2 CRÓNICAS 12 - Quichua Imbabura 2016

Sisac shuti runa, Judá llactaman yaicugrishcamanda(1 Rey. 14:21-31)

1Roboam shuti runaca, llactata ña shinlli mandajushpa, Mandaj Dios mandashca shimicunata saquijpica, tucui Israelcunapashmi, paita catinajurca.

2Roboam runaca, ña picha huatata mandajushpa, Mandaj Diosta saquijpimi, Egipto llactata jatun mandaj Sisac shuti runaca, Jerusalenbi causajcunahuan macanajungapa vichai shamurca.

3Sisac shuti runaca, huaranga ishcai patsaj carretacunahuan, caballocunapi tiyarij sucta chunga huaranga runacunahuanmi shamurca. Chai jahuapash, na yupai ushanalla ashtaca gentecunami, paihuanga Egipto llactamanda shamunajurca. Paicunaca, Libia llactamanda runacuna, suquieno runacuna, Etiopía llactamanda runacunami carca.

4Judá llactapi tiyaj muyundi jatun pircacunahuan pueblocunata quichushpami, Jerusalengaman chayamurca.

5Chaimandami, Semaías shuti profeta runaca, Roboam runapajman, Judá llactapi cati mandajcunapajman shamurca. Paicunaca, Sisac shuti runa shamushca cajpimi, Jerusalenbi tandanajushca tiyanajurca. Paicunatami Semaías shuti runaca, cashna nirca:

“Mandaj Diosca, cashnami nin: ‘Cangunallatami, Ñucata saquihuarcanguichi. Chaimandami Ñucapash cangunataca, Sisac shuti runapaj maquipi saquircani’ ninmi” nircami.

6Shina nijpimi, Israelcunata mandajcunapash, jatun mandaj Roboam runapash ninanda pingai tucushpa, urai cumurishpa:

“Ali cashcatalla ruraj Mandaj Diosmi” ninajurca.

7Chashna llaquirijta ricushpami Mandaj Diosca, Semaías shuti runaman cashna nirca: “Paicunaca ninandami llaquirirca. Shina cashcamanda na tucuchigrinichu. Ashtahuangarin, cai llaquimanda quishpichishpami paicunataca na tucuchigrini. Jerusalenbi causajcunahuan ninanda fiñarishca cashpapash, Sisac shuti runa llaquichijuchunga na saquigrinichu.

8Shina cashpapash, Ñucapajta rurashpa causanahuan, shuj llactacunata jatun mandajcunapajta rurashpa causanahuan, imashna cajta yachachunmi, Sisac runapajta rurajcuna cachun saquigrini” nircami.

9Egipto llactata jatun mandaj Sisac shuti runaca, Jerusalenman vichai shamushpami, Mandaj Diospaj huasipi, mandana huasipi, ima ali tiyashcataca tucuita aparca. Salomón, curihuan rurachishca jarcarina jirrucunatapashmi aparca.

10Jarcarina jirrucunapaj randica, jatun mandaj Roboam runaca, bronce jirrucunatami rurachirca. Chaicunataca, jatun mandaj mandana huasiman yaicuna pungupi ricuj runacunata mandajcunamanmi curca.

11Mandaj Diospaj huasiman jatun mandaj rijpica, chapaj runacuna shamushpami, chai jarcarinacunata apashpa, paihuan rinajun carca. Chai jipaca, paicuna ricuna ucupillatami tigra churagrin carca.

12Roboam runa pingai tucushpa urai cumurijpimi Mandaj Diosca, paihuan ninanda fiñarishca cashpapash, ama tucuillata tucuchingapa ali tucurca. Shinallata, Judá llactapipash tucui imapash alimi carca.

13Chashna tucuita shinllitapacha churashca jipami Roboam runaca, Jerusalenbi mandajurca. Roboam runaca, chuscu chunga shuj huatata charishpami, mandai callarirca. Paica, chunga canchis huatatami, Jerusalenbi mandajurca. Mandaj Diosca, tucui Israel ayllupuramandaca chai pueblotami, paipaj shuti chaipi causajuchun agllarca. Roboam runapaj mamaca, Amón llactamanda Naama shutimi carca.

14Roboam runaca, Mandaj Diostaca na tucui shunguhuan cazushpami na alita rurajurca.

15Punda punllacuna, jipa punllacuna, Roboam runa imatalla rurashcacunaca, ¿nachu profeta Semaías shuti runapash, Dios ricuchishcata villaj Iddo shuti runapash, ayllucunapaj shuticunata quilcashca libropi tiyajun? Roboam runaca, Jeroboam runahuanga, tucui causaipimi macanajushpalla causanajurca.

16Roboam runa huañushpa, paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Abías shuti paipaj churimi mandajurca.