1Profetacunapaj huarmicunamanda shuj huarmimi, Eliseotaca cashna nishpa caparirca:
“Cambajta ruraj, ñuca cusaca huañuparcami. Cambajta ruraj paica, Mandaj Diosta manllashpa causashcataca yachapanguimi. Cunanga, culquita mañachij runa shamushpami, ñucapaj ishcai churicunataca paipaj gañan cachun apasha nijun” nircami.
2Shina nijpimi Eliseoca:
“¿Imatata rurachun munangui? Cambaj huasipica, ¿imatallata charingui? Villahuai” nishpa tapujpimi, chai huarmica cashna nirca:
“Cambajta ruraj ñucaca, imatallapash huasipica na charipanichu. Shuj mangapi aceitetallami charini” nirca.
3Shina nijpimi Eliseoca:
“Cunanga, cambaj huasi quimiriancunapajman rishpa, ashtaca chushaj mangacunata mañagri.
4Chai jipaca cambash, cambaj churicunapash ucuman vicharishpa, tucuilla mangacunapi aceiteta churangui. Chashna churajpi jundashca mangataca, shuj pushtuman anchuchingui” nircami.
5Shina nijpimi chai huarmi rishpaca paipash, paipaj churicunapash punguta vichashpa, mangacunata paipaj churicuna yalichimujpi, chai mangacunapi aceiteta churajurca.
6Ña tucuilla mangacuna junda cajpimi, paipaj shuj churitaca:
“Ashtahuan mangacunata apamui” nijpi, paipaj churica:
“Mangacunaca, na ashtahuan tiyanllu” nirca.
Shina nijhuanmi aceitepash tucurirca.
7Chai jipami, chai huarmica, Taita Diospajta ruraj Eliseopajman shamushpa tucuita villarca. Shina villajpimi Eliseoca:
“Chai aceitetaca, jatungapa rilla. Chai jatushca culquitaca, culquita mañachijcunaman tigrachingui. Puchushcahuanga cambash, cambaj churicunapash micushpa causanguichi” nirca.
Eliseomandapash, Sunem pueblomanda huarmimandapash8Shuj punllami, Sunem shuti pueblota Eliseoca yalijurca. Chai pueblopica, ali rijsi tucushca shuj huarmimi causajurca. Paimi, Eliseotaca micungapa ripashun nijushpallata pusharca. Chaimandami Eliseoca, chai pueblota yalijushpaca, chai huarmipaj huasipi micungapa shamun carca.
9Chai huarmica, paipaj cusamanmi cashna nirca:
“Cai ñucanchi huasita yalij chai runaguca, Taita Diospajlla causaj runagu cajtami yachani.
10Chaimanda cunanga, shuj uchilla ucuguta pircashpa paiman rurapashun. Ñucanchipajman pai shamushpa samachun, shuj camata, shuj mezata, shuj tiyarinaguta, shuj lamparagutapash churapashun” nirca.
11Shuj punlla, Eliseo chai huasiman shamushpami, paiman rurashca ucupi puñurca.
12Chaipi cashpami, paipajta ruraj Giezi shuti runataca, cashna nirca:
“Caipi causaj Sunam pueblomanda huarmita cayamui” nijpimi paipajta ruraj runaca, chai huarmita cayamurca.
Chashna cayajpi chai huarmi shamujpimi,
13paipajta ruraj Giezi shuti runataca, cashna nirca:
“Chai huarmitaca, cashna ni: ‘Ñucanchihuan can ninan ali cashcamandaca, canmandaca ¿nachu imagullatapash rurachun munangui? Jatun mandajhuan cashpa, na cashpaca macanajunata yachaj mandajhuan cashpapash, ¿nachu canmanda parlachun munangui?’ ni” nircami.
Eliseopajta ruraj runa chashna nijpimi, chai huarmica:
“Cai ñuca gentecunahuanga, alimi causapani” nirca.
14Shina nijpimi Eliseoca, paipajta ruraj runataca cashna nirca:
“Shina cashpaca, chai huarmimandaca, ¿imatata rurashun?” nijpimi, paipajta ruraj Giezi shuti runaca:
“Paica huahuacunatami na charin. Paipaj cusapash ñami rucugu” nircami.
