishca cuitsacuna yacuta apangapa urai llujshinajujta tuparirca. Paicunatami: “Dios ricuchishcata villaj runaguca, ¿cai pueblopichu causan?” nishpa tapurca.

12Shina tapujpimi chai cuitsacunaca: “Ari, cangunata ñaupashpami chaita rijun, ucha catishpa richilla. Cunanga, gentecuna animalta Diosman carashpa lomapi huañuchina punlla cajpimi, paica imatalla rurana cashcata rurangapa puebloman shamushca.

13Puebloman ña yaicushpaca, narapash micungapa lomaman vichai rijpillatami tuparina canguichi. Gentecunaca, pai chayangacaman na micushpami shuyanajunga. Diosman carashpa animalta huañuchishcata, pai bendiciashca jipami tucuicuna micunajunga. Cunanga, tuparingapa ucha vichai richilla” ninajurcami.

14Shina nijpimi paicunaca, puebloman vichai rinajurca. Ña chaupi ñanda rinajujpimi Samuelpash, lomaman vichai ringapa llujshimushpa, ñapash tuparirca.

15Saúl shamungapaca, shuj punllalla illajpimi Mandaj Diosca, Samuelman cashna nishpa villashca carca:

16“Caya punllallatami, Benjaminpaj ayllu llactamanda, shuj runata cambajman cachamusha. Paitaca, Ñuca agllashca Israelcunata mandaj cachunmi, aceitehuan umapi talishpa javina cangui. Paimi, Ñuca agllashcacunataca, filisteocunapaj maquimanda quishpichinga. Ñuca agllashcacuna caparishpa mañanajujtaca uyarcanimi” nishcami carca.

17Saulta, Samuel ricujhuanmi Mandaj Diosca, cashna nirca: “Ricui, cai runamandami, canman villajurcani. Paimi, Ñuca agllashcacunataca mandanga” nircami.

18Saulca, chai pueblo punguta ña yaicujushpa, Samuelpajman quimirishpami: “Dios ricuchishcata villaj runagupaj huasica, ¿maipita capan? Villahuai” nirca.

19Shina nijpimi Samuelca, Saultaca cashna nijurca: “Ñucami, Dios ricuchishcata villaj cani. Cunanga ñucahuan micungapa lomaman jaculla. Caya tutamanda, tucui imatalla can tapusha yajushcata, ñuca villajpi ringuillami.

20Quimsa punllata chingashca burrucunapash, ñami taririshca, ama llaquilla caichu. Ashtahuangarin, Israel llactapi tucui ima juyailla tiyashcapash, ¿pipajta canga? Nachu, ¿cambajpash, cambaj taitapaj tucui huasi ucupura ayllucunapaj canga” nijurcami.

21Shina nijpimi Saulca, cashna nirca: “¿Nachu ñucapash, Benjamín ayllupuramanda capani? Chai aylluca, Israel ayllupuramandaca, uchillagumi capan ¿Nachu ñuca ayllupash, Benjamín ayllupuramandaca ashtahuan uchilla ayllu capan? ¿Imashpata chashnataca nihuanguiyari?” nircami.

22Chai jipami Samuelca, Saultaca, paipajta ruraj runandi jatun ucuman pusharca. Chaipimi, tucuicunata yali ashtahuan ali tiyarinapi tiyachirca. Chaiman ucuman cayai tucushcacunaca, quimsa chungashnami carca.

23Chai jipami Samuelca, yanuj runataca: “Shican alichingui nishpa, cushca aichata caiman apamui” nirca.

24Shina nijpimi yanuj runaca, shuj changa aichataca, chai jahuapi imatalla churashcacunandi apamushpa, Saulpaj ñaupajpi churarca. Shina churajpimi Samuelca, cashna nirca: “Caimi canman shicanyachishpa alichishca aicha, cunanga japishpa micuilla. Gentecunahuan micungapa cayachun cachashca cashpapash, cai aichataca can micuchunmi alichijurcani” nircami. Shinamandami Saulca, chai punllapica Samuelhuan micujurca.

25Chai lomamanda puebloman urai tigramushpami Samuelca, Saulhuanga huasi jahuapi tiyaj patiopi parlanajurca.

26Cayandi tutamandata jatarishpa, indi ña llujshijujpimi, huasi jahuapi tiyaj patiopi puñujujpi Samuelca, Saultaca: “Cunanga, jatarishpa ripailla” nirca.

Shina nijpimi Saulca jatarishpa, Samuelhuan canllaman llujshirca.

27Chai pueblomanda ña urai rinajushpami Samuelca, Saultaca cashna nirca: “Cambajta ruraj runataca, ñaupashpa richun cachailla (shina nijpimi, ñaupashpa cachajpi rirca). Ashtahuangarin, Taita Diospaj Shimitami canman villana cani, ashaguta shuyanami cangui” nircami.