2 CRÓNICAS 30 - Quichua Imbabura 2016

Ezequías runa, pascua micuita rurashcamanda

1Chai jipami Ezequiasca, tucuilla Israelcunaman, Judá llactapi causajcunaman villachun cacharca. Efraín, Manasés ayllumambash, cartacunata quilcashpami cacharca. Israelcunata Mandaj Taita Diosta yarishpa, pascua punllapi micuita rurangapami, Jerusalenbi Mandaj Diospaj huasiman shamuchun, quilpashpa cacharca.

2Jatun mandajca, pai churashca cati mandajcunahuan, Jerusalenbi tandanajushca tucui gentecunahuanmi, huatapaj ishcai quillapi pascua punllapi micuita rurangapa yarijushca carca.

3Diospajlla tucushca sacerdotecunapash, na tauca tiyajpi, gentecunapash Jerusalenbi na tandanajujpimi, pascua punllapi micuita rurangapaca na ushanajurca.

4Chaita ruranataca, jatun mandajpash, chaipi tucui tandanajushca gentecunapash, ali cajtami ricunajurca.

5Chaimandami Israel llactapi tucui causajcunataca, pascua punllapi micuita rurashpa, Mandaj Taita Diosta yarinajungapa Jerusalenman shamuchun, Beerseba shuti pueblomandaca, Dan shuti pueblocaman, tucuilla Israelcunata cayachun, cachanajurca. Mandashcapi quilcashca tiyajunshnallata, pascua punllapi micuitaca, ña unai huatacunata saquishcamandami, chashna ruranajurca.

6Quilcashcacunata apajcunaca, jatun mandajpaj maquimandapash, cati mandajcunapaj maquimandapashmi cartacunata apashpa, jatun mandaj mandashcashna, tucui Israel llactaman, Judá llactaman rinajurca. Paicunaca, cashna nishpami villanajurca: “Israelcunalla, Abrahambaj, Isaacpaj, Jacobpaj Mandaj Taita Diospajman tigrarichi. Shina tigrarijpica, Asiria llactata jatun mandajcunapaj maquimanda quishpirishpa saquirishcacunataca llaquingami.

7Cangunaca, cangunapaj taitacunashna, cangunapaj huauquicunashnaca na canachu canguichi. Paicunaca, paicunapaj ñaupa taitacunata Mandaj Taita Diosta fiñashpami na cazunajurca. Chaimandami paicunataca, canguna ricujta tucuchirca.

8Cunanga, cangunapaj taitacunashnaca na shinlli shungu tucushpami, Mandaj Diosta cazushpa, paipaj huasiman shamuna canguichi. Chai huasitaca, causaita causaicaman Paipajlla cachunmi shicanyachishca. Shinallata, canguna, Mandaj Taita Diospajta rurashpa causajpimi, Pai fiñarishcapash, cangunamanda anchuringa.

9Mandaj Diospajman canguna tigrarijpica, cangunapaj huauquicunata, churicunata, prezu apashpa charinajuj gentecuna llaquishpa cacharijpimi, cutin cai llactaman tigramunga. Cangunata Mandaj Taita Diosca, ninanda juyaj, ninanda llaquij Diosmi. Canguna Paipajman tigrarijpica, paica cangunata llaquijungallami” nishpami villanajurca.

10Cartacunata apaj runacunaca, Efraín ayllu, Manasés ayllu pueblocunata yalishpami, Zabulón ayllucunapaj pueblocunacaman villashpa rinajurca. Ashtahuangarin paicuna villajpica, na alicachishpami ninanda asinajurca.

11Chashna cajpipash, Aser ayllupaj, Manasés ayllupaj, Zabulón ayllupaj huaquin runacunaca pingai tucushpa urai cumurishpami, Jerusalenman shamunajurca.

12Taita Diosca, ushaita charij paipaj maquihuanmi, Judá llactapi causajcunamambash, Mandaj Dios imashna mandashcashna, jatun mandajpash, cati mandajcunapash mandashcata cazuchun, shujlla yuyaita curca.

13Chaimandami cati quillapica, levadura illaj tandata micushpa cushijuna punllata yarishpa rurangapa, ashtaca gentecuna Jerusalenbi tandanajurca.

