NÚMEROS 11 - Quichua Imbabura 2016

Mandaj Diosca codornizcunatami caramushca

1Mandaj Diosta na alicachishpa, Israelcuna rimajujta uyashpami, Mandaj Diosca ninandapacha fiñarirca. Shina cajpimi, Mandaj Diospaj nina paicunapaj jahuapi japirishpa, manñapi carpacunata rupachishpa tucuchirca.

2Chaimandami Israelcunaca, ninanda manllarishpa Moisesta caparinajurca. Chashna caparijujpimi Moisesca, paicunamanda Mandaj Diosta mañajpi, chai ninaca huañurca.

3Mandaj Dios paicunata ninandapacha fiñarishcamandami, chai pambataca Tabera shutita shutichirca.

4Shuj llactamanda gentecuna, Israelcunahuan chapurishca causanajushpa na alita yachachijpimi, paicunaca micunatalla yarinajurca. Shinamandami, Israelcunaca cashna nishpa huacanajurca: “¡Maijambash ñucanchiman aichata carashcanman!

5Egiptopica, pijicunata, pepinocunata, melongunata, puerro nishcacunata, cebollacunata, ajocunatapash yanga micushpa causashcatami yarinchi.

6Cunanga, yarjaimanda huañugrinchimari. Caipica, maná shuti granollamari ricurin, ima micunapash ashtahuanga na ricurinllu.” ninajurcami.

7Maná shuti granoca, culantro muyushnalla, mishquilla ashnajun bedelioshnalla quillumi carca.

8Israelcunaca, caita chaita rishpa tandachishpami, chaitaca rumipi cutashpa, na cashpaca tacashpa, mangapi yanunajurca. Shinallata, tandatapashmi ruranajurca. Chai micunaca, mushuj aceitehuan rurashca tandashnami carca.

9Carpa shayachishca pambacunapi tuta tamiamujujpimi, chai maná shuti granoca urmamujurca.

10Paicunapaj ayllucunamanda, carpa pungucunapi Israelcuna huacanajujta Moisés uyashpami Moisesca ninandapacha llaquirirca. Mandaj Dios ninanda fiñaringa yashpami Moisesca manllarijurca.

11Chaimandami Moisesca, Mandaj Diostaca cashna nijurca:

“Cambajta ruraj ñucataca, ¿imashpata cashna llaquichihuangui? Cai gentecunahuan chashna llaquita apajungapaca ¿ima na alitata ruraparcani?

12¿Cai gentecunaca, ñuca huahuacunachu cashca? Paicunapaj ñaupa taitacunaman, Can carashami nishpa juramentushca llactaman, chuchujuj huahuacunatashna apangapaca, ¿ñucachu paicunataca charipashcani?

13Paicunaca: ‘Aichata carahuai’ nishpami huacashpa ñucapajman shamunajun. Cai tucui gentecunaman carangapaca, ¿maipita aichataca tarishayari?

14Cai tucui gentecunata, ñucalla ricushpa pushanaca shinllipacha cajpimi napacha ushani.

15Chashna llaquicunata apangapa randica, huañuita taringapami munapani. Cambaj ñaupajpi ñuca ali ricurishca cajpica, cashna llaquicunata apachunga, amapacha saquihuaichu” nijurcami.

16Shina nijpimi Mandaj Diosca, Moisestaca cashna nirca:

“Israelcunata mandaj ancianopuramandaca, ali rijsishca canchis chunga mandaj ancianocunata tandachimungui. Paicunataca, Ñucahuan tuparina jatun carpa punguman tandachishpa chaipi shuyangui.

17Chaipimi, Ñuca urai shamushpa canhuan rimashpa, paicunamambash, canmanshnallata espirituta churasha. Shinamandami, paicunapash tucui gentecunapaj llaquita apanajujpi, na canlla llaquita apangui.

18Ashtahuangarin Israelcunataca, cashna ningui: ‘Cayapaca, Ñucapajlla tucushpa, mapa illaj cashpami, aichataca micugringuichi. Cangunaca: ¡Aichata micungapami munanchi! ¡Egiptopica, alimi causarcanchi! nishpami, Mandaj Dios uyajta huacarcanguichi. Chaimandami aichataca, Mandaj Dios Ñuca carajpi micugringuichi.

