DEUTERONOMIO 9 - Quichua Imbabura 2016

Canaán llactapi tiyaj gentecunata tucuchinamanda

1Uyaichi Israelcuna, cangunata yali ashtaca gentecuna, ninan shinlli runacuna causanajuj llactacunaman yaicushpa japingapami, Jordán yacuta chimbagringuichi. Jahua jahuacaman muyundita pircahuan jarcashca pueblocunata japingapami chimbagringuichi.

2Chaicunapica, Anac shuti runapaj mirai, ninan jatun runacunami causanajun. Paicunataca canllata rijsinguimi. ‘¿Anac shuti runapaj miraicunapaj ñaupajpi shayaritaca pita ushangayari?’ ninajujtapash uyashcanguimi.

3Cunanga, canda Mandaj Taita Diosca, rupachishpa tucuchij ninashna canda ñaupashpa rigrijujtaca yachanami cangui. Paica, tucuillata tucuchishpami, cambaj ñaupajpi ninanda pingaichinga. Canga, paicunataca Mandaj Dios mandashcashnami, uchalla llujchishpa, huañuchishpa tucuchina cangui.

4Chai llactapi causajcunata, canda Mandaj Taita Dios llujchishpa cachajpira, cambaj shungupica: ‘Ñucataca, imatapash alitalla rurashpa causajpimi, Mandaj Diosca cai llactata japichun pushamuhuashca’ yajunguiman. Mandaj Diosca, chai llactapi causajcunataca, jatun na alicuna cajpimi llujchishpa cachagrin.

5Imatapash ali cashcatalla rurashcamanda, shungupi alitalla yarishcamandaca, na paicunapaj llactata japingapa yaicunguichu. Ashtahuangarin, canda Mandaj Taita Diosca, chai llactapi causajcunataca paita na manllajcuna cajpimi llujchishpa cachanga. Cambaj ñaupa taita Abrahamman, Isaacman, Jacobman carashami nishpa, Mandaj Dios juramentushcata pactachingapami llujchishpa cachanga.

Israelcuna, Horeb shuti urcupi Diosta na cazushcamanda(Éx. 31:18—32:35)

6Shina cashcamanda, caitapash yachanami cangui. Canda Mandaj Diosca, chai ali llactata can japichunga, imatapash alitalla can rurashcamandaca, na cushcachu. Ashtahuangarin cangunaca, napacha cazuj gentecunami canguichi.

7Jichushca pambapi cashpa, canda Mandaj Taita Diosta ninanda fiñachishcataca, na cungashpami yarina canguichi. Egipto llactamanda llujshimui punllamandapacha, cai llactaman yaicumungacamanmi, Mandaj Diostaca na cazurcanguichi.

8Cangunaca, Horeb shuti urcupi cashpami Mandaj Diostaca ninanda fiñachircanguichi. Chaimandami Mandaj Diosca, cangunahuanga ninandapacha fiñarishpa tucuchinata yarijurca.

9Ñucaca, Mandaj Dios cangunahuan ari nishpa quilcashca ishcai tabla rumicunata chasquingapami urcuman vichai rircani. Shinamandami na micushpa, yacutapash na ufiashpa, chuscu chunga punllata, chuscu chunga tutata chai urcupi carcani.

10Chaipimi Mandaj Diosca, Paipaj maquihuanllata quilcashca ishcai tabla rumicunata cuhuarca. Chai rumicunapica, urcupi cashpa ñucanchi tandanajushca punllapi, nina rupajuj chaupimanda, Mandaj Dios rimashca shimicunatami quilcashca tiyajurca.

11Chuscu chunga punlla, chuscu chunga tuta jipami, Mandaj Diosca, pai ari nishpa quilcashca ishcai tabla rumicunata cuhuarca.

12Mandaj Diosca cashnami nihuarca: ‘Caimanda ucha urai rilla. Egiptomanda can llujchimushca gentecunaca na alitapachami ruranajun. Paicunaca, ali causachun Ñuca mandashcata na cazushpami, curita yacuyachishca diosta rurashca’ nihuarcami.