14Paicuna jatarishpami, Jerusalenbi tiyaj altarcunata, inciensota cushnichina tucui altarcunatapash anchuchishpa, Cedrón shuti huaicupi shitanajurca.

15Chai jipami, pascua punllapi huañuchina llamataca, chai huatapaj ishcai quilla chunga chuscu punllapi huañuchinajurca. Sacerdotecunapash, levitacunapash ninanda pingai tucushpami, Diospajlla tucunajurca. Diosman cushpa tucuillata rupachina animalcunatapash, Mandaj Diospaj huasiman apamunajurca.

16Shinallata, imashna yaicuna cashcashnami, Diospajta ruraj Moisés mandashcashna ruranajurca. Sacerdotecunaca, animalcunapaj yahuarta levitacunapaj maquimanda japishpami tsirapachinajurca.

17Chai tandanajuipica, taucacunami nara Diospajlla tucushcacuna tiyarca. Chaimandami levitacunaca, nara Diospajlla tucushcacuna, Mandaj Diospajlla tucuchun, chai pascua punllapi ashtaca animalcunata Diosman cushpa huañuchinajurca.

18Efraín, Manasés, Isacar, Zabulón ayllucunamandaca, ashtaca gentecunami nara Diospajlla tucushca tiyarca. Shina cashpapash, quilcashcapi nijushcata na pactachishpami, pascua punlla micunata micunajurca. Ashtahuangarin, Ezequías runaca, paicunamandami cashna nishpa Diosta mañarca: “Mandaj Dioslla, alimari capangui. Paicunapaj tucui shunguhuan, Can Taita Diosta mascangapa shamushca gentecunataca, chasquipanguilla.

19Paicunaca, paicunapaj ñaupa taitacunata Mandaj Taita Dios mandashcashna, mapa illaj cangapa, Diospajlla ucupi nara pactachishca cajpipash chasquipanguilla” nishpami mañarca.

20Ezequías chashna mañajujta uyashpami, Mandaj Diosca gentecunata perdonashpa chasquirca.

21Shinami Jerusalenbi tandanajushca Israelcunaca, levadura illaj tandata micuna punllapica, ninanda cushijushpa canchis punllacaman, jatun micuita ruranajurca. Levitacunahuan, sacerdotecunahuanga punllandimi, Mandaj Diosman rurashca taquinacunahuan taquishpa, Mandaj Diostaca ninanda alicachinajurca.

22Ezequías runaca, Mandaj Diospajta rurangapa ali yuyaita charij tucui levitacunatami, paicunapaj shungupi chayajta rimajurca. Jatun cushijui punllapi micungapa huañuchishca aichataca, canchis punllacamanmi micunajurca.

Dioshuan ali cangapa, animalcunata cushpa huañuchishpaca, paicunapaj ñaupa taitacunata Mandaj Taita Diostapash pashi nishpami micunajurca.

23Tucui chaipi tandanajushcacunami, ashtahuan canchis punllacunatapash jatun micuita rurashpa catingapa saquirinajurca. Shinami, cutin shuj canchis punllacunacaman cushijuihuan jatun micuita ruranajurca.

24Chai micuipaca, Judá llactata jatun mandaj Ezequías runami, chaipi tandanajushca gentecunaman, huaranga maltun shicuta, canchis huaranga llamata carashca carca. Shinallata, cati mandajcunapash, huaranga maltun shicuta, chunga huaranga llamacunatami caranajurca. Ashtaca sacerdotecunami, Diospajlla tucushca carca.

25Judá llactapi causanajuj tucui tandanajushca gentecunapash, sacerdotecunapash, levitacunapash, Israel llactamanda ashtaca shamushcacunapash, shinallata shuj llactamanda purijcuna, Israel llactapi, Judá llactapi causajcuna shamushcacunapashmi ninanda cushijunajurca.

26Chashnami Jerusalenbica, ninandapacha cushijunajurca. Israel llactata jatun mandaj Davidpaj churi Salomón mandajui punllacunamandapacha, Jerusalenbica na chashna rurashcachu carca.

27Chai jipaca sacerdotecunapash, levitacunapash shayarishpami gentecunata bendicianajurca. Paicuna tucui imata mañashcapash, Taita Dios causajuj jahua pachacamanmi chayarca.