ÉXODO 32 - Quichua Imbabura 2016

1Israel gentecunaca, Moisés urcumanda na ucha uriajumunda ricushpami, Aaronbajman shamushpa cashna ninajurca:

“Ñucanchita ñaupashpa pushachunmi, shuj dioscunata rurana cangui. Egipto llactamanda ñucanchita llujchimuj Moisés runaca, ima tucushcatapash na yacharinllu” ninajurcami.

2Shina nijpimi Aaronga:

“Cangunapaj huarmicuna, churicuna, ushicuna, rinripi churajushca curi zarcillocunata apamuichi” nirca.

3Shina nijpimi, tucui Israel gentecunaca, paicunapaj rinripi churajushca curi zarcillocunata, Aaronman apamunajurca.

4Aaronga, chaicunata japishpa yacuyachishpaca, filo jirruhuan tacashpami, shuj shicuta rurarca. Shina rurajpimi, cashna ninajurca:

“Israel gentecunalla, cangunataca, cai dioscunami, Egipto llactamanda llujchimurca” ninajurcami.

5Chashna ninajujta Aarón uyashpami, shuj altarta shicupaj ñaupajpi rurashpa:

“Cayapaca, Mandaj Diospaj jatun punllami canga” nishpa tucuicunaman villajurca.

6Cayandi punllapaca, tutamandata jatarishpami, chai shicuman animalcunata cushpa tucuillata rupachinajurca. Shinallata, ali causaita charingapa nishpami ofrendacunatapash cunajurca. Shina rurashpami Israelcunaca, micungapa, ufiangapa tiyarirca. Chai jipaca, tucui na alicunata rurangapa callarirca.

7Shina cajpimi, Mandaj Diosca, Moisestaca cashna nirca:

“Egipto llactamanda can llujchimushca gentecuna, na alita ruranajujta ricungapa, ucha urai rilla.

8Paicunaca, ali causachun Ñuca mandashcata na cazushpami, curita yacuyachishpa rurashca shicuta alicachinajun. Shinallata, animalcunata cushpa huañuchishpami, cashna ninajun: ‘Israelcunalla, caicunami, cangunata Egipto llactamanda llujchimushca dioscuna’ ninajunmi” nircami.

9Mandaj Diosca, Moisestaca cashnatapashmi nirca:

“Cai gentecunataca, napacha cazuj gentecuna cajtami ricuni.

10Cunanga, ninandapacha fiñarishpa, paicunata tucuchigrijujpipash, saquinallami cangui. Cunanga, canmandami shuj jatun llactata rurasha” nircami.

11Shina nijpimi Moisesca, Mandaj Taita Diospaj ñaupajpi, cashna nishpa mañajurca:

“Mandaj Dioslla, ¿imashpata cambaj jatun ushaihuan, Egipto llactamanda llujchimushca, can agllashca gentecunataca, ninandapacha fiñarigringuiyari?

12Egipto llacta gentecunaca: ‘Paicunataca, llaquichishpa, urcucunapi huañuchishpa tucuchingapami llujchishca’ ninajungami. Shina cashcamanda, ninandapacha fiñarishpa llaquichingapa munajushcataca, ama pactachipaichu.

13Cambajta ruraj Abrahamda, Isaacta, Israeltaca yaripayari. Paicunamanmi, Canmandallata, cashna nishpa juramentushcangui: ‘Ñucami, cangunapaj miraicunataca, jahua pacha luzerocunatashna mirachisha. Carashapachami nishca, tucui cai llactata cangunapaj miraicunaman carajpimi, causaita causaicaman paicunapaj cachun japinajunga’ nircanguimi” nijurcami.

14Shina nijpimi Mandaj Diosca, Pai agllashca gentecunata llaquichishami nishcataca, na pactachirca.

15Moisesca chai urcumanda urai shamujushpaca, mandashca shimicunata, huashamambash, ñaupajmambash, quilcashca ishcai tabla rumicunata apashpami shamujurca.

16Chai tabla rumicunaca, Taita Dios rurashcami carca. Chai tabla rumicunapi quilcashcapash, Taita Diospacha quilcashcami carca.

17Josueca, Israelcuna ninanda caparinajujtami uyarca. Shina uyashpami Moisesta cashna nirca:

“Carpacunapica macanajushpa ninanda caparinajujmari uyarin” nircami.