13Mandaj Diosca cashnatapashmi nihuarca: ‘Cai gentecunataca, na cazujcunapacha cajtami ricuni.

14Paicunata tucuchishpa, paicunapaj shutita cai pachamanda chingachingapa munajpipash saquinallami cangui. Ashtahuangarin Ñucami, candaca paicunatapash yali ninan shinlli, jatun llactata mandachun churasha’ nihuarcami.

15Nina rupajuj urcumandaca, Dios ari nishpa quilcashca ishcai tabla rumicunata apashpami urai tigramurcani.

16Ñuca tigramushpaca, cangunata Mandaj Taita Diosta na cazushpa, juchata rurashcatami ricurcani. Mandaj Diosta cazushpa causachun mandashca ñanmanda anchurishpami, curita yacuyachishpa rurashca shicuta alicachinajurcanguichi.

17Chaimandami ñuca charijushca chai ishcai tabla rumicunataca, cangunapaj ñaupajpi shitashpa faquircani.

18Chai jipaca pundashnallatami, chuscu chunga punllata, chuscu chunga tutata, Mandaj Diospaj ñaupajpi cungurishpa mañajurcani. Mandaj Diospaj ñaupajpi canguna na alita rurashpa ninanda fiñachishpa juchata rurashcamandami, imatapash na micushpa, yacutapash na ufiashpa chashna mañajurcani.

19Mandaj Diosca, ninandapacha fiñarishpa cangunata tucuchigrijujpimi, ninanda manllarircani. Ashtahuangarin Mandaj Diosca, ñuca mañashcataca cutinmi uyahuarca.

20Aaronhuambashmi, Mandaj Diosca ninandapacha fiñarirca. Chai punllacunapica, Aaronmandapash chashnallatami mañajurcani.

21Chaimandami, cangunata juchata rurachij shicutaca tucuilla rupachircani. Chaitaca ñutu jacu tucungacamanmi alipacha cutarcani. Chai jacutaca, urcumanda shamujuj larca yacupimi shitarcani.

22Shinallata Tabera, Masah, Kibrot-hataava shuti pueblocunapipash, Mandaj Diostaca ninandapachami fiñachircanguichi.

23Cades-barnea shuti pueblopi cajpimi Mandaj Diosca: ‘Ñuca carashca llactata japingapa vichai richi’ nishpa mandarca. Shina nijpipash, Mandaj Taita Dios mandashcata na cazushpami chaipillata saquirircanguichi. Cangunaca, na crishpami, Pai rimashca shimitapash na cazurcanguichi.

24Cangunaca, ñuca rijsishca punllamandapacha, cunangamanmi Mandaj Diostaca napacha cazushpa causanguichi.

25Mandaj Diosca, cangunataca tucuchishami nircami. Shina nijpimi ñucaca, chuscu chunga punllata, chuscu chunga tutata, Mandaj Diospaj ñaupajpi cungurishpa mañajurcani.

26Mandaj Diostaca cashna nishpami mañajurcani: ‘Mandaj Jatun Dioslla, Cambajlla cachun agllashca gentecunataca ama tucuchipaichu. Paicunataca, Cambaj ninan ushaihuan, ninan ushaita charij Cambaj maquihuan Egiptomanda llujchimushpami quishpichircangui.

27Cambajta ruraj Abrahamda, Isaacta, Jacobtapash yaripayari. Cai gentecuna napacha cazujcuna cajtapash, Diosta na cazushpa juchata rurashcatapash ama ricupaichu.

28Ñucanchita llujchimushca llactapi causajcunaca, cashnami ninajunga: Mandaj Diosca, Pai carasha nishca llactaman pushaitaca na ushashcachu. Ashtahuangarin, jichushca pambapi, fiñashpa huañuchingapami, chaimandaca llujchishpa cachashca ninajungami.

29Paicunaca, Cambajlla cachun, Can agllashca gentecunami capan. Paicunataca Canmari, Cambaj ninan ushaihuan, ninan ushaita charij Cambaj maquihuan llujchimurcangui’ nishpami mañarcani.