MATEO 19 - Quichua Imbabura 2016

“Cazarashpaca napacha jichunachu” nishcami(Mar. 10:1-12; Luc. 16:18)

1Shina yachachishca jipami Jesusca, Galilea llactamanda llujshishpa, Jordán jatun yacuta chimbashpa, Judea llactaman rirca.

2Paitaca, ashtaca gentecunami catishpa rinajurca. Shinallata, tucui huañujujcunatami Jesusca alichijurca.

3Fariseocunaca Jesuspajman shamushpami, imata tigrachijpipash juchachingapa munashpa, cashna tapunajurca:

“Maijan runapash, paipaj huarmita imamandapash juchachishpa jichunaca, ¿alichu canga imata?” ninajurcami.

4Shina ninajujpimi Jesusca cashna nirca:

“Callaripica Diosmi: ‘Jaritapash, huarmitapash rurarca’ nishcataca, ¿nachu quilca catishcanguichi?

5Diosca cashnatapashmi nirca: ‘Jarica, taitatapash, mamatapash saquishpami, paipaj huarmihuan tandanajushpa, ishcai cashpapash, shujlla aicha tucunga’ nircami.

6Chashna cashpami, ña na ashtahuan ishcai cashpa, shujlla aicha tucushpa causanga. Shina cashcamandami, Taita Dios tandachishcataca, runaca napacha shicanyachi ushana” nircami.

7Shina nijpimi:

“¿Imashpata: ‘Moisesca quilcashca fangata cushpalla huarmitaca jichunallami’ nishpa mandashca canga?” ninajurcami.

8Shina nijpimi Jesusca, paicunataca cashna nirca:

“Canguna shinlli shungucuna cajpimi, ‘huarmitaca chashna jichunallami’ nishpa, Moisesca mandashca. Ashtahuangarin callaripica, na chashnachu carca.

9Chaimi cangunataca, cashna nini: Napash huainayajpita, paipaj huarmita imamandapash juchachishpa jichushpa, shujhuan cazarashpaca, huainayashpami causajun. Shinallata cusa jichushca huarmihuan pipash cazarashpaca, huainayashpallatami causajun” nircami.

10Shina nijpimi Paipaj yachajujcunaca, cashna ninajurca:

“Cazarashca jahua, huarmita na jichunalla cajpica, ama cazarashpa causanami ashtahuan ali canga” ninajurca.

11Shina nijpimi Jesusca cashna nirca:

“Caitaca, na tucuicuna chasqui ushanallachu. Chaitaca, Dios cujpillami, maijambash chasqui ushanga.

12Huaquingunaca, mamapaj vijsamandallatami, capashcashna huacharin. Huaquin runacunaca, capai tucushca cashpami, na cazarashpa causan. Cutin shujcunaca, jahua pachapi Dios mandajuj llactapi causagringapa munashpami, na cazarashpa causanajun. Maijambash cai Ñuca yachachishcata chasqui ushashpaca, chasquichun” nircami.

Huahuacunata Jesús bendiciashcamanda(Mar. 10:13-16; Luc. 18:15-17)

13Chai jipami, huahuacunapi maquita churashpa mañachun, Jesuspajman apamunajurca. Shina apamunta Paipaj yachajujcuna ricushpami, jarcashpa rimanajurca.

14Ashtahuangarin Jesusca cashnami nirca:

“Huahuacuna Ñucapajman shamuchun na jarcashpa saquipaichilla. Taita Dios mandajuj llactaca, cai huahuacunashna shamujcunapajllami.” nircami.

15Shina nishpa, maquita paicunapaj jahuapi churashpaca, chaimanda rircallami.

Charij huambramandami villajun(Mar. 10:17-31; Luc. 18:18-30)

16Shuj runa, Jesuspajman shamushpami cashna nirca:

“Ali runagumi cangui Yachachij, causaita causagrinata ñuca charingapaca, ¿imatata rurana capani?” nircami.

17Shina tapujpimi Jesusca cashna nirca:

“¿Imashpata, ‘ali runagumi cangui’ nihuangui? Pipash alica na tiyanllu. Taita Diosllami alica tiyan. Causaita causagrinata charingapa munashpaca, Dios mandashca shimicunatami pactachina cangui” nircami.

18Shina nijpimi:

“Chai mandashcacunaca, ¿maijanda capan?” nirca.

Shina nijpimi Jesusca, cashna nijurca:

“Ama huañuchinguichu, cazarashca jahua ama shujcunahuan causanguichu, ama shuhuanguichu, ama ‘chashnapachami’ nishpa yangata juchachinguichu.

19Cambaj taitata, cambaj mamataca, alicachishpa cazungui. Cambaj cumbataca, imashna can juyarinshnallata juyangui” nircami.

20Shina nijpimi chai huambraca, cashna nirca:

“Chaicunataca, chaira viñaimandami tucuita pactachijupani. ¿Imatata ashtahuan pactachinara capani?” nircami.

21Shina nijpimi Jesusca cashna nirca:

“Taita Diospaj ñaupajpi ali cangapa munashpaca, can tucui charishcata jatushpa, imagutapash na charijcunaman caragrilla. Chashna carashpaca, jahua pachapimi ninan charij cangui. Chai jipaca, Ñucata catihuailla” nircami.

22Jesús chashna nijpica chai huambraca, charij charij cashcamandami ninanda llaquirishpa rirca.

23Chaimi Jesusca, Paipaj yachajujcunataca cashna nirca:

“Na llullashpami cangunataca cashna nini: Shuj ninan charij runapaca, jahua pachapi Dios mandajuj llactaman yaicunaca, ninan shinllipachami.

24Cashnatapashmi cangunataca nini: Taita Dios mandajuj llactaman, ninan charij runa yaicuitaca na fangalla ushangachu, chaipaj randica, camellorapashmi, auja utujuta fangalla yalinman” nircami.

25Shina nijta paipaj yachajujcuna uyashpami, ninandapacha manllarishpa:

“¿Pita shinaca quishpiri ushangayari?” nirinajurcami.

26Shina ninajujpimi Jesusca, paicunata ricushpa cashna nirca:

“Gentecunapaca napacha ushanallachu. Ashtahuangarin Taita Diospaca, rurai ushanallami” nircami.

27Shina nijpimi Pedroca cashna nirca:

“Ñucanchica imaguta charishcatapash tucuita saquishpami, Candaca catinajunchi. Shina catishcamandaca, ¿imatashi charishun?” nircami.

28Shina nijpimi Jesusca cashna nirca:

“Na llullashpami cangunataca cashna nini: ‘Taita Dios tucuita mushujyachi punllapimi, Runa Aichayuj tucushca Ñucaca, punchapamba tiyarinapi tiyarishpa mandajujpi, Ñucata catinajushcamandaca, cangunapash chunga ishcai tiyarinapi tiyaringuichi. Chaipimi, chunga ishcai Israel ayllucunataca alita na alita rurashcatapash ricuchinguichi.

29Maijan cashpapash, paipaj huasicunata, huauquicunata, panicunata, taitata, mamata, huarmita, huahuacunata, paipaj alpacunata, Ñucata catingapa saquishcamandaca, patsajta mirachishcatami chasquinga. Shinallata, causaita causagrinatapashmi japinga.

30Ashtahuangarin, ashtacacuna pundapi churai tucushcacunaca, huashamanmi churai tucunajunga. Shinallata, huashaman churai tucushcacunaca, pundapimi churai tucunajunga’ ninimi.