1Juyashca crijcuna, cangunaman Taita Diospaj Shimita villangapa shamushpaca, juyailla rimaicunahuan, alipacha yachajushca shimicunahuanga na villangapa shamurcanichu.
2Cangunamanda imatapash yachangapaca, na munarcanichu. Ashtahuangarin, Jesucristota chacatashcatami villangapa shamurcani.
3Cangunahuan cashpaca imatapash na yachajshna cashpami, ninan manllaihuan chujchujurcani.
4Ñuca parlashpa, ñuca villajushpapash, gentecunapaj alipacha yachashcahuanga na villajurcanichu. Ashtahuangarin, Diospaj Espíritu ushaita charijtami ricuchishpa villajurcani.
5Shinamandami, gentecunapaj yachaipira ama shinlliyashpa catichun villajurcani. Ashtahuangarin, Taita Dios ushaita carajpi crichunmi villajurcani.
Taita Diosmandaca, Paipaj Espiritullami yachachin6Shinamandami, ña shinlli crijpuracunaca, Taita Diosmanda ali yachachij shimicunata villanajunchi. Cai shimicunaca, na cai pachamandachu. Cai pachata mandajcunamandapash na canllu. Chai mandajcunaca chinganllami.
7Ashtahuangarin, Taita Dios caramushca, pipash na yachai ushashcatami villanajunchi. Taita Diosca, nara cai pachata rurashpallatami chai ali yachaitaca pacalla charijushca. Taita Diosca, punchapamba llactagupi causagrichunmi ñucanchitaca ña agllashca carca.
8Chaitaca, cai pachata mandajcunapash na yacharcachu. Chaita yachashpaca, ninan ushaita charij Apunchi Jesustaca napacha cruzpi chacatamanllu carca.
9Ashtahuangarin quilcashcapica cashnami nijun:
“Ricuitapash na ricushca, uyaitapash na uyashca,
shungupipash gentecuna na yarishcatami, Taita Diosca,
Paita ninanda juyajcunamanlla alichishca charijushca” nijunmi.
10Ashtahuangarin Taita Diosca, Paipaj Espirituhuanmi ñucanchiman yachachimushca. Diospaj Espirituca tucuita yachashpami, Taita Dios imata yarijujtapash yachan.
11Shujpaj shungutaca pipash na yachai ushanllu, paipaj espiritullami yachai ushan. Shinallatami, Taita Dios imata yarijujtaca, pipash na yachai ushan. Taita Diospaj Espiritullami chaitaca yachai ushan.
12Ñucanchica, cai pachapaj espiritutaca na chasquishcachu canchi. Ashtahuangarin, Taita Diospaj Espirituta chasquishpami, Taita Dios imata carashcatapash yachai ushanchi
13Shina cashpami ñucanchica, ali yachajushca runacuna yachachishca shimicunataca na villanajunchi. Ashtahuangarin, Diospaj Espíritu yachachishcatami, Diospaj Espirituta charijcunamanlla aligutapacha yachachinajunchi.
14Ashtahuangarin, Diospaj Espirituta na charij runaca, Pai imata yachachijujtaca na yachai ushanllu. Juizu illaj runa parlajushcashna ricurijpimi, na yachajui ushan. Diospaj Espíritu yarichijpillami alita, na alitapash yachajui ushan.
15Ashtahuangarin, Diospaj Espirituta charijcunaca, alita, na alitapash tucuitami yachai ushan. Shina cajpimi, paicunataca pipash na juchachi ushanga.
16“Jatun Dios imata yarijujtaca, ¿pipash yachai usharcachu? Paitaca, ¿pipash yachachi ushangachu?” nijunmi. Ashtahuangarin ñucanchica, Cristopaj yuyaitami charinchi.
Who We AreWhat We EelieveWhat We Do
2025 by iamachristian.org,Inc All rights reserved.
