JOSUÉ 8 - Quichua Imbabura 2016

Hai shuti pueblota mishashpa quichushcamanda

1Mandaj Diosca, Josuetaca cashnami nirca: “Na manllashpa, shinllipachami cana cangui. Cunanga, macanajunata yachaj runacunata pushashpa, Hai shuti puebloman vichai rilla. Chaipi jatun mandajtaca, chai pueblondi, pai mandajuj gentecunandi, paipaj alpacunandimi cambaj maquipi churarcani.

2Jericó pueblopi causajcunata, paicunata jatun mandajta imashna tucuchishcashnami, Hai shuti pueblopi causajcunatapash, paicunata mandajtapash tucuchina cangui. Cunanga, paicuna imatalla charishcataca, animalcunandi japishpa apanguichilla. Paicunataca, pueblo huashata cungashcapi yaicushpami llaquichina canguichi” nircami.

3Shina nijpimi Josueca, macanajunata yachaj runacunandi, Hai shuti puebloman vichai ringapa alichirirca. Josueca, quimsa chunga huaranga, shinlli runacunata agllashpami, chai pueblomanga tuta cacharca.

4Paicunataca, cashna mandashpami cacharca: “Ali uyahuaichi, chai pueblomanga, cungashcapimi huashata yaicuna canguichi. Chai pueblomandaca, na yapa caruyashpami, macanajungapa alichirishcalla shuyana canguichi.

5Ñucahuan rinajuj tucui gentecunandimi chai puebloman ashtahuan quimirishun. Chai pueblopi causajcuna, ñucanchihuan macanajungapa llujshimujpica, pundashnami, paicunapaj ñaupajmanda calpashun.

6Shina calpajpimi: ‘Pundashnallatami ñucanchita manllashpa calpanajun’ nishpa, pueblomandaca ashtahuan carucaman catimunajunga. Shina cajpica, paicunata ñaupashpa calpanajushunllami.

7Shina cajpimi, canguna pacajushca pushtumanda llujshishpa, chai pueblota japingapa yaicuna canguichi. Cangunata Mandaj Taita Diosca, chai pueblotaca cangunapaj maquipimi churanga.

8Chai puebloman yaicushpa mishashpaca, Mandaj Dios mandashcata, ñuca mandashcashnami tucuilla rupachina canguichi” nircami.

9Josué chashna cachajpica, Bet-el shuti pueblohuan, Hai shuti pueblohuan chaupipimi paicunaca saquirirca. Hai shuti pueblomandaca, indi huashajunmanmi pacajushpa chapangapa rinajurca. Josueca, gentecunapaj carpacunapimi chai tutaca pacarijurca.

10Cayandi tutamandata jatarishpami, Josueca, tucuicuna alichirishcalla cachun ricushpa purijurca. Chai jipami Josueca, Israelcunata mandaj ancianocunahuan, gentecunata ñaupashpa, Hai shuti pueblopi causajcunahuan macanajungapa vichai rirca.

11Josuehuan rinajuj macanajunata ali yachaj tucui runacunaca, vichai rishpami ña chayanajurca. Paicunaca, chai puebloman chayashpami, Hai shuti pueblo janajman carpacunata shayachishpa tiyanajurca. Paicuna tiyanajuj pushtuhuan, Hai shuti pueblohuan chaupipica pugru pambami tiyarca.

12Josueca, Hai shuti pueblohuan, Bet-el shuti pueblohuan chaupipi, indi huashajunmanmi, macanajunata ali yachaj picha huaranga runacunata pacalla shuyachun saquirca.

13Carpacunataca, pueblomanda janajmanmi shayachirca. Shinallata, indi huashajunmanmi, macanajunata ali yachaj runacunataca pacalla shuyachun saquirca. Josueca, chai pugru pamba chaupicamanmi chai tutaca chayagrirca.

14Hai shuti pueblota jatun mandaj chaita ricushpaca, paipash, chai pueblopi causajcunapash, tutamandata alichirishpami, Israelcunahuan macanajungapa Arabá shuti jatun pambaman llujshinajurca. Paicunaca, Israelpuramanda macanajunata ali yachaj runacuna, Hai shuti pueblo huashaman pacalla shuyanajundaca na yacharcachu.

15Josueca, tucui Israelcunandimi, mishai tucushcashnalla, paicunapaj ñaupajmandaca, jichushca pambaman rina ñanda calpanajurca.

16Shina calpanajujpimi, Hai shuti pueblopi causajcunaca tucuicuna tandanajushpa catinajurca. Josueta shina catinajushpami, chai pueblomandaca caruyanajurca.

17Hai shuti pueblopi, Bet-el shuti pueblopi causajcunaca, tucuillami Israelcunata catinajurca. Chashna catinajushpami, pueblopica shujllapash na saquirishca carca.