19Cunanga, shuj punllatalla, ishcai punllatalla, picha punllatalla, chunga punllatalla, na cashpaca ishcai chunga punllatallapash aichataca na micushpami,

20ashtahuangarin shuj quillacaman, singamanda llujshingacaman, na munangacamanmi micugringuichi. Cangunahuan causajuj Mandaj Diostaca yangapi churashpami: ¿Imapachari Egiptomandaca llujshimurcanchi? nishpa, paipaj ñaupajpi huacarcanguichi. Chaimandami chashna micunguichi’ ningui” nijurcami.

21Shina nijpimi Moisesca cashna nirca: “Ñucahuan shamunajuj Israelcunaca sucta patsaj huaranga runacunami. ¡Chai tucui gentemanllu, Canga: ‘Shuj quillacaman micunajuchun aichata carasha’ ningui!

22Chai tucuillaman carangapaca llamacunata, huagracunata huañuchijpipash, na cashpaca, mama cuchamanda tucuilla pijicunapash na pactangachu” nircami.

23Shina nijpimi Mandaj Diosca, Moisestaca cashna nirca:

“¿Mandaj Dios Ñucaca, nachu tucuita rurangapa ushaita charini? Ñuca rimashca shimicuna, pactajta na pactajtapash cunanmi ricugringui” nircami.

24Moisesca chaimanda rishpami, Mandaj Dios imatalla nishcacunata, Israelcunaman villarca. Chai jipaca, Israelcunata mandajpuramanda canchis chunga ancianocunata tandachishpami, Diospaj jatun carpa muyundipi shayarichun mandarca.

25Chaipimi Mandaj Diosca fuyupi urai shamushpa, Moiseshuan rimarca. Chai jipaca, Moisespaj espiritutami canchis chunga mandaj ancianocunapi churarca. Shina rurajpimi paicunaca, Diosmanda villanataca na shaijushpa villanajurca.

26Eldad shuti, Medad shuti ishcai ancianocunaca, agllai tucushcapura cashpapash, jatun carpaman na shamushpami paicunapaj carpapi saquirirca. Paicunapipash espíritu shamushca cajpimi, Dios ima nishcata carpacunapi villanajurca.

27Shina cajpimi, shuj chaira viñai huambraca Moisespajman calpamushpa:

“Eldad shuti, Medad shuti ancianocunaca, carpacunapimi Dios ima nishcata villanajun” nishpa villanajurca.

28Shina villajpimi, Nun shuti runapaj churi, huambra caimandapacha Moisespajta ruraj Josueca:

“Ñucata mandaj Moiseslla, chashna rimanajujcunataca jarcapayari” nijurca.

29Shina nijpimi Moisesca cashna nirca:

“¿Canga chaita ruranaca ñucapajllami yashpachu chashna nijungui? Ashtahuangarin Mandaj Diospaj Espirituta, Mandaj Diospaj tucuilla gentecunapi cajpi, tucuilla villanajushpacarin ashtahuan alipachami canman” nircami.

30Chaimandaca Moisespash, Israelcunata mandaj ancianocunapash, paicuna causanajuj carpacunaman tigrarcallami.

31Mandaj Dios cachamushca huaira shamushpami, mama cuchamanda codornizcunataca, carpacuna tiyanajuj pushtuman cachamurca. Codornizcunaca, caimambash, chaimambash, shuj punllata rina caru canatami, carpa muyundicunapi urmanajurca. Chaicunaca alpamandaca, iscun chunga centimetroshna jatunmi carca.

32Shina cajpimi gentecunaca tucui punlla, tucui tuta, cati punllapash, codornizcunataca tandachinajurca. Ashagutalla japin nishcami, chunga mundun codornizcunata japinajurca. Chai codornizcunataca, paicunapaj carpa muyundicunapimi churanajurca.

33Gentecuna chai aichata nara micui tucuchijpillatami, Mandaj Diosca paicunata ninandapacha fiñashpa, huañuchijlla jatun llaquita cachamurca.

34Micunatalla yarishpa causaj gentecuna huañujpi, chaipi pambashcamandami chai pushtutaca, Kibrot-hataava shutita shutichirca.

35Israelcunaca, Kibrot-hataava shuti pushtumandaca, Hazerot shuti puebloman rishpami chaipi saquirirca.