2 REYES 25 - Quichua Imbabura 2016

Jerusalén pueblo mishai tucushcamanda(Jer. 39:1-7; 52:3-11)

1Sedequías shuti runa, iscun huatata mandajujpi, chai huatapaj chunga quilla, chunga punllapimi, Babilonia llactata jatun mandaj Nabucodonosor runaca, paipaj macanajuj runacunandi Jerusalenbi causajcunahuan macanajungapa shamushpa, chaupipi churarca. Shina rurashpami, chai pueblo muyundipi torrecunata shayachirca.

2Chai pueblotaca, jatun mandaj Sedequías chunga shuj huatata mandangacamanmi, chaupipi churashca carca.

3Chai huatapaj chuscu quilla iscun punllapica, ima micunapash illajpimi, chai pueblopica, ashtahuan yarjai tiyarca.

4Shinamandami, chai pueblopaj jatun pircata utujushpa, macanajunata ali yachaj tucuilla runacuna tuta llujshishpa, rinajurca. Paicunaca, Caldeo runacuna chai pueblo muyundipi cajpitami, jatun mandajpaj huertapi shayajuj ishcai pircapaj punguta llujshishpa rinajurca. Jatun mandajca, Arabá shuti pambaman rina ñandami rijurca.

5Shinamandami Caldeo runacunaca, jatun mandajta catishpa, Jericó pueblo pambapi japigrirca. Macanajuj tucui paipaj runacunaca, caita chaitami pacajushpa rishca carca.

6Jatun mandaj Sedequías runata japishpaca, Babilonia llactata jatun mandajpajmanmi, Ribla shuti puebloman apamunajurca. Chaipimi, imashna llaquichinatapash mandarca.

7Sedequías runapaj churicunataca, paipaj ñaupajpillatami cungata fitishpa huañuchirca. Sedequías runataca, ñavita llujchishpami, cadenacunahuan huatashpa Babilonia llactaman aparca.

Judá llactapi causajcunata prezu apashcamanda(2 Crón. 36:17-21; Jer. 39:8-10; 52:12-30)

8Babilonia llactata jatun mandaj Nabucodonosor runaca, chunga iscun huatatami mandajurca. Chai huatapaj picha quilla canchis punllapimi, Nabucodonosor runapajta ruraj Nabuzaradán shuti runaca, Jerusalenman shamurca. Paica, ricushpa shayaj runacunata mandajmi carca.

9Paica, Mandaj Diospaj huasitapash, mandashpa tiyajuna huasitapash, Jerusalenbi tucui huasicunatapash, mandajcunapaj huasicunatapashmi rupachirca.

10Chai mandaj runahuan shamuj caldeo macanajuj runacunaca, Jerusalén muyundi jatun pircatami urmachinajurca.

11Chapaj runacunata mandaj Nabuzaradán runaca, chai pueblopi puchushca gentecunata, Babilonia llactata jatun mandajta catijcunatapash, chai pueblomanda yangalla gentecunatapashmi, prezu aparca.

12Chapaj runacunata mandaj Nabuzaradán runaca, Judá llactapi causaj huajchacunatapash, pambacunapi uvacunata tarpushpa causachunmi saquirca.

13Caldeo runacunaca, Mandaj Diospaj huasimanda bronce pilarcunata, yacuta apana carretacunata, Mandaj Diospaj huasipi tiyaj yacuta churashca jatun bronce pailatapashmi faquinajurca. Tucui broncecunatami Babiloniaman apanajurca.

14Shinallata calderocunata, palacunata, pavizata anchuchinacunata, cucharongunata, Diospajta rurangapa imatalla broncemanda rurashca tiyashcatami apanajurca.

15Inciensota cushnichinacunata, jatun tastacunatapashmi apanajurca. Curita rurashcataca curipurallata, culquita rurashcataca culquipuralla tandachishpami apanajurca. Chapashpa shayayanajun runacunata mandajca, tucuitami aparca.

16Ishcai jatun pilarcacunata, yacuta churana jatun pailata, yacuta ashtana carretataca, Mandaj Diospaj huasipi tiyachunmi, Salomonga rurachishca carca. Tucui chaicunaca, na pezai ushanallami carca.

