1Taita Dioslla,
shuj llactamanda gentecunami, Cambaj llactaman shamunajurca.
Cambajlla huasitapash yangapi churashpami,
Jerusalendapash urmachishpa, rumi mundundalla saquirca.
2Cambajta rurajcunata huañuchishpami,
jahuata rij alasyu animalcuna micuchun saquirca.
Cambajlla causajcunata huañuchishpami,
millai animalcuna micuchun saquirca.
3Paicunapaj yahuartaca, Jerusalén muyundipimi yacutashna jicharca.
Huañushcacunataca, maijan pambanapash illarcami.
4Ñucanchi muyundipi causajcuna na alicachijpimi causanajunchi.
Muyundi llactacunapi causajcunaca, asishpa, na alicachishpami ricunajun.
5Mandaj Dioslla,
¿causaita causaicamanllu fiñarishpa catigringui?
¿Ñucanchihuanga, ninanda fiñarishpallachu causagringui?
6Canda na cazuj llactacunata chashna ninanda fiñarishpa llaquichipai.
Canda na rijsij llactacunata chashna ninanda fiñarishpa llaquichipai.
7Jacobpaj miraicunataca, paicunami huañuchinajurca.
Paicuna causana llactatapash, llaquinayaitami tucuchinajurca.
8Ñucanchi ñaupa taitacuna juchata rurashcamandaca, ama ñucanchitara llaquichihuaichu.
Ñucanchitaca, Cambaj ninan juyaihuan quishpichihuayari.
Ninanda llaquichi tucushcamari capanchi.
9Ñucanchita quishpichij Taita Dioslla,
Cambaj ninan ushaihuan yanapahuayari.
Cambaj shutita juyaimanda,
ñucanchi juchacunata perdonashpa, cai llaquimanda cacharichihuayari.
10Gentecunaca: “¿Paicunapaj Taita Diosca maipitayari?” ninajungami.
Cambajta rurajcunata huañuchishpa yahuarta jichashcataca,
shujcunapash yachachun, paicunatapash ñucanchi ricujta huañuchipayari.
11Ninan llaquihuan cashpa huacanajujtaca, uyapayari
Huañuchi tucunapacha nishcacunataca, Cambaj ninan ushaihuan quishpichipayari.
12Mandaj Dioslla,
ñucanchi muyundi llactacunapi causajcunataca, canchiscaman llaquichipayari.
Canda ninanda na alicachishpa yangapi churashcamanda, chashna llaquichipayari.
13Can agllashca gentecunaca, michina pambacunapi micuj llamacunashna,
causaita causaicamanmi, Candaca alicachishun.
Causaita causaicamanmi, Candalla alicachishpa candanajushun.
Who We AreWhat We EelieveWhat We Do
2025 by iamachristian.org,Inc All rights reserved.
