1 REYES 21 - Quichua Imbabura 2016

Nabot runapaj uva chagrata Acab quichushcamanda

1Samaria llactata mandashpa tiyajuj Acab runapaj huasi ñaupajpimi, Jezreel shuti pueblomanda Nabot shuti runaca uva chagrata charirca.

2Chaimandami Acab runaca, Nabot runataca cashna nirca:

“Ñuca huasi quimiriaj, uva tarpushca alpata ñucaman cuhuai. Chaipimi imapash micuna yuragucunata tarpungapa munani. Chai alpamandaca, uva tarpushca shuj ashtahuan ali alpatami cusha. Cambaj ashtahuan ali cana cajpica, can mashna nishcatami cushallami” nircami.

3Shina nijpimi Nabot runaca, Acab runataca cashna nirca:

“Ñuca taitacuna carashca alpata canman cunataca, Mandaj Diosllata jarcahuachun” nircami.

4“Ñuca taitacuna carashca alpataca, na cushachu” nijpimi, Acab runaca ninanda llaquirishpa, ninanda fiñarishpa, paipaj huasiman tigramurca. Paica, Jezreel shuti pueblopi causajuj Nabot runa chashna nishcamandami, ñavitapash pircaman tigrachishpa, micunatapash na chasquishpa sirijurca.

5Chashna cajpimi, Jezabel shuti paipaj huarmica, cashna nirca:

“¿Imashpata chashna ninanda llaquirishpa, micungapapash na munangui?” nircami.

6Shina nijpimi, cashna nirca:

“Jezreel pueblomanda Nabot runahuan parlashpami: ‘Uva tarpushca cambaj alpata cuhuai. Chai alpamandaca culquita, na cashpaca, uva tarpushca ashtahuan ali alpatallata cushallami’ nircanimi. Shina nijpipash paica: ‘Uvata tarpushca ñuca alpataca napacha cushachu’ nihuarca” nircami.

7Shina nijpimi, Jezabel shuti paipaj huarmica, cashna nirca:

“¿Nachu, canga Israel llactata jatun mandaj cangui? Jatarishpa micushpa cushijui. Jezreel pueblopi causaj Nabot runapaj uva tarpushca alpataca, ñucami canman cusha” nircami.

8Chashna nishpami chai huarmica, Acab runapaj shutipi quilcashpa, paipaj surtijahuan sellota churashpa, Nabot runa causajuj pueblopi mandajcunaman, cati mandajcunamambash cacharca.

9Chai quilcashcapica, cashnami nijurca: “Na micushpa chishangapa tucuicunata tandachinguichi. Chai jipaca, gentecunapaj ñaupajpi Nabot runataca churanguichi.

10Chaipica: ‘Taita Diostapash, jatun mandajtapash na alicachishpami rimarcangui’ nishpa villachun, ishcaipura na alita ruraj llulla runacunata churanguichi. Paicuna chashna nijpica, pueblomanda llujchishpa rumicunahuan huañuchinguichi” nijurcami.

11Chaimandami, Nabot runa causajuj pueblopi tucuita ricushpa mandajcunapash, cati mandajcunapash, Jezabel huarmi quilcashcapi imata mandashcatapash tucuita pactachinajurca.

12Tucuicuna na micushpa chishana punllata rurashpami, Nabot runataca chai gentecunapaj ñaupajpi tiyachinajurca.

13Chaimanmi ishcaipura llulla runacunatapash pushamushpa tiyachirca. Chai runacunami: “Cai Nabot runami Taita Diostapash, jatun mandajtapash na alicachishpa rimarca” nishpa, llullashpa villanajurca. Shina villajpimi, Nabot runataca pueblomanda canllaman llujchishpa, rumicunahuan huañuchirca.

14Chai jipami: “Nabot runataca, ñami rumicunahuan huañuchircanchi” nishpa, Jezabel huarmiman villachun cacharca.

15Nabot runata, rumicunahuan huañuchishcata Jezabel yachashpami, Acab runataca cashna nirca:

“Jezreel pueblopi causajushca, Nabot runapaj uva tarpushca alpataca japilla. Chai alpataca, culquipajpash na jatungapa munarcachu. Ñami Nabot runaca huañushca” nircami.

16Nabot runa huañushcata yachashpami Acab runaca, Jezreel pueblopi causashca Nabot runapaj uva tarpushca alpata japingapa urai rirca.

17Chaimandami, Tisbe shuti pueblomanda Eliasman, Mandaj Diosca cashna nirca:

18“Samaria llajtapi causashpa, Israel llactata mandajuj, Acab runahuanmi tuparingapa urai rina cangui. Paica, uvata tarpushca Nabot runapaj alpata japingapami urai rishca.

19Paitaca cashna ningui: Mandaj Diosca, cashnami nijun: ‘¿Nabot runata huañuchishca jahuachu alpatapash quichurcangui? Maipimi Nabot runapaj yahuarta alcucuna lambinajurca, chaipillatami cambaj yahuartapash alcucuna lambinajunga’ ninmi nigri” nircami.

20Chaimandami Acab runaca, Eliastaca:

“Canga ñucata fiñashpami, caipi cashna ningapa shamushcangui” nirca.

Shina nijpimi Eliasca, cashna nirca:

“Mandaj Diospaj ñaupajpi na alita rurashcamandami, cambajman shamuni.

21Mandaj Diosca cashnami nijun: ‘Ñucami jatun llaquita canman cachamugrini. Cambaj miraicunataca, fichashpa shitajshnami tucuchisha. Acab runapaj ayllucunataca, Israel llactapi gañan cajpi, na gañan cajpipash tucuillatami tucuchisha.

22Cambaj ayllucunataca, Nabat runapaj churi Jeroboam runapaj huasi ucupuratashna, Ahías runapaj churi Baasa shuti runapaj ayllutashnami tucuchigrini. Ñucata na cazushpa, ñucata fiñachishcamanda, Israelcunatapash juchata rurachishcamandami, chashna tucuchigrini, ninmi’ nircami.

23Jezabel huarmimandapash, Mandaj Diosca cashnami nijun: ‘Jezabel huarmitaca, Jezreel pueblo muyushca pircapimi alcucuna micunga’ ninmi.

24Acab runapaj miraicuna pueblopi huañujpica, alcucunami micunga. Pambapi huañujpica angacunami micunga” ninmi.

25(Mandaj Diospaj ñaupajpica, Acab runashna jatun na alita ruraj runaca, napacha tiyarcachu. Jezabel shuti paipaj huarmi na ali yuyaita cujpimi, chashna rurajurca.

26Acab runaca, jatun na alitami rurajurca. Rurashcalla dioscunata catishpami, amorreo gentecunashna na alitalla rurashpa causajurca. Chai gentecunataca Mandaj Diosmi Israelcunapaj ñaupajmanda llujchishpa cacharca).

27Acab runaca, Elías chashna nijpimi, pai churajushcata liquishpa, cañamu finduta churajurca. Shinallata, ninanda llaquirishpa purijushpami, micuitapash na micushpa, cañamu findutallata churajushca puñujurca.

28Chaimandami Mandaj Diosca, Tisbe shuti pueblomanda Eliasmanga cashna nirca:

29“Ñuca ñaupajpi Acab runa ninanda llaquirijtaca, ¿nachu ricungui? Ñuca ñaupajpi chashna llaquirishcamandami, pai causajui punllacunapica, na llaquichisha. Paipaj churi mandajui punllacunapimi, paipaj ayllucunataca ninanda llaquichisha” nircami.