18Shina nijpimi Moisesca:

“Shinlli runacuna mishashpa caparinajuipash, ushai illaj runacuna mishai tucushpa caparinajuipash na canllu. Ashtahuangarin, cushijushpa candanajujtami uyani” nircami.

19Carpacunata shayachishca pushtuman Moisés chayashpaca: Shicutapash, chaipi tushunajundapash ricushpami, ninandapacha fiñarishpa, pai charijushca tabla rumicunataca, urcu chaquipi shitashpa faquirca.

20Shinallata, paicuna rurashca shicuta japishpa, ninapi rupachishpa, ñutu jacu tucungacamanmi cutashpa, yacupi chapushpa, Israel gentecuna ufiachun curca.

21Chai jipami, Moisesca, Aarondaca cashna nirca:

“Cashnapacha juchata rurachingapaca, cai gentecunaca ¿Candaca imatata rurarcayari?” nircami.

22Shina nijpimi Aaronga:

“Ñucata mandajlla, ñucataca ama fiñahuaichu. Cai gentecunaca, na alitalla rurangapa munaj cajtaca, canllata alimi yachangui.

23Paicunami cashna nihuarca: ‘Ñucanchita ñaupashpa richun, dioscunata rurayari. Egipto llactamanda ñucanchita llujchimushca Moisestaca, ima tucushcatapash na yacharinllu’ ninajurcami.

24Shina ninajujpica: ‘¿Pita curita charinguichi? apamuichi’ nircanimi. Shina nijpi curita apamujpimi, chaicunataca ninapi churarcani. Shina churajpimi, cai shicuca ninamanda llujshirca” nijurcami.

25Moisesca, Aarón saquijpi, Israelcuna chashna na alita rurashcatami ricurca. Shinallata, paicunata fiñaj gentecuna chaita ricushpaca, na alicachinatami yacharca.

26Shina cajpimi, Moisesca, carpacunaman yaicuna pungupi shayarishpa:

“¡Mandaj Diosta catingapa munajcunaca, caiman tandanajumuichi!” nirca.

Shina nijpimi Levipaj tucuilla miraicunaca, Moisespajman quimirimurca.

27Shina cajpimi Moisesca, cashna nirca:

“Israelcunata Mandaj Taita Diosca cashnami nijun: ‘Tucuicunallata cangunapaj espadahuan, tucuilla carpacunaman tigrashpa, cangunapaj huauquita, cumbata, aylluta huañuchigrichi’ nijunmi” nircami.

28Shina nijpimi Levipaj miraicunaca, Moisés mandashcashna ruranajurca. Israelcunaca, chai punllapica, quimsa huarangashna runacunami huañurca.

29Shinamandami Moisesca cashna nirca:

“Cunanga tucuicuna, churita cashpa, huauquita cashpapash huañuchishcamandami Mandaj Diospajlla tucushpa bendicionda chasquishcanguichi” nircami.

30Chai cayandi punllami Moisesca, Israelcunataca cashna nirca:

“Cangunaca jatun juchatami rurashcanguichi. Shina cajpipash, ñucami, Mandaj Diospajman vichai rigrini. Canguna juchata rurashcamanda, Dios fiñarishcata yalichi ushashpachari ali caiman” nircami.

31Chai jipami Moisesca, Mandaj Diospajman tigrashpa cashna nirca:

“Curi dioscunata rurashpa, cai gentecuna jatun juchata rurashcamandami, Candaca ninanda mañajupani.

32Cunanga, paicunapaj juchamandami perdonda mañapani. Paicunapaj juchata na perdonashpaca, ñuca shutita cambaj libropi quilcashcataca anchuchipailla” nircami.

33Shina nijpimi Mandaj Diosca, Moisestaca cashna nirca:

“Maijan cashpapash, Ñucata fiñashpa juchata rurajpaj shutitami, Ñuca libropi quilcashcamanda anchuchisha.

34Cunanga cai gentecunataca, Ñuca maiman pushashpa ringui nishcaman pushashpa rilla. Ñuca angelmi canda ñaupashpa ringa. Ashtahuangarin, llaquichina punllapica, paicuna juchata rurashcamandaca Ñucami llaquichisha” nircami.

35Shina nishpami Mandaj Diosca, curi shicuta Aarón rurashcamandaca, shuj ninan llaquita cachamurca.