EZEQUIEL 34 - Quichua Imbabura 2016

Israel llactata pushajcunata llaquichinatami villashca

1Mandaj Diosca cashnami nihuarca:

2“Huañuna aichayuj runa, Israel gentecunata pushajcunata fiñashpa llaquichinata villangui. Paicunataca cashna ningui: Mandaj Jatun Diosca, cashnami nin: ‘Israelcunata pushajcunalla, ¡aij imachari tucunguichi! Cangunaca, cangunapaj munashcatallami ruranajunguichi. Michijcunaca, ¿nachu llamacunata michin?

3Cangunaca, virataca micunajunguichimi, milmataca churajunatami ruranguichi. Virayashca llamataca, umata fitishpami huañuchinguichi. Ashtahuangarin caishuj llamacunataca, na michishpami saquinguichi.

4Irquilla llamacunatapash, na shinllichishpami saquircanguichi. Huañujuj llamagutapash, na jambishpami saquircanguichi. Chaqui faquitapash, na huatachishpami saquircanguichi. Caita chaita purinajujpica, corralpipash na tandachishpami saquircanguichi. Chingajpipash, na mascanllu carcanguichi. Ashtahuangarin ninandapacha llaquichishpami, mandashpa charircanguichi.

5Paicunaca michij illaimandami, pandashpa caita chaita purinajurca. Shinamandami paicunataca, sachapi causaj animalcuna micunajurca. Caita chaitami rinajurca.

6Ñuca llamacunaca chingashcami, urcucunata, lomacunata purinajurca. Ñuca llamacunaca cai alpapica, caita chaitami purinajurca. Paicunataca pipash na tapushpa, mascarcachu.

7Shina cashcamanda michijcuna, Mandaj Dios rimashcata uyanami canguichi:

8Mandaj Jatun Dios Ñucami, cashna nini: Ñucaca causajunipachami. Ñuca llamacunataca, michij illajpimi shuhuanajurca. Sachapi causaj millai animalcunami micunajurca. Ñuca llamacunataca, Ñuca michijcunapash na mascagrircachu. Ashtahuangarin chai michijcunaca, paipurallata michirishpami, Ñuca llamacunataca napacha michinajurca, ninimi.

9Shina cashcamanda michijcunaca, Mandaj Dios Ñuca ima nishcatami uyana canguichi.

10Mandaj Jatun Dios Ñucami, cashna nini: Michijcunahuanga ninanda fiñarishcami cani. Ñuca llamacunataca, chai michijcunapaj maquimanda quichujpimi, ña na ashtahuan michinajunga. Michijcunapash, na ashtahuan paicunapaj munaita ruranajungachu. Ñuca llamacunataca, paicunapaj maquimanda quichujpimi, paicunaca imata ruranatapash na charinga, ninimi.

11Mandaj Jatun Dios Ñucami, cashna nini: Ñucallatami, Ñuca llamacunataca mascangapa rishpa tarigrisha.

12Imashnami michij runaca, caita chaita rishca paipaj llamacunata mascashpa rijsin, chashnallatami Ñucapash, Ñuca llamacunataca rijsisha. Fuyulla junda, yana yana punllapi, caita chaita rishpa chingashca pushtucunamandami llujchimusha.

13Ñucami paicunataca, shuj llactacunaman rishcamandaca tandachimusha. Paicunaman carashca llactaman pushamushpami, Israel llacta urcu alpacunapi, jatun yacu manñacunapi michisha. Maipi michinalla ali pushtucunapimi michisha.

14Ali jihuacunapi michishpami, paicunataca, Israel llacta jatun urcu alpacunapi tandachishpa, yacuta carasha. Chaipimi, ali corralpi puñushpa, juyailla ali jihuacunata micushpa purinajunga.

15Ñuca llamacunataca, Ñucallata michishpami, maipi tandanajuna pushtucunapi churasha. Mandaj Jatun Dios Ñucami, chashna nini.

16Caita chaita rishpa chingashca purijcunatapash Ñuca mascashpami, corralman tigrachimusha. Chaqui faqui llamacunatapash, irquilla llamacunatapash, Ñucami alichisha. Shinallata, ali racuyashca, shinlli llamacunatapash, chashnallata ricushpami michisha.

17Ashtahuangarin cangunamandaca Mandaj Jatun Dios Ñucallatami, cashna nini: Ñucami, llamacunataca llamapura, jari llamacunataca, jari llamapura, chivocunataca chivopura agllashpa, imashna cashcata ricusha.

18Cangunaca, ali jihuacunata micunajushpapash, chai jihua puchushcataca, chaquihuan sarushpami mapayachinguichi, ¿chaica alichu canga? Shinallata, punchalla ali yacuta ufiashpapash chaquihuan sarushpami, chai yacutaca mapayachinguichi, ¿chaica alichu canga?

19Ñuca llamacunaca, canguna sarushca jihuatami micunajun. Canguna sarushpa mapayachishca yacutami ufianajun.

20Chaimandami Mandaj Jatun Dios Ñucaca, cashna nini: Racuyashca llama, irquilla llama imashna cashcataca, Ñucami ricusha.

21Cangunallatami, chai irquilla llamacunataca calpachircanguichi. Shinallata tucui irquilla llamacunatapashmi, manllachishpa calpachircanguichi. Chashna rurashpami, caita chaita cacharcanguichi.

22Ñuca paicunata huacaichijpimi, paicunataca pipash na shuhuanga. Ñucami paicunataca, imashna cashcata ricusha.

23Shinallata paicunata michichunga, shuj michijta Ñuca churajpimi, paicunataca ali michinga. Ñucapajta ruraj Davidta michichun churajpimi, paicunataca ali michinga.

24Mandaj Dios Ñucami, paicunapaj Taita Dios casha. Ñucapajta ruraj Davidca, paicunata mandajmi canga. Mandaj Dios Ñucami, chashna nircani.

25Paicunataca, millai animalcuna tiyaj pushtumanda llujchishpami, ali causaita charichun, pactachingapa ari nisha. Jichushca pambacunapipash, quiru junda pambacunapipash, imatapash na manllashpami causanajunga.

26Paicunataca, Ñucapaj loma muyundicunapimi causachun saquisha. Shinallata tamiatapash, tamiana punllacunapimi juyailla cachamusha.

27Pamba yuracunapipash, alpacunapipash, ali granocunami fucunga. Paicunaca cai llactapica, imatapash na manllashpami causanajunga. Paicunaca, llaquichijpi, gañangunashna causanajushcamanda cacharichijpimi, Ñucataca, Mandaj Dios cajta yachanajunga.

28Maijan shuj llactacunapash, paicunataca ña na prezu apangachu. Millai animalcunapash, na micungachu. Ashtahuangarin, pipash na llaquichijpimi, imatapash na manllashpa causanajunga.

29Ali fucuj yuracunata paicunapaj llactapi viñachijpimi, cutinga na yarjaimanda llaqui apanajunga. Shuj llactacunapi causajcunapash, na ashtahuan llaquichingachu.

30Shinamandami, paicunata Mandaj Taita Dios Ñucallata, paicunahuan cajta yachanajunga. Israelcunaca, Ñuca agllashca gentecuna cajtapashmi yachanajunga. Mandaj Jatun Dios Ñucami, chashna nini.

31Cangunaca, Ñuca llamagucunami canguichi. Ñuca pambapi micuj Ñuca llamacunalla, cangunaca runacunallami canguichi. Ñucaca, cangunapaj Taita Diosmi cani’ ninmi Mandaj Jatun Diosca nishpa villai” nihuarcami.