17Chai jatun pilarca, pusaj metro yali jatunmi carca. Chai pilarpaj umapica, shuj metro quimsa chunga picha centímetro jatun capitelta churashcami carca. Chai jahuapica, linllicunata, granadacunata, bronceta rurashpa muyuchishcami carca. Chaishuj pilartapash, chashnallatami rurashca carca.

18Chapashpa shayaj runacunata mandajca, Seraías shuti mandaj sacerdotetapash, cati mandaj Sofonías shuti sacerdotetapash, Diospaj huasimanda platocunata, alichij quimsa runacunatapashmi aparca.

19Jerusalén pueblomandaca, macanajuj runacunata mandajtapash, jatun mandajman ali yuyaita cuj picha mandajcunatapashmi aparca. chai llactamanda macanajuj runacunapaj shuticunata quilcashpa charijuj mandajtapashmi aparca. Shinallata, Judá llactamanda sucta chunga mandajcunatapashmi, Jerusalén pueblopi cajpi japirca.

20Tucui paicunatami, ricushpa shayanajuj runacunata mandaj Nabuzaradán runaca, Babilonia llactata jatun mandajpajman, Ribla shuti puebloman aparca.

21Babilonia llactata jatun mandajca, Hamat shuti llactapi tiyaj Ribla pueblopimi chai gentecunataca huañuchirca.

Chashnami, Judá llactapi causajcunaca, paicunapaj llactamanda prezu apai tucurca.

Huaquin puchushca gentecuna, Egiptoman pacajushpa rishcamanda(Jer. 40:7-10; 41:1-3,16-18)

22Babilonia llactata jatun mandaj Nabucodonosor runaca, Judá llactapi saquirishca gentecunata mandachunga, Ahicam shuti runapaj churi Gedalías runatami churarca. Ahicam runaca, Safán shuti runapaj churimi carca.

23Babilonia llactata jatun mandajca, Gedalías runatami mandaj cachun churarca. Macanajuj runacunata tucui mandajcunaca chaita yachashpami, Mizpa shuti puebloman shamunajurca. Paicunaca, Netanías runapaj churi Ismael, Carea shuti runapaj churi Johanán, Netofa shuti pueblomanda, Tanhumet shuti runapaj churi Seraías, Maaca shuti pueblomanda shuj runapaj churi Jaazanías runapashmi shamunajurca.

24Gedalías runaca paicunamanmi, paicunata catijcunamambash, cashna nishpa juramenturca: “Babilonia llacta gentecunapajta rurashpa causanataca, na manllanachu canguichi. Babilonia llactata jatun mandajpajta rurashpa causashpaca, alimi causanguichi” nircami.

25Ashtahuangarin, chai huatapaj canchis quillapimi, jatun mandajcunapaj miraipura Ismael shuti runaca, chungapura runacunandi Mizpa shuti puebloman shamurca. Paicunami, Gedalías runataca huañuchirca. Ismael shuti runaca, Netanías runapaj churimi carca. Netanías runaca, Elisama shuti runapaj churimi carca. Ismael runaca, Gedalías runahuan causanajuj, Judá llacta runacunatapash, Caldeo gentecunatapashmi huañuchirca.

26Shinamandami tucuilla gentecuna jatarishpa, uchillacunamanda callarishpa, jatungunacaman, macanajuj runacunata mandajcunahuan, Egiptoman pacajushpa rinajurca. Babilonia llacta gentecunata manllashpami, chashna rinajurca.

Joaquín runata prezumanda llujchishpami, Babilonia llactapi alicachinajushca(Jer. 52:31-34)

27Judá llactata jatun mandajca, quimsa chunga canchis huatata prezu causajujpimi, Evil-merodac shuti runaca, Babilonia llactata jatun mandaj tucurca. Pai mandai callarijun huatapaj chunga ishcai quilla, ishcai chunga canchis punllapimi, Joaquín runataca prezumanda llujchirca.

28Paihuanga ali juyaihuan parlashpami, Babilonia llactapi jatun mandajcuna tiyanajushcatapash, ashtahuan yalipi churarca.

29Shinallata, prezuna huasipi tiyajushpa churajushcataca surcuchishpami, shuj churajunata churachirca. Joaquín runaca, paipaj tucui causaipimi, jatun mandajhuan micushpa causajurca.

30Babilonia llactata jatun mandajca, punllandimi paimanga ali micunata caran carca. Paica, huañungacamanmi chashna causajurca.