ÉXODO 9 - Quichua Imbabura 2016

Animalcunapi ungüita cachamushcamanda

1Chai jipami Mandaj Diosca, Moisestaca cashna nirca:

“Faraonbaj ñaupajman rishpa cashna ningui: ‘Hebreocunata Mandaj Taita Diosca cashnami nin: Ñuca agllashcacunataca, Ñucata alicachingapa richun saqui.

2Richun saquingapa na munashpa, can jarcashpa catijpica,

3Mandaj Dios Ñucapaj ushaihuanmi, pambapi cambaj animalcunataca llaquichisha. Caballocunata, burrucunata, camellocunata, huagracunata, llamacunatapashmi, millai ungüihuan llaquichisha.

4Mandaj Dios Ñucaca, Israelcunapaj animalcunata, Egiptopi causajcunapaj animalcunatami shicanyachinga. Israelcunapaj animalcunaca, shujllapash ama huañuchunmi chashna shicanyachisha’ ninmi ningui” nircami.

5Mandaj Diosca cashnami nirca:

“Mandaj Dios Ñucaca, caya punllami cai llactapica chashna llaquichisha” nirca.

6Shina nishca cayandi punllapica, Mandaj Dios chashna llaquichijpimi, Egiptomanda tucuilla animalcunaca huañurca. Ashtahuangarin, Israelcunapaj animalcunaca, shujllapash na huañurcachu.

7Shina tucushcata Faraón ricuchun cachajpica, Israelcunapaj animalcunaca shujllapash na huañushcachu carca. Ashtahuangarin Faraonbaj shungu shinlliyashpami, Israelcuna richunga na saquirca.

Chupu ungüihuan llaquichishcamanda

8Mandaj Diosca, Moisestapash, Aarondapash cashnami nirca:

“Shuj hornomanda, maqui junda uchufata japichi. Chaitaca Moisesmi, Faraonbaj ñaupajman rishpa jahuaman tsirapachinga.

9Chai uchufami ñutu alpa tucushpa, tucuilla Egipto llactapi jicharimunga. Chai alpami chupu ungüi tigrashpa, gentecunapipash, animalcunapipash, tucuilla Egipto llactapi ninanda llaquichijunga” nirca.

10Shina nijpimi paicunaca, hornomanda uchufata japishpa, Faraonbajman rishpa, Moisesca jahuaman shitarca. Shina rurajpimi chupu ungüica, gentecunatapash, animalcunatapash japirca.

11Shinallata brujucunapash, chupu ungüihuan japi tucushca cashpami, Moisespaj ñaupajpi shayaritaca na ushanajurca. Brujucunatapash, Egiptopi tucui causajcunatapashmi, chai chupu ungüica llaquichijurca.

12Ashtahuangarin Mandaj Diosllatami, Faraonbaj shungutaca shinlliyachirca. Shinamandami, Mandaj Dios imashna Moisesman nishcashna paicunataca na uyanayachirca.

Runduhuan llaquichishcamanda

13Chai jipami Mandaj Diosca, Moisestaca cashna nijurca:

“Caya tutamandata jatarishpa, Faraonbaj ñaupajpi shayaringui. Paitaca cashna ningui: ‘Hebreocunata Mandaj Diosca cashnami nin: Ñuca agllashcacunataca, Ñucata alicachingapa richun saquinguilla.

14Can na saquijpica, cunanga huañuchina tucui llaquicunatami cachamusha. Canmambash, cambaj cati mandajcunamambash, cambaj gentecunamambashmi chashna cachamusha. Tucui cai pachapica, Ñucashnaca pipash na tiyashcata can yachachunmi, chashna cachamusha.

15Cunanga, candapash, cambaj gentecunatapash, Ñuca ushaihuan ninandapacha llaquichijpica huañunguichimanmi.

16Napacha llullashpami nini. Ñuca ninan ushaita cambi ricuchingapapash, Ñuca shutipash tucui cai pachapi uyarijuchumbashmi candaca churarcani.

17¿Ñuca agllashcacuna richun saquingapa na munashpa, na cazungapa munajunguirachu?