18Mandaj Diosca, Josuetaca cashnami nirca: “Cambaj maquipi charijuj tugsishpa huañuchina caspita, Hai shuti puebloman ricuchi. Chai pueblotaca, Ñucami cambaj maquipi churasha” nircami. Shina nijpimi Josueca, paipaj maquipi charijuj tugsishpa huañuchina caspitaca, chai puebloman ricuchirca.

19Shinallata, pacalla chapanajuj runacunaca, Josuepaj maquita vichaiman churanhuanmi, paicuna chapanajushca pushtumanda llujshishpa, Hai shuti puebloman calpashpa yaicushpa, chai pueblotaca rupachinajurca.

20Hai shuti pueblopi causajcuna, paicunapaj pueblota tigrashpa ricushpaca, jahua pachaman chayajta cushnijujtami ricunajurca. Paicuna catijpi, jichushca pambata calpanajun Israelcuna, paicunahuan macanajungapa tigramujpimi, maiman calpaitapash na ushanajurca.

21Josueca tucui Israelcunandimi, pacalla chapanajuj runacuna Hai shuti pueblota ña japinajushcata ricurca. Shinallata, chai pueblomandaca, cushnipash jahua pachacaman rijujta ricushpami, Hai shuti pueblomanda gentecunahuan macanajungapa tigranajurca.

22Shinallata caishuj runacunaca, Hai shuti pueblomanda llujshishpami tuparimunajurca. Shinami, caimanda, chaimanda llujshishpa, Israelcuna chaupipi churashpa, shujllatapash pacajushpa richunga na saquishpa, tucuillatapacha huañuchinajurca.

23Ashtahuangarin, Hai shuti pueblota jatun mandajtaca causajta japishpami, Josuepajman apamunajurca.

24Hai shuti pueblomanda runacunataca, chai pambapimi Israelcunaca espadahuan huañuchishpa tucuchirca. Chai jipami, Hai shuti puebloman tigrashpa, chaipi huaquin puchushcacunatapash huañuchishpa tucuchinajurca.

25Chai punllapica, Hai shuti pueblopi causajcunaca, jaricunandi, huarmicunandimi, chunga ishcai huaranga huañurca.

26Josueca, Hai shuti pueblopi causajcunata huañuchishpa tucuillata tucuchingacamanmi, tugsishpa huañuchina caspitaca chai puebloman ricuchishpa shayajurca.

27Ashtahuangarin, Mandaj Dios, Josueta mandashcashnami Israelcunaca, Hai shuti pueblopi causajcunapaj animalcunatapash, tucui imalla tiyashcacunatapash apanajurca.

28Josueca, Hai shuti pueblotaca tucuillata rupachishpami, tucui causaipi rumi mundunlla cachun saquirca.

29Hai shuti pueblota jatun mandajtaca, jatun quirupimi tutayangacaman huarcushpa saquirca. Ña tutayajpimi Josueca, chai huañushcata caspimanda uriajuchishpa, Hai shuti puebloman yaicuna pungupi shitachun mandarca. Chai shitashca jahuapica, ashtaca rumicunatami churarca. Chai rumicunaca, chaipillatami cunangaman tiyanajun.

Mandashcacunata, Ebal shuti urcupi quilca catishcamanda

30Israelcunata Mandaj Taita Diosmanmi, Josueca shuj altarta, Ebal shuti urcupi rurarca.

31Mandaj Diospajta ruraj Moisés imashna mandashcashna, shinallata, Moisés mandashpa quilcashcapi nijujshnami, Israelcunaca, jirruhuanga na faquishca rumicunahuan shuj altarta ruranajurca. Chai altarpimi, Mandaj Diosman animalcunata cushpa tucuillata rupachinajurca. Shinallata, Dioshuan ali cangapapashmi, animalcunata cunajurca.

32Shinallata, tucuilla Israelcuna ricujtami Josueca, Moisés mandashpa quilcashcata, chai rumicunapi cutin quilcarca.

33Shina cajpimi, tucui Israelcunapash, mandaj ancianocunapash, shuj mandajcunapash, juezcunapash, Mandaj Dioshuan ari nishpa quilcashcata alichishca arcata chaupipi churashca shayanajurca. Diospaj arcata apaj levita sacerdotecunapaj ñaupajpimi, shuj llactamanda runacunapash, Israelcunapash shayanajurca. Israelcunatara bendiciachun nishpami, Mandaj Diospajta ruraj Moisés mandashcashna, shuj chaupica Gerizim shuti urcu chimbaman, caishuj chaupica Ebal shuti urcu chimbaman shayanajurca.

34Chai jipami Josueca, Moisés mandashca shimicunatapash, bendiciana shimicunatapash, llaquichina shimicunatapash, imashna quilcashca tiyajujta ricushpa quilca catijurca.

35Josueca, Moisés mandashca shimicunataca tucuilla tandanajushca Israelcunapaj ñaupajpimi quilca catijurca. Huarmicunamambash, uchilla huahuacunamambash, shuj llactamanda shamushpa Israelpurapi causaj gentecunapash uyachunmi quilca catishpa uyachijurca.