15Shina nijpimi, Eliseoca:
“Chai huarmita cayamui” nijpi, paipajta ruraj runaca, chai huarmita cayamurca.
Shina cayajpi shamushpami, chai huarmica pungupi shayarirca.
16Chashna shayajujpimi Eliseoca:
“Cunanmanda shuj huata jipami, shuj jari huahuaguta charigringui” nirca.
Shina nijpimi chai huarmica:
“Ñucata mandajlla, Taita Diospaj runagulla. Cambajta ruraj ñucataca, ama chashna umachihuaichu” nirca.
17Ashtahuangarin cati huatapaca, Eliseo villashcashnami, chai huarmica vijsayu tucushpa, shuj jari huahuaguta charirca.
18Chai huahuagu ña jatun cashpami, paipaj taita pambapi fucushcata tandachijujta ricungapa shamurca.
19Chaipi cashpami chai huambraguca, paipaj taitamanga:
“¡Aij, umata nananmi, umata nananmi!” nishpa villajpi, taitaca paipajta ruraj shuj runataca:
“Paipaj mamapajman apai” nishpa cacharca.
20Chai runa marcashpa paipaj mamapajman apajpimi, chaupi punllacaman mamapaj migllapi tiyajushpallata huañurca.
21Chaimandami, chai huarmica Taita Diospaj runagupaj camapi churashpa, punguta vichashpa llujshirca.
22Chai jipami, paipaj cusata cayashpaca cashna nirca:
“Taita Diospaj runagupajman rishpa tigramugringapa, cambajta rurajpuramanda shuj runata, shinallata shuj huarmi burrutapash ñucahuan cachapai nipanimi” nircami.
23Shina nijpimi paipaj cusaca, cashna nirca:
“¿Imashpata cunanga paita ricungapa rigringuiyari? Cunanga, llullu lunallapash, samana punllallapash na canga” nirca.
Shina nijpimi, chai huarmica:
“Cayacaman” nishpa rirca.
24Chai jipaca, burrupi tiyarishpa, chai ruraj runataca cashna nirca:
“Cunanga, ama ñambi shayarishpa, burruta aisashpa ucha pushahuailla. Ñuca shayari nijpillami shayarina cangui” nirca.
25Chashna rishpami, Carmelo shuti urcuman, Taita Diospaj runagupajman chayagrirca. Taita Diospaj runaguca, chai huarmi ña caruta shamujujta ricushpami, paipajta ruraj Giezi runataca, cashna nirca:
“Ricui, chaitaca Sunam pueblomanda huarmimi shamujun.
26Cunanda tuparingapa rishpa: ‘¿Cambash, cambaj cusapash, cambaj churipash, alillachu capanguichi?’ nigripai” nircami.
Shina tapugrijpimi paica:
“Alillami capanchi” nirca.
27Chai urcuman Taita Diospaj runagupajman chayashpami, paipaj chaquipi ugllarirca. Chashna ugllarijujpimi, Giezi runa anchuchingapa munajpi, Taita Diospaj runaguca cashna nirca:
“Saquilla, paipaj shungupica jatun llaquihuanmari. Pai imamanda llaquilla cajtaca, pacashpami Mandaj Diosca na villahuashca” nircami.
28Shina nijpimi chai huarmica, cashna nirca:
“¿Ñucata mandajtaca, ñucachu churiguta mañaparcani? ¿Nachu, huahuata charigringuimi nijpica, ama chashna umachihuaichu niparcani?” nirca.
29Shina nijpimi Eliseoca, paipajta ruraj Giezi runataca cashna nirca:
“Ali chumbilirishpa, ñuca taunata apashpa ri. Pipash tuparijpica, ama alillachu capangui ninguichu. Candapash alillachu capangui nijpipash, upalla ringuilla. Ña huasiman chayashpaca, huahuapaj ñavi jahuapi ñuca taunata churangui” nircami.
30Shina nijpimi chai huahuapaj mamaca, cashna nirca:
“Mandaj Diosca ricujunmi, cambash causajunguimi. Candaca, na saquishpa ripashachu” nircami.
31Shina nijpimi Eliseoca jatarishpa, chai huarmita catishpa rirca.