18Shina cashpaca caya punllami, Egipto llacta tiyai callarishca punllamanda cunangaman na tiyashca runduta tamiachimusha.

19Cunanga cambaj animalcunatapash, pambapi tucui imatalla can charishcacunatapash tandachinajuchun cachailla. Gentecuna cashpapash, animalcuna cashpapash, huasiman na apajpi, pambapi shayanajujpica, paicunapaj jahuapi rundu urmajpimi huañunga’ ninmi ningui” nijurcami.

20Mandaj Dios ima nijujta, Faraonbaj cati mandajcuna huaquingunaca manllashpami, paicunapajta rurajcunatapash pacajuchun cachashpa, paicunapaj animalcunatapashmi corralpi vichanajurca.

21Ashtahuangarin, Mandaj Dios imata nijujta na cazujcunaca, paicunapajta rurajcunatapash, animalcunatapash pambapi saquircallami.

22Mandaj Diosca, Moisestaca cashnami nirca: “Tucui Egipto llactapi rundu urmamuchun, cambaj maquita jahua pachamanmi churana cangui. Gentecunapaj, animalcunapaj, Egipto llacta pamba jihua jahuacunapi rundu urmamuchunmi chashna churana cangui” nircami.

23Shina nijpi Moisés, pai charijuj vara caspita jahua pachaman chutajpimi, Mandaj Diosca rundutapash, rayutapash tamiachimurca. Chashnami Mandaj Diosca, Egipto llactapica runduhuan llaquichijurca.

24Ninanda rundujushpami, runduca rayushpa urmamujurca. Egipto llactapica, cashna llaquicunaca napacha tiyashcachu carca.

25Chai rundumi, Egipto llactapica pambapi tucui ima tiyashcatapash, gentecunatapash, animalcunatapash llaquichijurca. Shinallata, pambapi tucuilla jihuacunatapash, chai llactapi tucuilla quirucunatapashmi tucuilla tucuchijurca.

26Israelcuna causanajuj Gosén shuti llactapillami runduca na urmarca.

27Shinamandami Faraonga, Moisestapash, Aarondapash cayachun cachashpa cashna nirca:

“Cunangarimbash juchatami rurashcani. Mandaj Diosca ali cashcatalla rurajmi. Ñucapash, ñuca gentecunapash, Diosta na manllashpami causashcanchi.

28Taita Dios cachamujun rayucunapash, rundupash jarcarichun, Mandaj Diosta mañapaichi. Chai jipaca, cangunataca na ashtahuan jarcashpa richun saquishallami” nircami.

29Shina nijpimi Moisesca cashna nirca:

“Cai pueblomanda ñuca llujshishcandi, Mandaj Diospajman ñuca maquita vichai churajpimi, rayucunapash, rundupash na ashtahuan urmamunga. Cai pachaca, Mandaj Diospaj cajta yachachunmi, chashna rurasha.

30Ashtahuangarin Mandaj Taita Dios ricujujtaca, cambash, cambaj cati mandajcunapash nara manllajtami yachani” nircami.

31Lino yuracunatapash, cebadatapash rundumi tucuilla tucuchishca. Cebadaca ña espigashcami carca. Lino yuracunapash ñami sisajurca.

32Ashtahuangarin, trigohuan, centenohuanllami, jipa tarpushca cashpa na tucuchi tucushca.

33Moisesca, Faraonbaj ñaupajmanda llujshishpa, pueblo canllapi paipaj maquita, Mandaj Diospajman vichai churarca. Shina rurajpimi, rayucunapash, rundu urmajunpash jarcarirca. Shinallata, tamiapash llactapica na ashtahuan urmamurcachu.

34Faraonga, tamiapash, rundupash, rayupash yalijpimi, cutin juchata rurashpa catijurca. Paipaj shungupash, paita cati mandajcunapaj shungupashmi shinlliyarca.

35Faraonbaj shungu shinlliyashpami, Mandaj Dios imashna Moisesman nishcashna, Israelcuna richunga na saquirca.