1Jotam shuti runapaj churi, Acaz runa Judá llactata mandajui punllacunapimi, Remalías shuti runapaj churi Peka shuti runaca, Israel llactata mandajurca. Paimi, Siria llactata jatun mandaj Rezín shuti runahuan cumba tucushpa, Jerusalenbi causajcunahuan macanajungapa vichai shamurca. Chashna shamushpapash, Jerusalendaca na quichui usharcachu. Jotam shuti runapaj taitaca, Uzías shutimi carca.
2Chaitami, Davidpaj miraipura jatun mandaj Acazman, cashna villaj shamunajurca: “Siria llactapi causajcunaca, Efraín llactapi causajcunahuan cumba tucushpami, canhuan macanajungapa shamushca” ninajurcami. Chaita villajpimi, jatun mandaj Acaz runapash, Jerusalenbi causajcunapash, urcu quirucuna huairajpi cuyurinshna, manllashpa chujchunajurca.
3Shinamandami Mandaj Diosca, Isaiastaca cashna nirca: “Cunanga cambash, Sear-jasub shuti cambaj churipash, Acaz shuti runahuan tuparingapa richilla. Paitaca, janajpi tiyajuj tanqueman shamujuj larca manñapi, tajshajcunapaj alpaman rina ñanman chayanapimi tuparingui.
4Acaz runataca, cashna ningui:
‘Siria llactamanda Rezín runahuan, Remalías runapaj churihuanga,
nina chiriyashpa cushnijuj ishcai caspicunashnami, ninandapacha fiñarishca shamunajun.
Ashtahuangarin canga, ama manllashpa shuyajuilla.
Cambaj shungupipash, ama llaquiringuichu.
5Siria llactamanda runacunahuan,
Efraín ayllucunahuan, Remalías runapaj churihuan cumba tucushcacunaca,
canda llaquichingapami, cashna ninajun:
6Judá llactapi causajcunahuan macanajungapa rishpa manllachishunchi.
Chai llactata japishpa, ñucanchipura chaupirishunchi.
Chai llactapi jatun mandaj cachunga, Tabeel shuti runapaj churita churashunchi ninajunmi.
7Chaimandami Mandaj Jatun Diosca, cashna nin:
Napacha chaica pactangachu.
8Siria llactapaj jatun puebloca, Damasco pueblomi.
Damasco pueblotaca, Rezín shuti runami mandajun.
Sucta chunga picha huatapica, Efraín aylluca, tucuilla tucuringacamanmi llaquichi tucunga.
9Efraín ayllupaj jatun puebloca, Samaria pueblomi.
Samaria pueblotaca, Remalías shuti runapaj churimi mandajun.
Cangunapash, Ñucata na cazushpaca, tucuringuichimi’ ninmi nishpa villai” nihuarcami.
10Mandaj Diosca, Acaz runataca cashnatapashmi nirca:
11“Canda Mandaj Taita Dios, canman imata rurachun munashpapash, mañahuailla. Alpa ucumanda cashpapash, jahua pachamanda cashpapash, imata can mañashcataca pactachishallami” nircami.
12Shina nijpimi, Acaz runaca: “Na chaitaca mañapanichu. Mandaj Diostaca, imatapash mañashpa fiñachingapaca na munanichu” nirca.
13Shinamandami Isaiasca, cashna nirca:
“Davidpaj miraicuna, cunanga caita uyahuaichi:
¿Runacunata fiñachijushcapash, imapash na canllu yashpachu, ñuca Taita Diostapash fiñachingapa munanguichi?
14Cunanga, Jatun Diosllatami, pipash na ushanallata rurashpa ricuchigrin:
Chairalla viñai cuitsagumi vijsayu tucushpa, shuj jari huahuaguta charinga.
Chai huahuagutaca, Emanuel shutitami shutichinga.
15Chai huahuaguca, ima ali cajtapash, ima na ali cajtapash yachangacamanmi,
leche viratalla, balun mishquitalla micunga.
16Ima ali cajtapash, ima na ali cajtapash, chai huahuagu nara yachajpillatami,
can manllashca ishcai jatun mandajcunapaj llactaca, jichushca saquiringa.
17Mandaj Diosca, candapash, can mandajuj llactapi causajcunatapash,
cambaj huasi ucupuratapashmi, ninanda llaquichijunga.
Efraín ayllu, Judá ayllumanda shicanyashca punllamandapacha,
cunangaman na ricushca llaquicunami shamunga.
Asiria llactata jatun mandajmi, chashna llaquichijunga.
18Chai punllapica, cashnami tucunga:
Mandaj Diosca, Egipto llactapi tiyaj, jatun yacu manñacunapi causajcunatami,
chuspicunata cachamunshna cachamunga.
Asiria llactapi causajcunataca, balun chuspicunatashnami cachamunga.
19Chai tucui gentecuna shamushpami, pugru pambacunapi, jichushca pambacunapi,
jatun rumi ucucunapi, casha yura ucucunapi, tucui yura ucucunapipash jundanajunga.
20Chai punllapica Jatun Diosca,
Éufrates yacuta yalishpa causajuj llactamanda jatun mandajta pushamushpami llaquichinga.
Asiria llactata jatun mandajmi, culquipaj mañashca navajahuanshna,
uma ajchatapash, barbastapash cuchushpa pingaichinshna llaquichinga.
21Chai huatapica, cashnami tucunga: Shuj runallami, shuj huarmi huagrata, ishcai huarmi chivocunata charinga.
22Chai animalcuna ashtaca lecheta cujpimi, leche viratalla micushpa causanga. Cai llactapi saquirijcunaca, leche virata, balun mishquita micushpami causanga.
23Chai huatapica, cashnapashmi tucunga: Huaranga uva yuracuna tarpushca pambaca, chunga shuj kilo chaupi yalita pezaj culquipaj randinami canga. Chai alpapash, cashacunahuan, na ali jihuacunalla jundami saquiringa.
24Chai alpacunapica, cashacunalla, na ali jihuacunalla junda cajpimi, flechacunahuan, arcocunahuan yaicui ushanga.
25Azadongunahuan tulashpa, tarpuna loma pambacunapash, cashacunalla, na ali jihuacunalla junda cajpimi, pipash na yaicui ushanga. Ashtahuangarin chaicunaca, huagracuna micuna, animalcuna sarunami canga” nircami.
Who We AreWhat We EelieveWhat We Do
2025 by iamachristian.org,Inc All rights reserved.