Giezi shuti runaca, paicunata ñaupashpa rishpami, chai huahuapaj ñavi jahuapi taunata churashca carca. Chashna churajpipash na parlarca, na cuyurircachu. Chaimandami, Eliseohuan tuparingapa tigramushpaca:
“Huahuaca na causarinllu” nirca.
32Chai huasiman Eliseo chayamushpaca, paipaj camapi huahua huañushca sirijujtami ricurca.
33Chaimandami Eliseoca, ishcandita canllaman saquishpa, pailla ucuman yaicushpa punguta vicharishpa, Mandaj Diosta mañarca.
34Chai jipaca, Eliseoca paipaj shimitaca huahuapaj shimipi, paipaj ñavitapash huahuapaj ñavipi, paipaj maquitapash huahuapaj maquipi churashpami, huahuapaj jahuapi siririrca. Chashna siririjpimi, huahuapaj cuerpoca cunujyarca.
35Chaimanda jatarishpami Eliseoca, huasi ucupi caiman chaiman purijurca. Chai jipapash, cutinllatami, chashnallata chai huahuapaj jahuapi siririrca. Chashna sirijpica, canchiscaman apsiashpami, chai huahuaca ñavita pascarca.
36Chaimandami Eliseoca, Giezi runata cayashpaca:
“Huasiyuj, Sunam pueblomanda huarmita cayamui” nirca.
Giezi runa cayajpi, chai huarmi shamushpa ucuman yaicujpimi, Eliseoca:
“Jaica, cambaj churiguca caipimi” nirca.
37Shina nijpimi, chai huarmica ucuman yaicushpa, Eliseopaj chaquipi cungurishpaca, alpaman chayajta cumurirca. Chai jipaca, paipaj huahuata japishpami, chai ucumanda llujshirca.
Profetacunapaj ali cachunmi, pipash na rurai ushanallacunata rurashca38Gilgal shuti pueblo muyundi pambacunapi na fucushpa, ninan yarjai tiyaj punllacunapimi, Eliseoca cutin chaiman tigrarca. Profetacunapaj churicunaca chaipimi Eliseohuan carca. Chaimandami Eliseoca, paipajta ruraj runataca cashna nirca: “Jatun mangata shayachishpa, profetacunapaj churicunaman micunata yanushpa carai” nircami.
39Paicunapuramanda shuj profeta runami, pambapi micuna jihuata pallangapa llujshirca. Paica, chaipimi sacha zambushnalla yurata tarishpa, granota miglla jundata pallashpa apashpaca, micunata yanujuj mangapi chaupishpa churarca. Chashna churashpapash, chai grano ima cajtaca na yacharcachu.
40Ña yanushca jipa, paicuna micuchun carajpi micushpaca, cashna nishpami caparinajurca: “¡Taita Diospaj runagu, cai mangamanda micunaca huañugrinchimari!” ninajurca. Chaimandami, na micui ushanajurca.
41Shina ninajujpimi, Eliseoca:
“Jacuta apamuichi” nirca.
Jacuta apamujpi, mangapi ña talishpami:
“Gentecuna micuchun carailla” nirca.
Chai mangapica, ima na alipash na ashtahuan tiyarcachu.
42Chai jipami, Baal-salisa shuti pueblomanda shuj runa shamushpaca, punda fucushca trigo tandatapash, ishcai chunga cebada tandatapash, mushuj trigo fucushcatapash, Taita Diospaj runaguman muchilapi apashpa shamurca. Chaita japishpami Eliseoca, paipajta ruraj runataca:
“Gentecuna micuchun carai” nirca.
43Shina nijpimi, chai ruraj runaca:
“Caica, patsaj runacunapaca na pactangachu” nirca.
Shina nijpimi Eliseoca:
“Gentecuna micuchun carailla. Mandaj Diosca cashnami nin: ‘Paicuna micujpipash puchungarami’ ninmi” nirca.
44Shina nijpi, paipajta ruraj runa gentecunaman carajpi, tucuicuna micujpipash, Mandaj Dios villashcashnallata micunaca puchurca.
Who We AreWhat We EelieveWhat We Do
2025 by iamachristian.org,Inc All rights reserved.
